Эрчим хүчний салбарын хэмжээнд өвөлжилтийн бэлтгэл ажил 84 хувьтай байна.
Нийслэлийн хэмжээнд өвөлжилтийн бэлтгэл ажил 95 хувьтай байгааг Нийслэлийн Засаг даргын тамгын газар мэдээллээ. Харин нийслэлийн Нийтийн тээврийн газрын өвөлжилтийн бэлтгэл 80 хувь, Геодези, усны барилга, байгууламжийн газрынх 84 хувийн биелэлттэй байгаа юм байна.
Жилд орох хур тунадасны хэмжээ их, давтамж олон, нийтийн эзэмшлийн зам талбайгаа гялгар хавтангаар бүрдэг гэх мэт асуудлаас болж Улаанбаатар хотын хувьд цас оронгуут л халтиргаа гулгаа үүсдэг. Тиймээс өвөлжилтийн бэлтгэл хангах хүрээнд энэ онд 5504 тонн давс, 7258 тонн буюу өнгөрсөн жилийнхээс хоёр дахин их бодис нөөцлөхөөр төлөвлөж байгаа аж. Одоогийн байдлаар 2759 тонн бодис, 4145 тонн давс нөөцөлжээ. Ойрын хугацаанд 1300 тонн бодис орж ирэх юм байна.
Энэ онд 5504 тонн давс, 7258 тонн буюу өнгөрсөн жилийнхээс хоёр дахин их бодис нөөцлөхөөр төлөвлөжээ.
Харин эрчим хүчний салбарын хэмжээнд өвөлжилтийн бэлтгэл ажил өнөөдрийн байдлаар 84 хувьтай байгааг Эрчим хүчний яам мэдээлэв. Өвөлжилтийн бэлтгэл ажлуудыг эрчимжүүлж, өвлийн оргил ачаалал эхлэхээс өмнө буюу ирэх сарын нэгний өдөр гэхэд засварын ажлуудыг дуусгах зорилттой байгаа аж. 2023-2024 оны өвлийн оргил ачаалал 1567 мегаватт хүрэхээр байгааг Эрчим хүчний яам тооцоолсон байна.
Энэ өвөл төвийн эрчим хүчний нэгдсэн системийн эх үүсвэрүүд бүрэн чадлаараа ажиллана. Тиймээс аль нэг тоноглолд гэмтэл, саатал гарсан тохиолдолд цахилгаан эрчим хүчээр хязгаарлах нөхцөл байдал үүснэ гэдгийг салбарын яам онцоллоо.
2023-2024 оны өвлийн их ачааллыг давахын тулд Нийслэлийн Агаар, орчны бохирдолтой тэмцэх газар, “Тавантолгой түлш” ХХК хамтран 120 мянган тонн сайжруулсан шахмал түлш нөөцлөөд байгаа аж. Энэ нь Улаанбаатар хотын 45 хоногийн хэрэглээний нөөц гэсэн үг юм. Нийслэлийн 200 мянга гаруй айл, өрх жилд дунджаар 600 гаруй мянган тонн шахмал түлш хэрэглэдэг тооцоо байдаг.
Хөдөө аж ахуйн салбарын хувьд энэ онд улсын хэмжээнд 18.1 сая толгой төл хүлээн авч, 5.1 сая толгой малыг дотоодын хэрэгцээнд, 12.1 сая малыг эдийн засгийн эргэлтэд оруулан 62.8 сая толгой мал өвөлжиж, хаваржих урьдчилсан дүн мэдээтэй байна.
Аравдугаар сарын эхний байдлаар 525 мянган тонн хадлан бэлтгээд байгааг Үндэсний Статистикийн хороо мэдээллээ. Түүнчлэн аймаг, сумын аюулгүй нөөцөд нийт 21.5 мянган тонн өвс, 12.6 мянган тонн тэжээл бэлтгэхээс одоогийн байдлаар 5354 тонн өвс, 1548 тонн тэжээл бэлтгэжээ. Харин улсын хэмжээнд малчдын түвшинд 947.5 мянган тонн өвс, 341.0 тонн сүрэл, 11.2 мянган тонн ногоон тэжээл, 4.5 мянган тонн үйлдвэрийн тэжээл, 24.4 мянган тонн гар тэжээл, 1280.5 тонн дарш, 33.2 мянган давс хужир шүү бэлтгэн авч, малчдын түвшин өвс, тэжээлийн бэлтгэл 63.3 хувийн гүйцэтгэлтэй байгаа аж.
Малчдын түвшинд өвс, тэжээл бэлтгэх явц баруун бүсийн аймгуудад 82 хувь, төвийн бүсийн аймгуудад 60.7 хувь, говийн бүсийн аймгуудад 11.4 хувь, Зүүн бүсийн аймгуудад 68 хувийн гүйцэтгэлтэй байгааг ХХААХҮЯ онцоллоо.
Үүнээс гадна улсын хэмжээнд төмсний хураалт 76.4 хувь, хүнсний ногооны хураалт 70 хувьтай үргэлжилж байна. Өнгөрсөн долоо хоногийн байдлаар 102.6 мянган га-гаас 156 мянган тонн үр тариа, үүнээс 93.5 мянган га-гаас 141.5 мянган тонн улаан буудай, 13.9 мянган га-гаас 133.3 мянган тонн төмс, 9.5 мянган га-гаас 141.5 мянган тонн хүнсний ногоо хураан аваад байгаа аж.
