Наадамчдын гудамж буюу Яармагийн “Номин” дэлгүүрээс Эрчим хүчний гудамжны “ТЭЦ-IV”-ийн замтай холбосон зургаан эгнээ бүхий хоёр урсгалтай зам, гүүрэн байгууламжийн зорчих хөдөлгөөнийг нээлээ.
Гэхдээ явган хүний зам, дугуйн зам, гэрэлтүүлгийн ажлыг энэ онд багтаан дуусгах юм байна. Тус зам, гүүрэн байгууламж нь Яармагийн авто замаас “ТЭЦ-IV”-ийн авто зам хүртэл 2.84 км урттай. Замын Туул гол дээгүүрх гүүрний хэсэгт хоёр талдаа амрах сүүдрэвчтэй, чулуун хашлагатай бөгөөд зорчих хөдөлгөөн гэрэл дохиогоор зохицуулагдана.
2022 онд тус гүүрний бүтээн байгуулалт, 2023 оны наймдугаар сард авто замын ажил эхэлж байжээ.
Зам, гүүрэн байгууламжийг барихад 13 нэгж талбарыг чөлөөлөх, 37,000 шоо метр хөрс хуулалт, 350,000 шоо метр далангийн дүүргэлт, даланд хоёр үе даацын гео тор дэвсэх, 8,000 метр чулуун хашлага, 20,000 шоо метр буталсан чулуун суурь, гурван цэгт найман ширхэг 800мм-1,000мм голчтой дулааны шугамыг шинэчилж, нэвтрэх сувагт, 510 урт метр цэвэр усны шугамыг нэвтрэх сувагт оруулах ажлууд хийгдсэн байна.
Наадамчдын авто замыг Энхтайвны өргөн чөлөөтэй холбох гудамж замын эхний хэсэг нь өнөөдөр хөдөлгөөн нээж буй уг гүүрэн байгууламж, зам. Уг замыг “Хархорин” захын авто замтай холбох, ТЭЦ-IV-ийн замын төгсгөл буюу Гурвалжингийн гүүр, “Хөсөг трейд” рүү явдаг хөндлөн замыг дөрвөн эгнээ болгон өргөтгөх ажлыг дотоодын компаниуд үргэлжлүүлнэ. Тус авто зам Эрчим хүчний гудамжтай огтлолцох бөгөөд зургаан эгнээ асфальт бетон хучилттай 1.6 орчим км авто зам байхаар төлөвлөжээ. Одоогоор ТЭЗҮ-ийг боловсруулж дууссан, зам барилгын ажлыг эхлүүлэх бэлтгэл ажлыг хангаж байгаа аж. Харин тус замыг Хөшигийн хөндийн хурдны замтай холбох ажлыг Дэлхийн банкны санхүүжилтээр гүйцэтгэх бөгөөд төсөлд шалгарсан компани бүтээн байгуулалтын ажлыг хийнэ.
Яармагаас хотын төвийг чиглэж, оргил цагт 16,000 автомашин зорчдог байна. Наадамчдын авто замыг Энхтайвны өргөн чөлөөтэй холбох гудамж замын нэгдүгээр хэсэг, Геологийн төв лабораторийн төмөр замын нүхэн гарц, Наадамчдын авто замыг Энхтайвны өргөн чөлөөтэй холбох гудамж замын хоёрдугаар хэсэг, Яармагийн шинэ зам зэрэг гол замуудыг 2027 он хүртэл дөрвөн үе шаттай барих бөгөөд эдгээр төсөл хэрэгжсэнээр Яармаг орчмын суурьшлын бүсээс хотын төв рүү чиглэсэн тээврийн хэрэгслийн хөдөлгөөний ачаалал хоёр дахин багасах тооцоолол гарчээ.
