/МОНЦАМЭ/. 1923 онд Сайн ноён хан аймгийн суурин дээр Цэцэрлэгмандал уулын аймгийг байгуулж, хожим нь 19 сумтай Архангай аймаг болгосон түүхтэй. Ийнхүү Архангай аймаг байгуулагдаад 100 жилийг ардаа үдэж, шинэ 100 жилтэйгээ золгож байна.
Тус аймаг үүсэн байгуулагдсаны түүхт 100 жилийн ойн баяр наадмын нээлт АРА цогцолборт боллоо.
2023 оныг Архангайчууд хөгжил дэвшил, бүтээн байгуулалтын жил болно гэж үзэж байна.
Тус аймгийн хувьд хүн амын тоо нь 94 мянга даваад байна. Энэ нь сүүлийн 10 жилийн хугацаанд өндөр өсөлттэй байна гэсэн үзүүлэлт юм. Цаашид тус аймаг хөгжлөө хэрхэн тодорхойлж байна вэ гэвэл “Нээлттэй Архангай” хөтөлбөрийг 2024 он хүртэл хэрэгжүүлэхээр төлөвлөжээ. Энэхүү хөтөлбөрийн хүрээнд мал аж ахуй, байгальд ээлтэй аялал жуулчлалын салбарыг хөгжүүлэх, үүгээр дамжуулан ажлын байрыг нэмэгдүүлэх, хүн амаа өсгөх гэсэн бодлогуудыг дэвшүүлсэн байна.
Архангай аймгийн хувьд байгалийн үзэсгэлэнт газрууд, биет болон биет бус өв соёлын өвүүдэд суурилсан аялал жуулчлалыг хөгжүүлэх, байгальд ээлтэй олон талт эдийн засгийг бий болгох томоохон зорилт тавьжээ.
Архангай аймгийн хүн амын дийлэнх хувийг залуучууд эзэлдэг
Хөдөлмөрийн идэвх 2022 оны байдлаар 75 хувьтай үнэлэгджээ. Цаашид ажлын байруудыг шинээр бий болгох, шилжин суурьшиж буй залуучуудыг дэмжих бодлогод түлхүү анхаарал хандуулахаар болжээ.
Архангай аймаг хүний хөгжлийг дэмжихэд анхаарч ажиллана
2023 онд Архангай аймагт 300 ортой Эрүүл мэндийн төв баригдахын зэрэгцээ боловсрхол, соёл, хүний хөгжийг дэмжсэн олон шинэ бүтээн байгуулалтууд хийгдэх аж. Энэ хүрээнд нэн тэргүүнд хүний хөгжлийн асуудал тавигдаж байна. Түүхэн 100 жилийн ойн хүрээнд дан ганц баяр наадам тэмдэглээд өнгөрөх бус, нийтэд хэрэгтэй олон ажлыг хийж байгааг баярын хурлын үеэр тус аймгийн Засаг дарга Б.Цэрэннадмид онцолж байсан юм.
Тодруулга: Архангай аймаг далайн төвшнөөс дээш дунджаар 2414 метр. Хамгийн өндөр цэг нь 3539 метр өндөр Харлагтайн сарьдаг уул. Хамгийн нам дор цэг нь 1290 метр өндөр Орхон Тамирын бэлчир юм. Хойд талаараа Хөвсгөл аймагтай, зүүн талаараа Булган аймагтай, өмнө талаараа Өвөрхангай аймагтай, баруун хойд талаараа Завхан аймагтай тус тус хиллэдэг.
Дийлэнхдээ ойт хээр, тал хээр нутагтай, баруун урдуур нь Хангайн нуруу, баруун хойгуур нь түүний салбар болох Тарвагатайн нуруу оршдог ба зүүн болон төв хэсгээр тэдгээрээс эх авсан Орхон, Хануй, Тамир, Чулуут зэрэг томоохон голууд урсдаг. Энэ нутаг нь жуулчлалын нэгэн чухал газар бөгөөд Өгий, Тэрхийн цагаан зэрэг нуур болон Хорго, Тайхар чулуу зэрэг галт уулархаг тогтцоороо олны анхаарлыг татдаг. Хамгийн өндөр цэг нь Хангайн нурууны Харлагтайн сарьдаг /3539 метр/ ба хамгийн нам цэг нь Орхон-Тамирын бэлчир /1290 метр/ юм.
