Удирдагчдаас бид юуг суралцах ёстой вэ?

Барак Обама 7 хоногийн 6 өдөр нь 45 минутаар спортоор хичээллэдэг. Өглөө босонгуутаа л дасгал хийж эхэлдэг байна. Эхний өдөр хүчний дасгал, дараагийн өдөр кардио дасгал гэх мэтээр ээлжилдэг байна.

Facebook-ийн үүсгэн байгуулагч Марк Цукерберг 7 хоногт 3 удаа биеийн тамираар хичээллэдэг. Тусгайлсан бэлтгэл сургуулилт байхгүй, зүгээр л нохойтойгоо гүйдэг. Гэвч хамгийн гол нь өглөө босонгуутаа өглөөний цайны өмнө гүйдэг байна.

Америкийн Vogue сэтгүүлийн ерөнхий редактор Анна Винтур өглөө 5.45-д босож, нэг цаг талбайн теннис тоглодог.

Apple компанийн гүйцэтгэх захирал Тим Кук 7 хоногт 5 удаа өглөө 4.30-т босож, фитнест явдаг байна. Үүнээс гадна тэрээр дугуйн спортоор маш шаргуу хичээллэдэг гэнэ.

Эдгээр амжилтад хүрсэн хүмүүст бидэнтэй адил нийтлэг нэг зүйл байгаа нь тэд орой ажлын дараа спорт заал руу явах завгүй хүмүүс. Иймд өглөө маш эрт босож, өөрийнхөө эрүүл мэндэд цаг зав гаргаж чаддаг байна. Өдөр бүр өглөө эртлэн босох нь хүнээс хүч чармайлт, бас зориг шаарддаг нь нэг талаараа амжилтад хүрэх дадлуудын нэг юм.

Үүнээс гадна өглөө эртлэн босож, дуртай спортоороо хичээллэх нь тархины үйл ажиллагааг сэргээхээс гадна зүрхний үйл ажиллагааг мөн дэмждэг байна.

Америкт зүрх, судасны өвчин эмгэг нь хүн амын өвчлөл, нас баралтын тэргүүлэх шалтгаан болсныг албан ёсоор зарласны дараа Америкийн зүрх судасны өвчин судлалын холбооноос зүрхний үйл ажиллагааг дэмжих тусгай зөвлөгөөг боловсруулсныг доор хүргэе. Энэ нь хамгийн багадаа хийх шаардлагатай дасгалууд гэдгийг санах хэрэгтэй.

7 хоногийн 5 өдөр нь хамгийн багадаа 30 минутаар удаан хэмнэлтэй айзамт гимнастик (aerobic)-ийн хөдөлгөөн хийх (7 хоногт хамгийн багадаа нийт 150 минут байх ёстой)

Эсвэл 7 хоногийн 3 өдөр нь хамгийн багадаа 25 минутаар хурдан хэмнэлтэй айзамт гимнастикийн дасгал хөдөлгөөн хийх (7 хоногт хамгийн багадаа нийт 75 минут болох ёстой)

Дээрээс нь 7 хоногт ядаж 2 удаа өөртөө таарсан хүчний дасгал хийж байх

Айзамт гимнастик гэдэг нь амьсгал болон зүрхний хэмнэлийг нэмэгдүүлдэг биеийн хөдөлгөөнт дасгалууд. Дасгалын хэмнэл анхандаа хэт хурдан санагдвал өөртөө тохируулан, удаашруулж болно. Огцом өндөр хурдаар хийх нь тус болохоосоо илүү хор болно. Хамгийн гол санаа нь зүрхний булчинг биеийн бусад булчингийн адил  өдөр бүр аажим аажмаар дасгал хийх замаар сайжруулж, эрүүлжүүлэх юм. Айзамт гимнастикийн төрөлд дугуй унах, бүжиг, усанд сэлэх бас багтдаг байна. Өдөр бүрийн 5-10 минутын алхалт, шатаар уруудаж, өгсөх хугацаагаа ч айзамт гимнастикийн дасгал хийсэнд тооцож болно.

Хүчний дасгал гэдэг нь өөрт таарсан ачаагаар эсвэл өөрийн жингээр биеийн булчиндаа ачаалах өгөх (гар дээр суниах, гэдэсний таталт хийх, скуат) дасгалууд юм. Хэрвээ нэг дор 30 минут гаргах завгүй бол 2 хувааж өглөө оройд 15 минутаар хичээллэж болно шүү.