Монгол Улсын Хөгжлийн Банкнаас санхүүжүүлсэн төсөл, хөтөлбөрийн хэрэгжилтэд хяналт тавьж, шалгалт хийсэн талаарх холбогдох эрх бүхий байгууллагуудын тайлан, мэдээлэлтэй танилцах ерөнхий хяналтын сонсгол Төрийн ордонд үргэлжилж байна.
ДЦС-уудын зээлийг талаар УИХ-ын гишүүн Ц.Даваасүрэн байр сууриа илэрхийлсэн юм.
Тэрбээр “МИАТ төслийг буруутгахгүй байгаа. Монгол Улс далайд гарцгүй учраас энэ салбартаа хөрөнгө оруулах шаардлагатай. ДЦС-ууд ч ялгаагүй.
Станцуудын тухайд жил бүр эрчим хүч дулааны хэрэглээ 60-90 МВт, 500 ккал-аар өсдөг. Нэг шинэ гэр бүл бий болж, нэг шинэ компани байгуулагдахад л хэрэглээ өсөж байдаг. Энэ хэрэгцээг хаах гэж эрчим хүчний салбаруудад зээл өгсөн. Амгалангийн ДЦС байгаагүй бол өнөөдрийн шинэ барилга байгууламжууд ашиглалтад орохгүй байсан. ТЭЦ-3, 4 дээр нэмэлт өргөжүүлэлт хийсэн нь зөв. Ирэх жилээс шинэ барилга байгууламж ашиглалтад оруулахад хүнд болно. Оройн цагаар айлуудын тогийг тасалдаг болно. Яагаад гэвэл жил тутам өсөж байгаа хэрэглээг шинэ эх үүсвэрээр хаана. Хоёр жилийн хэрэглээг хаахын тулд ТЭЦ-3-ын хэмжээний станц барих ёстой. Гэтэл барихгүй байна.
ТЭЦ-4 дээр өнгөрсөн жил 4 генераторын чадлыг нэмж байж 90 МВт-ын хүчин чадал гаргасан. Түүний хүчинд өнгөрсөн болон энэ өвлийг давж байгаа. Гэтэл сүүлийн жил шинэ баригдсан зүйл байхгүй. Одоо цэнэг хуримтлуулах станц ашиглалтад орохоор 50 МВт-ын хэрэглээг хаах байх. Ирэх жил 30 МВт-ын дутагдалд орно. ОХУ-аас 340 МВт эрчим хүч авах боломжтой бол энэ жил 280 МВт-д хүрсэн. Цаана нь 75-хан МВт-ын нөөц байгаа. Ирэх өвлөөс бид эрчим хүч, дулааны хэрэглээг хааж чадахгүй.
Хөрөнгө оруулж чадахгүй байгаа болохоор эрчим хүчний салбарт шинэчлэлүүдийг хийсэн. Энэ бол зайлшгүй байсан.
Харин Эгийн голын УЦС, Тавантолгойн төслүүд дээр арай өндөр зардал гаргасан. Тэнд ажиллаж байгаа хүмүүс олон улсын төсөл дээр ажиллаж байгаа мэт цалин авдаг. Тэгээд 20, 30 тэрбумыг шийдчихсэн. Н.Алтанхуяг сайд хариулах байх. Тэр зээлүүд Хөгжлийн Банкан дээр байдаг. Төслийн нэгжийг зээлээр санхүүжүүлсэн анхны тохиолдол гарсан юм билээ. Тэд зээлээ эргэн төлөхөд төвөгтэй.
Станцууд зээлээ төлж чадахгүй байгаа нь үнийн асуудалтай холбоотой. Үнээ нэмэхээр дулаан, эрчим хүчний үнэ өснө. Хэрэглэгчдэд очиж төлөгдөх хэрэгтэй болно. Хэрэглэгчдэд тохохгүй байя гэвэл улсын төсвөөс төлөх болно” гэлээ.
