Эрдэмтэд Помпей хотын тансаг амьдралыг харуулах олдворуудыг хоёр жилийн турш судалжээ. Помпей эртний Ромын хот юм.
Байшингийн яг голд байрлуулсан ванн их том бөгөөд хотын хамгийн том ваннд тооцогдоно.
Археологичдын ахлах Доктор Габриэл Цухтригель “Энэ байшинг их баян хүн эзэмшдэг байжээ. Ванны өрөө нь яг л саун шиг. Энд халуун, бүлээн, хүйтэн устай гурван өөр өрөөний сацуу хувцас солих өрөө ч бий. Өрөөнүүдэд маш том гэрлийн бүрхүүлүүд байжээ. Олдворуудыг цэвэрлэх явцад хүмүүс эндээс нэг минутын өмнө л явсан мэт санагдсан” гэсэн байна.
Тэд гэрээс хоёр хүний араг яс олжээ. Тэдний нэг нь 35-50 настай, олон бөгж зүүсэн, зоос барьсан эмэгтэй хүн бол нөгөө нь 20 орчим насны эрэгтэй байжээ. Тэд жижиг өрөөнд орж, өөрсдийгөө хамгаалах гэж оролдсон ч галт уул дэлбэрсний дараа агаарын хэм өсөж, маш халуун болсны сацуу агаарт хий цацагдаж, хүмүүс галт уулын үнсэнд дарагдан үхжээ. Галт уулын гаралтай чулуулаг буюу үнс, чулуу, лав хотыг цунами шиг бүрхсэн байна.
Байшинд угаалгын өрөө, гал тогооны өрөөнүүд ч байжээ. Помпэйн нэрт улс төрч Аулус Рустиус энэ байшинг эзэмшиж байсан байж болзошгүй гэх таамаг ч гарсан байна. Учир нь тус хотод ийм ваннтай цөөн байшин байжээ. Хамгийн баян хүн л гэртээ ваннтай байсан аж. Ванны хажуугийн, хувцас солих өрөө нь час улаан ханатай, шалыг нь Ромын өнцөг булан бүрээс авчирсан, геометрийн хэлбэртэй гантиг чулуун мозаикаар чимжээ.
Зочид эхлээд халуун өрөөнд дараа нь бүлээн өрөө рүү орж, биедээ тос түрхүүлж, арьсаа үрүүлэн цэвэрлүүлсний дараа хүйтэн өрөөнд орно. Хамгийн сүүлд 20-30 хүний багтаамжтай ваннд орж, сэрүүцдэг байжээ.
Эртний Ромын усан сан буюу халуун усны газарт байрлах хамгийн хүйтэн усан өрөөг фригидариум гэдэг. Дулаан, халуун усны өрөөнөөс (тепидариум ба кальдариум) ялгаатай нь биеийг сэргээж, цусны эргэлтийг сайжруулах зорилготой хүйтэн усан сангуудтай. Эртний Ромчуудын халуун усны соёлд фригидариум чухал байр суурь эзэлдэг байжээ.
Хүйтэн өрөө улаан баганууд, тамирчдыг дүрсэлсэн хана, таазны зургуудтай. Зочдын өрөө маш том, уран зургуудтай бол жижиг, хөх ханатай өрөөнд гэрийн эзэд бурханд залбирдаг байжээ. Манай эриний 79 онд Езув галт уул дэлбэрсэн юм. Одоо ч эртний хотын 1/3 нь үнсэн дор бий.
Эх сурвалж: BBC
