Нарнаас саяхан цацагдсан плазмын урсгал Дэлхийг дайрсны дараа дөрөвдүгээр түвшний хүчтэй соронзон шуурга эхэлсэн тухай Оросын ШУА-ийн Сансрын судалгааны хүрээлэнгийн Нарны одон орон судлалын лабораториос мэдээлжээ.
“Плазмын үүлний зах хэсэг Дэлхийд хүрч 10 цаг болсны дараа ч Дэлхий плазмын урсгалын нөлөөнд автсан хэвээр байв. Дэлхийг хүрээлж буй сансрын хийн үзүүлэлтүүд Москвагийн цагаар 01:30 цаг орчмын үед огцом өссөн бөгөөд өглөөний 4:30 цагийн орчимд хамгийн хүчтэй өөрчлөлт гарсан. Энэ мөчид соронзон хэмжигчид 3.66 түвшний соронзон шуурга (таван шатлалаар дөрөв дэх түвшин) эхэлж байгааг бүртгэсэн” гэж тус лабораториос мэдээлжээ.
Одоогоор соронзон шуурга үргэлжилж байгаа боловч плазмын урсгал Дэлхийг дайраад өнгөрсөн тул удаан үргэлжлэхгүй байна. Соронзон шуурганы нөлөөгөөр Канад болон АНУ-ын хойд нутагт туйлын туяа ажиглагдаж байгаа ажээ.
Яагаад хүмүүсийн бие тавгүйрхдэг вэ?
Цаг агаарт мэдрэг байх, цаг агаараас хамааралтай байх гэсэн онош өвчний олон улсын ангилалд байдаггүй.
Дэлхийн олон оронд соронзон шуурга толгой, үе мөчний зэрэг өвчинд нөлөөлдөг эсэхийг тогтоохоор янз бүрийн судалгаа явуулж байжээ. Судалгаагаар шалтгаан, үр дагаврын шууд холбоо хамаарлыг илрүүлээгүй байна.
Ийм төрлийн үнэн бодит судалгаа явуулахад туйлын хүнд гэж шинжээчид онцолжээ.
Учир нь энгийн нөхцөлд хүмүүст маш олон тооны янз бүрийн хүчин зүйлс нөлөөлж байдаг. Бодит үнэлгээ хийхийн тулд судалгаа явуулахдаа нэг хэсэг сайн дурынхныг соронзон шуургатай орчинд, нөгөө хэсгийг ямар ч салхи, шуургагүй орчинд байлгах ёстой.
Гэтэл бидэнд өөр нэг дэлхий гэж байхгүй.
Гэхдээ соронзон шуурга хүний эрүүл мэндэд ноцтой хохирол учруулж чадахгүй гэсэн жинтэй баримт бий. Бидний бүх амьдралаа өнгөрүүлдэг дэлхийн байнгын гео соронзон орон дунджаар 20 мянган нанотесла хүчтэй байдаг. Соронзон шуурганы үеэр соронзон орны хэлбэлзэл дунджаар олон зуун нТл-д хүрдэг. Өөрөөр хэлбэл соронзон орон хэдхэн долиор өөрчлөгддөг байна.
Тэгвэл яагаад наран дээр тэсрэлт болсонтой зэрэгцэн хүмүүсийн бие тавгүйрхдэг вэ? Мэргэжилтнүүд энэ нь хоёр шалтгаантай гэж үзэж байна.
Юуны өмнө хүмүүст хүчтэй соронзон шуурга болох тухай мэдсэн даруйд нь сөрөг хүлээлт үүсдэг байна. Үүнийг “ноцебо нөлөө” буюу сэтгэл зүй болон мэдрэлийн тогтолцоо ямар ч учир шалтгаангүй сөрөг хариу үйлдэл хийхийг хэлдэг. Өөрөөр хэлбэл сэтгэл зүй, мэдрэлийн тогтолцоо өөрөө өөртөө сөрөг итгэл үнэмшил төрүүлснээр биеийн байдал бодитоор тавгүйрхдэг байна.
Нөгөө талаар, зарим хүний бие организм архаг өвчин, хүчтэй стресс, өндөр насны улмаас ихээхэн суларсан байдаг. Ингэснээр хүрээлэн буй орчинтой дасан зохицох тогтолцоо нь ноцтой гэмтсэн байдаг. Энэ тохиолдог хүрээн буй орчин, тэр дундаа агаарын даралт, температур, чийгшилд хүртэл бага зэрэг өөрчлөлт гарахад бие нь тавгүйрхэх тохиолдол бий. Магадгүй соронзон шуурганы үед соронзон оронд гарч буй туйлын бага өөрчлөлтүүд гэхээсээ илүү үүнээс үүдэлтэй ямар нэгэн өөрчлөлтүүд гардаг байхыг үгүйсгэх аргагүй. Үнэндээ шинжлэх ухаан одоогоор үүнийг тайлаагүй байгааг шинжээчид хүлээн зөвшөөрчээ.
Өөрийгөө хэрхэн хамгаалах вэ?
Соронзон шуурганы бодит эсвэл хуурамч сөрөг нөлөөг бууруулахын тулд эрүүл мэнддээ анхаарах, хүрээлэн буй орчны өөрчлөлтөд дасан зохицох чадвараа дээшлүүлэхийг эмч нар зөвлөж байна. Эрүүл хооллолт, сайн унтаж амрах тустай.
Түүнчлэн, илүүдэл жингээ хаяхыг эмч нар зөвлөжээ. Учир нь илүүдэл өөх архаг үрэвсэл сэдрэх эрсдэлийг нэмэгдүүлдгээс гадна бие организмын дасан зохицох чадварыг бууруулдаг байна.
