Улсын их хурлаас өчигдөр Цар тахлын үед санхүү, эдийн засгийн тогтвортой байдлыг хангах, эрсдэлээс урьдчилан сэргийлэх, тэмцэх тухай хуулийн төслийг баталсан. Тус хуулийн эдийн засгийн хүндрэлээс гарах, Монголбанкны шийдвэр журмаар хэрэгжүүлэх боломжтой заалтууд хэрэгжих боломжтой эсэх талаар Монголбанкны Нөөцийн удирдлага, санхүүгийн зах зээлийн газрын захирал А.Энхжин мэдээлэл өглөө.
Тэрээр “Өчигдөр Улсын их хурлаас баталсан Цар тахлын үед эрсдэл үүсэхээс сэргийлэх, хууль болон тогтоолын төсөлд гадаад валютын нөөцийг нэмэгдүүлэх зорилгоор алт олборлолтыг дэмжье, Монголбанкны алтны хэмжээг нэмэгдүүлэх тухай заалт орсон. Уг заалтыг хэрэгжүүлэхээр Монголбанк Уул уурхай, хөнгөн үйлдвэрийн яамтай хэд хэдэн удаа санал солилцож, арилжааны банкуудтай ярилцаж байна. Монголбанкнаас иргэд, ААН-ээс алтыг нь худалдаж авдаг бөгөөд төлбөрийн тодорхой хэсгийг арилжааны банкуудад олгож, арилжааны банкууд Монголбанкнаас авсан хэсгийг алт олборлогч аж, ахуй нэгжүүдэд хөнгөлөлттэй санхүүжилт хэлбэрээр олгох бүтцээр ажиллах юм. Үүнийг хэрэгжүүлэхийн тулд холбогдох журмыг гаргах шаардлагатай. Өнөөдрийн байдлаар Монголбанк нийт 6.7 тонн үнэт металлыг иргэд, ААН-ээс худалдаж авсан байна. Энэ нь өнгөрсөн оны мөн үетэй харьцуулахад гурав дахин нэмэгдсэн үзүүлэлт. Цар тахлын үед зарим бүтээгдэхүүний экспорт буурч, эдийн засагт хүндрэл үүсэж байгаа энэ үед гадаад валютын нөөцийг нэмэгдүүлэх нэг арга бол алтны хэмжээг нэмэгдүүлэх. Алтны үнэ он гарснаас хойш дэлхийн зах зээл дээр эрс нэмэгдэж байгаа. Цаашид ч нэмэгдэх төлөвтэй байгаа учир дотоодын алт олборлолтыг нэмэгдүүлэхэд Монголбанк дэмжиж ажиллана. УИХ-аас өчигдөр баталсан тогтоомжийн бас нэг чухал хэсэг нь иппотекийн хөтөлбөртэй холбоотой заалтууд.
Нэгд. Цар тахалтай тэмцэх ажилд гардан оролцож буй төрийн албан хаагчдад онцгой нөхцөлтэй орон сууцны хөтөлбөр хэрэгжүүлэх. Энэ дагуу Нийслэлийн орон сууцны корпораци, Монголбанктай хамтарч байраа түрээслээд өмчлөх хэлбэрээр олгох юм. НОСК түрээслээд өмчлөх хэлбэрээр орж ирсэн мөнгөн урсгалыг ашиглан хөрөнгөөр баталгаажсан үнэт цаас гаргах бөгөөд тэрхүү үнэт цаасыг Сангийн яам тодорхой хүүний татаас үзүүлэх чиглэлээр үнэт цаасыг зах зээл дээр борлуулах боломжийг бүрдүүлэхээр ажиллах юм. Хэрэв зах зээл дээр үнэт цаас гарч ирвэл Монголбанкнаас хуулийн хүрээнд хөрвөх чадварыг дэмжих боломжтой гэж үзэж байна.
Хоёрт, Иппотекийн хөтөлбөрийг Монголбанкнаас дахин санхүүжүүлэх. Монголбанк 2017 оноос хойш иппотекийн санхүүжилтийн үндсэн төлбөрийн эргэн төлөлтийн хэмжээгээр орон сууцны санхүүжилтийг олгож ирсэн билээ. Энэ зарчмаар санхүүжилтийг сэргээх боломжтой. Бидний тооцоолж байгаагаар он дуустал сард 16-20 тэрбум төгрөгийн санхүүжилтийг арилжааны банкуудад олгох боломжтой гэсэн урьдчилсан төлөв гарсан. Үүнд тодорхойгүй байгаа нэг зүйл нь иппотекийн зээлийн үндсэн болон хүүгийн төлбөрийг зургаан сараар хойшлуулж байгаа. Тэгэхээр Монголбанканд орж ирэх үндсэн төлбөрийн эргэн төлөлтийн хэмжээ буурах учир үүнийг харгалзаж үзнэ.
Гуравт, Тавдугаар сарын 1-ээс өмнө эргэн төлөлт хийх хугацаагаа хойшлуулах тухай хүсэлт гаргаагүй иргэдэд хүүний хоёр нэгж хувьтай тэнцэх хэмжээний хүүний эргэн төлөх төлбөрийг улсаас буцааж олгох тухай тусгасан. Үүнийг Сангийн яамтай ярилцаж байж хэрэгжүүлнэ. Энэхүү саналыг хэрэгжүүлэхэд учирч болох бэрхшээл нь нийт 72 мянган зээлдэгч байгаа бөгөөд тэдгээрийн хэдэд нь энэхүү тусламж хүрэхийг гаргах том ажил хийгдэнэ. Гэхдээ зээлдэгчийн мэдээлэл банкинд байгаа учраас буцаан олгох боломжтой гэж харж байна” гэв.
