Зураач Н.Алтангэрэлийн \”Нүүдэлчдийн соёл\” үзэсгэлэн шоу 4 сарын 17-24-нд Шанхай хотод болно. Нүүдэлчдийн түүх, монгол ахуй, байгаль, ан амьтны сэдэвтэй зургууд үзэсгэлэнд тавигдах бөгөөд шоуны үеэр зураач маань үзэгчдийн өмнө шууд зурж үзүүлэх юм байна.
Ихэнх зураач өөрийгөө илэрхийлэх ямар нэг онцгой өнгө дүрстэй, түүнийгээ зураг бүртээ шингээхийг эрхэмлэдэг. Харин зураач Н.Алтангэрэлийн уран бүтээлүүд ямар нэг \”изм\”-д баригддаггүй, сэдвийн хувьд өргөн, өнгө дүрслэл баялаг байдгаараа бусдаас ялгардаг.
Жирийн сонирхогчийн хувьд түүнтэй таван хором ярилцсанаа энд сийрүүлье.
Та голдуу нүүдэлчдийн түүх соёлыг харуулсан уран бүтээл туурвидаг. Яагаад ийм сэдвийг онцолж зурдаг юм бэ?
Би түүх их сонирхдог л доо. Тийм болохоор түүхэн сэдэвт зураг их зурдаг. Удахгүй Шанхайд болох үзэсгэлэндээ ч голдуу түүхэн сэдэвт зургаа дэлгэнэ. Монгол орноо түүхийн талаас нь Шанхайчуудад танилцуулмаар байна гэх үү дээ.
Нүүдлийн соёл, нүүдлийн соёл иргэншил гээд ярихаар зарим судлаач соёл биш, соёл иргэншил бүр ч биш гээд зүтгээд байдаг л даа. Та энэ талаар ямар бодолтой байдаг вэ?
Нүүдлийн соёл суурин соёл иргэншлээс өөр болохоор зарим хүн хүлээн зөвшөөрдөггүй. Одоо ч тийм байгаа юм биш, урьд ч тийм л байсан. Бүхэл бүтэн үндэстэн, улс орон даяараа нүүдэллэдэг болохоор гайхаж эргэлзэх нь бас аргагүй л дээ. Миний хувьд энэ бол соёл мөн. Өв уламжлал, зан заншил, удам судраа тээсээр хэдэн мянганы цаанаас бидний энэ цагт ирсэн, мөнхөд хөдөлж, хөгжиж байдаг болохоор нүүдлийн соёл бол амьд соёл, агуу соёл. Нүүдэлчид суурин иргэншилтэй ард түмнийг бодвол байгаль дэлхийтэйгээ ойр харьцаг хүмүүс. Сүүлийн үед бид гадны суурин соёлд автаад нүүдэлчдийн өв уламжлал, зан заншил, малчин соёлоо хайхрахгүй байна уу даа гэж би эмзэглэдэг. Гэхдээ бид үндэсний өв, хэл соёлоо хадгалж хойч үедээ өвлүүлж чадвал онцгой ген, оюун ухаанаараа дэлхий дахиныг гийгүүлж чадна гэж би итгэдэг.
Та зургийн санаагаа яаж олдог вэ? Зураачид ном их уншиж, өөрийгөө байнга цэнэглэдэг гэж сонсож байсан.
Ном унших дуртай шүү. Их уншина аа. Эргэцүүлж их уншина. Бодлоосоо л бүтээлийн санаа олдог доо. Бодлоороо өнгөрсөн үе рүү орчиж, өөрийгөө тэнд байгаа гэж төсөөлж, мэдэрдэг. Юу зурна яг тэр зурагтаа орж амьдардаг.
Бурхдын хөрөг дотор ч сууж л байх уу?
Сууна аа сууна. Өөрийгөө хөгжүүлж гэгээрүүлж чадвал хүн бурхны хутгийг олдог. Бурхны хөргийг зурахдаа түүний амарлингуй төлөвт оршихыг эрмэлздэг.
Удахгүй болох үзэсгэлэнд тань амжилт хүсье. Баярлалаа
