Зээлийн хүү буулгах сургаар арилжааны банкууд хөдөлгөөнд орж, эхнээсээ хүүгээ буулгаж, зарим буулгаж чадахгүй ч буулгах тухай яриа хэлэлцээрт идэвхтэй оролцож байгаа харагдлаа. Манайд ганц л шалтгаан бий. Тэр нь хадгаламжийн хүү өндөр учраас зээлийн хүүг буулгах боломжгүй болчихсон гэх шалтгаан юм. 10 мянган гаруй өндөр дүнтэй мөнгө хадгалуулдаг хүн манайд бий.
Үндсэндээ тэдэнд мөнгө хадгалуулсных нь төлөө өгдөг мөнгийг л зээлдэгч биднээс татаад байна гэсэн үг л дээ. Гэхдээ төрийн машин ажлаа эхэлсэн учраас хүссэн хүсээгүй зээлийн хүү буух нь ойлгомжтой бөгөөд цаг хугацааны л асуудал болоод байна. УИХ-аас томилогдсон ажлын хэсэг жаахан бүтэлгүй юм яриад байгаа ч хүү буух нь бууна гэж ярианаас нь ойлгогдсон.
Үүнийг ойлгож, ухамсарлаж байгаа зарим банкууд зээлийнхээ хүүг буулгаад эхэлжээ. Жишээ нь Төрийн банкны Орхон аймагт дахь салбар Эрдэнэт үйлдвэрийн ажилчдад сарын 1.2 хувийн хүүтэй цалин зээл санал болгож байна. Өнөөдрийн байдлаар арилжааны банкнаас гарч буй хамгийн бага зээлийн хүү л дээ. Гэхдээ бас ялгавартай. Зөвхөн Эрдэнэт үйлдвэрийн ажилчдад гэж онцолсон байгаа нь дургүй хүргэмээр.
Бусад нь хүн биш үү? Яг үнэндээ үйлдвэрт ажилладаг цалин нь тогтвортой/өндөр/ хүнд чиглэсэн зээл гэхээсээ бага дунд орлоготой иргэдэд бага хүүтэй зээл өгвөл илүү оновчтой биш үү. Мэдэхгүй юм даа, манай энэ зээлийн тогтолцоог! Нэр хүндтэй, баян улс төрчид жилийн 3 хувийн хүүтэй ЖДҮ авна. Өндөр орлоготой үйлдвэрийн ажилчид сарын хамгийн бага хүүтэй зээлийг авна.
Гэтэл яг тэр зээл хэрэгтэй байгаа хэсэг нь зээлийн шалгуур дээр далан булчирхайгаа тоочин байж хамгийн өндөр хүүтэй зээл авч байх жишээтэй… Ялгаварлан гадуурхал энд, банкны системд л хамгийн ихээр ажиглагдаж байна. Үүнийг тэгээд хэн хэзээ засч, сайжруулах вэ?
