Хятад улс титэм вирусын халдварын өмнө хоногт 25 сая амны хаалт үйлдвэрлэх хүчин чадалтай байсан юм. Гэтэл өдгөө өдөрт 800 сая ширхэгийг үйлдвэрлэхээр болж өсчээ.
Одоо Хятадад 3000 гаруй томоохон маск үйлдвэрлэгчид хоногийн 24 цаг тасралтгүй ажиллаж байна. Амны хаалт үйлдвэрлэгч аж ахуйн нэгжийн тоо өдөрт 189-өөр нэмэгдэж байгаагийн дотор онгоц машины сэлбэг үйлдвэрлэглэгчид ч хүртэл байгаа ажээ. Дээр нь бас амьсгалын аппаратны үйлдвэрлэл рүү томоохон компаниуд хошуураад эхлэлээ.
Түүнийг тээвэрлэн хүргэх гол хэрэгсэл нь нисэх онгоц, тэр дундаа зорчигч тээврийн онгоцнууд байгаа тухай Си Си Тв-гийн мэдээгээр та бүхэн ч гэсэн харсан байх аа. Зорчигчийн суудал дээр хайрцагтай маск жирийтэл өрсөн харагдана лээ.
Би бараг ийм боломж байгаа тухай бараг нэг сарын өмнө бичиж байсан. Гэтэл өөдөөс нэгэн мэргэн ухаантан “Түүнийг зөөвөрлөх хэрэгсэл манайд байхгүй. Оросоос л Ан ачааны том оврын онгоц түрээслэдэггүй л юм бол…..” гэсэн байхаар нь “Тийм юм байлгүй” гээд амаа хамхисан даа.
Манайд маск үйлдвэрлэчихээр чадварлаг оёдолчид, компаниуд зөндөө байгаа. Бас түүнийг дэлхийн аль ч өнцөг буланд хүргэх боломжтой өндөр түрээстэй нисэх онгоцууд сул зогсож байна. Дарга нар маань хөшөө, усан оргилуур, дүүжин зам, тэрбум шахам долларын өртөгтэй 13 км гүүрэн зам зэргийг яриад байхыг бодоход мөнгө хөрөнгө ч чамгүй их байдаг бололтой. Харин энэ бүхнийг зохион байгуулаад зүглүүлж чиглүүлээд өгөх ухаалаг толгой, удирдагчид л манайд үгүй юм даа. Хүний хүүхдүүдийн хөдлөж байгааг харахад заримдаа хөнгөн атаархал төрөх юм.
Хямрал нөгөө талдаа энэ мэт маш их том боломжууд буй болгож байдаг гэдгийг санах ухааныг Бурхан минь манай дээдэст хайрлаасай билээ.
Аж ахуй эрхлэгчид минь хятадад маскны үйлдвэрлэлийн автомат шугам харьцангуй хямд төсөр байгаа. Заавал төр засгийн амыг, гарыг харалгүй зохион байгуулалтанд ороод өөрсдөө нэлээд удаан хугацаанд оршсоор байж мэдэх алтан уулнаас өөрцгүй маскны үйлдвэрлэл рүү яагаад орж болдоггүй байх билээ? Түүний зүрх болсон шүүгч нэхээсгүй даавууны үйлдвэрлэл өмнөд хөршид тэр дундаа Бээжин хотод олноороо ашиглалтанд орж байна. Тэгээд үйлдвэрлэн гаргасан бүтээгдхүүнээ МИАТ-тайгаа ярьж байгаад дэлхийн өнцөг буланд хүргэх боломж байж болох биш үү?
