Монгол улсын зөвлөх инженерүүдийн бүтээл амьдралд хэр тусдаг вэ

 

Монгол улсад салбарт бүрт л 5-7 зөвлөх инженер байдаг. Амьдралыг аль болох хөнгөвчлөх ажлыг инженерийн арга ухаанаар шийдвэрлэх учиртай мэргэжил. Салбар бүртээ тулгамдаад байгаа хүний хүч хөдөлмөр их орсон, эрсдэлтэй ажлуудыг хялбарчлах, шинжлэх ухааны үндэслэлд ойртуулах ажлыг сэтгэж хийж байх учиртай. Гэтэл үнэндээ Монгол улсад зөвлөх инженер гэдэг хүн юу хийдэг юм бэ. Иргэдийн амьдрал ахуйд хэрэгцээтэй зүйлийг Хятадууд илүү мэдрээд хийгээд байх шиг. Адаглаад л гараа норгохгүй, олон нийтийн газрын шал угаагчийг Хятадаас бөөндөн авч ирж байна.

Одоо утааны цаг эхлэж байна. Хүүхэд хөгшидгүй утаа гэж халагласаар байгаад өнгөрөөнө. Харин манай улсад зөвлөхүүд үүнийг шийдэх олигтойхон шийдэл гаргачихаж чадахгүй л байна. Хатуу түлш буюу нүүрсээр халж байгаа энэ олон айлуудад Монгол улсын зөвлөх инженерүүд \”олигтойхон” гаргалгаа гаргаагүй л байна. 200м2 амины орон сууцаа төрөөс нэг ч хадаасны дэмжлэггүй барьсан иргэдэд халуун дулааныг нь шийдээд өгч болдоггүй юм уу. Ийм байшиндаа л сард 400 000 төгрөгний тогоор халааж урд хөршид үйлдвэрлэсэн тень, насосыг авсаар л байна. Утааг багасгая, зөв гарц шийдлийг олоё гэж олон жил ярьж байгаа ч үнэндээ Монголчууд биднээс гаргасан гаргалгаа алга. Нэг инженер шинэ бүтээл хийжээ хэмээн мэдээллэж түүнийг нь сураглан үзэхэд нөгөө мөнгөний асуудлаас болоод гацсан, төлбөр бууруулахгүй, амьдрах орчинд сайжруулах зүйлгүй байгаа нь \”харамсалтай”.

Нөгөө талаас Монгол инженерийн хийсэн шинэ санаа санаачлагыг төрийн хэмжээнд дэмждэггүй, олон нийтэд хүртээл болгодоггүй, зориг хүсэл эрмэлзлэлийг нь бууруулж шат шатны дарамтаар \”хяхаж хавчаад өнгөрнө”. Уг нь хотыг тойрсон хэдхэн гэр хорооллын айлуудад жижиг дэд станцаар л асуудлыг шийдэх бүрэн боломжтой. Бид утаагүй болж утаанаас гарсан эрүүл мэндийн асуудлууд аажимдаа намжих байх. Үүнийг хийх хүсэл энэ төрд алга уу.
Утаагүй зуух, шахмал түлш, утааны дулааныг барьдаг яндан, тосол, зориулалтын насос гэх мэт олон олон шийдлийг ярьдаг ч үнэндээ энэ бүгд амьдралд тийм ч айхтар тусгалаа олсонгүйн жишээ нөгөө л утаа.

Инженерүүдийн шийдлийг аль ч нам засаг барьсан хүндэтгэн хүлээн авч хэрэглээнд нэвтрүүлдэг баймаар. Хэрэв инженер хийж чадаж гэмээ нь хэрэглээ болгохыг төр хариуцдаг баймаар санагдах юм. Төрийн дэмжлэггүйгээсээ болж муу хэлэгдээд байна уу үнэхээр юм хийж чадахгүй танил талаараа авсан ЗӨВЛӨХ инженер цол уу.

Инженерүүд нийлж байгаад тал бүрээс нь санаачилж инженерийн нарийн арга ухаанаар нэг том шийдэл олох хэрэгцээ манай ард түмний дунд хүлээлттэй л байна. Харин үнэхээр хийсэн зүйлийг нь төр засгийн зүгээс дэмжин олон улсад баталгаажуулж иргэдийн амьдрал ахуйд хэрэгцээг нь мэдэрмээр байна. Тэр намын үед хийсэн инженерийн шийдэл хэмээн дарахаа болих хэрэгтэй. Эсвэл энэ төрийн зөөлөн сэнтийд суух түшээдэг амьдрал ахуй хөнгөвчлөн шийдэгдэх шаардлага байхгүй байх шиг. Нэг үгээр нөгөө талаас нь мөнгө харагдаад байх шиг.

Б.Саран

Үндэстэн агентлаг