Ажлын хэсэг \”Өршөөлийн хууль\”-д өөрчлөлт оруулахгүй

Өршөөлийн хуулийн
зарим зүйл заалтад Ерөнхийлөгч Ц.Элбэгдоржийн тавьсан хоригийг УИХ-аар хэлэлцэж хүлээж авсан.
Ингэснээр авлига, албан тушаалын хэрэгт холбогдож улсад 32.2 тэрбумын хохирол
учруулсан 100 гаруй хүнийг өршөөхөөс
татгалзаж байгаа юм. Ерөнхийлөгчийг хоригийг хүлээн авсан учраас \”Өршөөлийн
тухай хууль”-д нэмэлт өөрчлөлт оруулах ёстой. Энэ ажлыг гүйцэтгэхээр Шадар сайд Ц.Оюунбаатараар /хуулийг
санаачлагч/ ахлуулсан 11 хүний
бүрэлдэхүүнтэй ажлын хэсэг гарсан.

 

УИХ-ын Дэгийн тухай
хуулийн 31.9-д зааснаар хоригийг хүлээж авсантай холбогдуулан холбогдох нэмэлт
өөрчлөлтийг байнгын хороо санаачлан, батална гэсэн заалттай. Үүний дагуу
Өршөөлийн хуулийн талаар ажлын хэсэг хуралдаж хоригийг хүлээж авсантай
холбоотойгоор хэрхэн өөрчлөлт оруулахыг хэлэлцсэн байна.

Ерөнхийлөгч авлига, албан тушаал, луйврын хэрэгт холбогдсон хүмүүсийг
өршөөлийн хуульд хамруулахгүй гэсэн хоригийг тавьсан. Ийм энгийн
ойлгомжтой хоригийг хүлээн авч хуульдаа өөрчлөлт оруулах гэхээр УИХ дээр
цаашлаад хуульд нэмэлт оруулах ажлын
хэсгийн хуралдаан дээр гацчихаад байгаа юм.

Өнгөн дээрээ хэдэн зүйл заалтыг сольж холиод, үг,
утга санааг нь өөрчлөөд байгаа мэт боловч, өмнө нь өргөн баригдсан хуулиас огт
өөрчлөгдөөгүй байна гэдгийг Ерөнхийлөгчийн зөвлөхөөс гадна, УИХ-ын зарим гишүүд
үзэж байгаа юм.

Энгийнээр авлига, албан тушаалын хэрэгт
буруутгагдаад байгаа 100 гаруй хүнийг ямар нэг аргаар өршөөлд хамруулах гээд
байна гэж харагдаж байна.

Хэрвээ хууль
ямар ч өөрчлөлтгүйгээр дахин өргөн баригдвал Ерөнхийлөгч ч мөн адил дахин хориг
тавих нөхцөл байдал үүсчээ. Учир нь Өршөөлийн хуулийн Ажлын хэсэг
Ерөнхийлөгчийн хоригийг илт гуйвуулж, Үндсэн хууль, Дэгийн хуулийг зөрчсөн
төслийг боловсруулж батлуулахаар Хууль зүйн байнгын хорооны хуралдаанд оруулж
ирсэн байна.

Энэ талаар
Ерөнхийлөгчийн зөвлөх Ч .Өнөрбаяр \”Ерөнхийлөгчийн хоригт нэмэлт өөрчлөлтийг
хэрхэн хийх талаар маш ойлгомжтой тодорхой байгаа. Гэтэл байнгын хороонд оруулж ирсэн ажлын хэсгийн санал нь энэ хоригийг илтэд
гуйвуулсан буюу хоригийг хүлээж аваагүйтэй адил агуулгатай санал оруулаад
ирчихэж байна. УИХ-ын гишүүд нэгэнт хүлээгээд
авчихсан хоригоо ийм мушгин гуйвуулсан байдлаар нь арай ч батлахгүй байх гэж
найдаж байна” гэжээ.

Мөн УИХ дахь МАН-ын бүлгийн Ажлын албаны
хуулийн зөвлөх Б.Энхбаяр \”Хориг
хүлээн авагдсан. Хориг хүлээн авагдсантай холбоотойгоор нэмэлт, өөрчлөлт
оруулах ажлын хэсгийг Байнгын хорооноос томилсон. Ажлын хэсгийнхний оруулж ирж байгаа санал нь үндсэндээ Өршөөлийн
хуулийн анхны хувилбар буюу хориг тавигдахаас өмнө ямар байсан яг тэр байдлаар
нь буцаагаад хуулийг батлах санал оруулж ирсэн байгаа. Өөрөөр хэлбэл
тав, нэг гэсэн тоог текстээр бичээд оруулж ирж байгаагаас өөрцгүй юм.
Үндсэндээ Ерөнхийлөгчийн хориг тавьсан хуулийн агуулга нь яг тэр чигээрээ, ахиж
батлах гэж байна.Хуулийн зүйл заалт, тухайн хэргүүд
дээр тухайлсан санал хураалт явагдахгүй.Үүнийг ашиглан асуудлыг шийдэх, хоригт тусгагдсан хэргүүдийг өршөөх гэсэн санаархлыг хийж байна.Сая хоригийг хүлээн авахад УИХ-ын
чуулган дээр эсэргүүцсэн кноп дарсан зургаан гишүүн тэр ажлын хэсэгт орсон
байгаа. 11 гишүүнтэй ажлын хэсэг дотроо тэр зургаан гишүүн олонх болоод ийм
жонхуурсан байдал гаргаад байна”гэсэн тайлбарыг өглөө.

Амар