Орхон аймгийн Засаг дарга С.Батжаргал төр, хувийн хэвшлийн бүхий л байгууллагад хандаж хөгжлийн бэрхшээлтэй иргэндээ ээлтэй орчин бүрдүүлэх тэднийг дэмжсэн арга хэмжээ зохион байгуулах А/228 тоот захирамжыг өнгөрсөн сард гаргажээ.
Захирамжын гол агуулга нь төр, хувийн хэвшил, худалдааны байгууллагууд гаднах орчноосоо эхлээд хөгжлийн бэрхшээлтэй иргэнд ээлтэй орчныг бүрдүүлэх, тэднийг тохирсон ажлын байраар хангах, бүхий л байгууллага тэргүүн ээлжинд хөгжлийн бэрхшээлтэй иргэнд үйлчилдэг байх, боловсрол,эрүүл мэндийн үйлчилгээнээс ангид хөгжлийн бэрхшээлтэй хүн, хүүхэд үлдээхгүй байх аж.
Орхон аймагт нийт 4648 хөгжлийн бэрхшээлтэй иргэн амьдарч байгаа нь нийт хүн амын 4.3 хувийг эзэлдэг байна.
Хөгжлийн бэрхшээлтэй хүний эрхийн тухай хууль болон бусад холбогдох хууль тогтоомж, дүрэм, журам, бодлогын баримт бичгүүдийн хэрэгжилтийг хангуулж, аймгийн Засаг даргын 2020-2024 онд хэрэгжүүлэх үйл ажиллагааны хөтөлбөрт 6 ажил үйлчилгээг тусган хэрэгжүүлж буй.
Тухайлбал, орон нутгийн санхүүжилтээр хөгжлийн бэрхшээлтэй иргэдээ дэмжсэн, тэднийг ойлгосон, нийгэмд оролцох оролцоог нь хангасан хэд хэдэн төслийг хэрэгжүүлснээр тодорхой үр дүнд хүрч байгаа аж.
Тэдгээрээс онцолбол, “Хувийн туслах” үйлчилгээ төслийн үр дүнд бие даан амьдрах чадваргүй иргэд нийгмийн харилцаанд оролцох болжээ.
Мөн хөгжлийн бэрхшээлтэй хүүхдүүдийг боловсролд тэгш хамруулах “Тэгш боломж” төслийн хүрээнд өнгөрсөн онд I,VII, XX сургууль дээр “Хүүхдийн хөгжлийг дэмжих” төвийг байгуулсан бол XХVII цэцэрлэг дээр хөгжлийн бэрхшээлтэй хүүхдийн хоёр бүлгийг нээсэн байна.
Гэсэн хэдий ч цаашид хөгжлийн бэрхшээлтэй иргэдийн хөдөлмөр эрхлэлтийг дэмжих, тохируулгат ажлын байраар хангах, эрт илрүүлэг, урьдчилан сэргийлэлтэд анхаарах, сэргээн засах үйлчилгээний хүртээмжийг нэмэгдүүлэх, барилга байгууламжид стандартын хэрэгжилтийг хангахад бүх шатны байгууллагуудын оролцоо чухал байгаа учир Засаг дарга С.Батжаргал А/228 тоот захирамжыг гаргажээ.
Захирамжид холбогдох хуулийн заалтуудыг үндэслэн дараах таван арга хэмжээг авч хэрэгжүүлэхээр тусгасан байна.
- Нэгдүгээрт, хөгжлийн бэрхшээлтэй хүнд саадгүй дэд бүтэц, нийтийн тээвэр, мэдээллийн хүртээмжийг бий болгох, нэмэгдүүлэх, барилга байгууламж төлөвлөх, барьж байгуулах хүлээн авахдаа “Иргэний барилга, төлөвлөлтөд хөгжлийн бэрхшээлтэй хүний шаардлагыг тооцсон орон зай орчин, үндсэн шаардлага “MNS 6055:2009”, Явган хүний зам талбай төлөвлөлт, техникийн шаардлага “MNS 6808:2019” стандартуудыг хангуулах,
- Хоёрдугаарт, Хөдөлмөрийн тухай хуулийн 144 дүгээр зүйл заалтыг хэрэгжүүлж, хөгжлийн бэрхшээлтэй хүний хэрэгцээ шаардлагад үндэслэн мэргэжил, мэргэшил, ур чадварт тохирсон ажлын байраар хангах,
- Гуравдугаарт, Хөгжлийн бэрхшээлтэй хүнд үзүүлэх, эмнэлгийн тусламж үйлчилгээний чанар, хүртээмжийг нэмэгдүүлэх, сайжруулах, хүүхдийн хөгжлийн бэрхшээлийг эрт илрүүлэх, оношлох, үнэлэх, урьдчилан сэргийлэх, эмлэх чиглэлээр тодорхой арга хэмжээ авч хэрэгжүүлэх,
- Дөрөвдүгээрт, Хөгжлийн бэрхшээлтэй хүүхдийг бүх шатны боловсролд тэгш хамруулах, тэдний тусгай хэрэгцээнд нийцсэн сургалтын орчин, нөхцлийг бүрдүүлэх, стандартын хэрэгжилтийг хангуулах,
- Тавдугаарт, Байгууллага бүр хөгжлийн бэрхшээлтэй хүнд тэргүүн ээлжинд үйлчилгээг үзүүлэх, барилга, налуу зам, хаалга, шат, ариун цэвэр, эрүүл ахуйн ззориулатттай өрөө зэргийг стандартад нийцүүлж бий болгоход санал, санаачилга гарган хэрэгжүүлж ажиллахыг аймгийн хэмжээнд үйл ажиллагаа явуулж буй төрийн болон төсөвт, орон нутгийн өмчит, хувийн хэвшлийн нийт байгууллагууда үүрэг болгож, холбогдох албан тушаалтнуудад захирамжийн хэрэгжилтэд хяналт тавьж, анхаархыг үүрэг болгосон билээ.
Төр, хувийн хэвшлийн байгууллагууд дээрх асуудалд анхаарч, хамтын хүчээр шийдвэрлэж чадвал хөгжлийн бэрхшээлтэй иргэндээ ээлтэй орчныг бүрдүүлж чадна гэж үзэж байна.
