Монголбанкны Мөнгөний бодлогын хорооны 2020 оны анхны хурлаа хийж, дараах шийдвэрийг гаргаснаа онлайнаар танилцуулсан.
Бодлогын хүүг 1 нэгж хувиар бууруулж, 10 хувьд хүргэх
Банкны төгрөгийн заавал байлгах нөөцийн хувь хэмжээг 2 нэгж хувиар бууруулж, 8.5 хувьд тогтоох
Бодлогын хүүний коридорыг бодлогын хүүнээс +1, -1 нэгж хувийн өргөнтэй болгон өөрчлөх шийдвэрийг өчигдөр гаргасан билээ.
Уг шийдвэрийн талаар тус хорооны гишүүд дараах тайлбарыг хийв.
Монголбанкны тэргүүн дэд ерөнхийлөгч, Мөнгөний бодлогын хорооны гишүүн О.Эрдэмбилэг:
Шинэ коронавирусийн халдварын нөлөөллүүд улс орнуудад гараад эхэлсэн. Монгол Улсын тухайд гадаад хүчин зүйлүүдийн нөлөөгөөр эдийн засаг саарсан. Инфляц 5.6, Улдаанбаатарт 6 хувьтай гарсан.
Эдийн засаг цаашид ч саарахаар байна. Халдвар гадаад худалдаа, түүхий эдийн суваг болон тайлан балансын сувгаар дамжин нөлөөгөө үзүүлж байна.
МУИС-ийн Эдийн засгийн тэнхимийн профессор, Монголбанкны Мөнгөний бодлогын хорооны орон тооны бус гишүүн Ч.Хашчулуун:
Энэ удаагийн шийдвэрийн гол утга нь эдийн засгийн идэвхжлийг дэмжих зорилготой.
Сүүлийн саруудад эдийн засгийн байдал муудаж, өсөлт буурах төлөвтэй байсан тул идэвхжүүлэх, нөгөө талаас банкны системд байгаа төгрөгийн эх үүсвэрийн өртгийг бууруулж, зээлийн хүртээмжийг сайжруулахад чиглэсэн.
Ингэснээрээ Монголбанкны зүгээс хүндрэлтэй байдлаас гарахын тулд авч байгаа шийдэмгий арга хэмжээ болсон гэж үзэж байна.
УИХ-ын даргын эдийн засгийн зөвлөх, Монголбанкны Мөнгөний бодлогын хорооны орон тооны бус гишүүн Ц.Мөнхбаяр:
Энэ удаагийн шийдвэр нь зөвхөн бодлогын хүүг бууруулах тухай биш, цогц арга хэмжээ юм. Мөнгөний бодлогын нөлөөллийг сайжруулах богино, дунд хугацаанд үйлчлэлийг илүү сайжруулах, гарч ирсэн гэнэтийн шокийг давах арга хэмжээ гэж ойлгож болно.
Ялангуяа, бодлогын хүүний коридорыг нарийсгасан нь банкуудын төлбөрийн чадварыг сайжруулах, эх үүсвэрийн өртгийг бууруулах зорилготой. Энэ нь бусад шийдвэртэйгээ нийлээд бодлогын үр нөлөөг сайжруулах юм.
СЭЗИС-ийн экономиксийн тэнхимийн профессор, Мөнгөний бодлогын хорооны орон тооны бус гишүүн Ц.Батсүх:
Гадаад, дотоодын нөхцөл байдлаас шалтгаалсан эдийн засгийн агшилттай энэ үед эрэлтийн талын инфляцын дарамтын хувьд харьцангуй багасаж байгаа. Ийм үед эдийн засгийн идэвхжлийг сайжруулах зорилгоор бодлогын хүүг бууруулсан бол банкуудын хөрвөх чадварыг эрсдлээс сэргийлэх зайлшгүй байлгах нөөцийг тодорхой хувиар бууруулж, пассивын долларжилт дээр тодорхой хэмжээгээр анхаарч, төгрөгийн заавал байлгах нөөцийг хоёр хувиар бууруулсан шийдвэр гаргалаа гэв.
