Жил бүрийн 2 дугаар сарын сүүлийн 10 хоногийг архидан согтуурахаас сэргийлэх 10 хоног болгон тэмдэглэдэг билээ.
Дэлхий дээр жил бүр 3 сая хүн архи согтууруулах ундааны хэтрүүлэн хэрэглээнээс болж нас барж байна. Энэ нь нийт нас баралтын 5.1 хувийг эзлэх ба 5 хүн тутмын 4 нь эрэгтэй хүн байна. Согтууруулах ундаа хэрэглэсэн үедээ бэртэж гэмтэх магадлал энгийн үеийнхээс 30 хувиар өндөр байдаг.
Архинд донтох эмгэгтэй хүний гэр бүл, төрөл садангийн хүмүүсийг давхар хамааралтай хүмүүс гэж үздэг. Архидалт бол гэр бүлийн өвчин юм. Архины хамааралтай хүнтэй хамт амьдарч байгаа хүмүүсийн сэтгэл зүй эрүүл байдлаа бүрэн хадгална гэж байдаггүй. Архичин хүний зан үйл архи уудаггүй хүний зан үйлээс ялгагдаж байдаг. Гэр бүлийн нэг гишүүн нь архи уудаг байхад гэр бүлийн доторх харилцаа эвдэрдэг. Уг донтсон хүнийг эмгэгээс нь холдуулахыг хичээж тэмцэж байгаа гэр бүлийг давхар хамааралд байгаа гэж үзнэ.
Архины хамааралд орсон хүнд илрэх шинж тэмдгүүд:
- Уур уцаартай болох
- Гэр бүлийн харилцаа муудах
- Согтууруулах ундааг бусад зүйлээс эхэнд тавих
- Төлөвлөснөөс илүү их уух
- Орон зайн баримжаа алдагдах
- Хэл ам ээдрэх
- Ой тогтоолт муудах
- Наснаасаа хөгшин харагдах
Архи, согтууруулах ундааны ам дамжсан төөрөгдөл:
- Жирэмсэн үед бага зэргийг уухад гэмгүй
- Хоол идэх дуршлыг нэмэгдүүлдэг
- Цусны даралтын бууруулдаг
- Ажлын чадавхийг дээшлүүлдэг
- Уур бухимдлыг тайлдаг
- Үнэтэй архи хор багатай байдаг
- Дулаацуулдаг
- Ханиад томууг эмчилдэг
- Ходоодны өвчин эдгээдэг
- Шар айраг согтууруулах ундаа биш
- Архи уудаггүй хүнд итгэж болохгүй
Эх сурвалж: Нийгмийн эрүүл мэндийн үндэсний төв
