![\"\"](http://undesten.mn/uploads/posts/2017-07/1500956959_d4ee2e59ba64d246d120928def495625_1486458055.jpg "\\"\\"")
Бидний өвөг дээдэсд үнэнчээр зүтгэсэн бөгөөд магадгүй түүхэн дэхь хамгийн анхны манайд урваж орж ирсэн хятад хүн бол Жун Хан Юе юм. Энэ хүн Хан улсын ордны тайган байсан ажгуу. Хүннү улсын Модун шанью нас барсны дараа түүний хүү Жи Ю буюу Лаошан шанью ор залгамжлах үед Хан улс шинэ шаньюд бэлэг болгон өөрийг нэгэн гүнжийг эхнэр болгон өгчээ.
Тухайн үед гүнжийг дагалдагсад дотор энэ тайган хамт ирсэн байна. Ер нь Хан улс энэ мэтээр Хүннүд бэлэг гэхэд хэцүү, алба татвар маягаар байнга ингэж өөрийн ордны гүнж, дээрээс нь асар их эд агуурс боол зарцыг явуулдаг байсан. Яагаад гэвэл Хүннүд сайн хандахгүй бол хэзээ мөдгүй дайраад ороод ирэхээс эмээн ингэхээс өөр аргагүй байв.
Хан Вэн Ди хаан шинэ шаньюд гүнжээ өгч ураг барилдан энх тайвнаар зэрэгцэн оршихоо илэрхийлэх нь зүй ёсны үйлдэл байлаа. Гүнжийг дагалдан явах хүмүүст Хүннүд очиж үлдсэн насаа хүний газар барна гэдэг хүндхэн байсан байж таарна. Жун Хан Юе-д Хүннү явах тушаал ирэхэд тэрээр ихэд дургуйцсэн байдаг. Хааны зарлиг тул хүчээр явахаас өөр аргагүй болсондоо тэрээр хорсон \”Намайг үнэхээр ингэж явуулах аваас хожим би Хан улсын аюул занал чинь больё л доо\” гэсэн байна. Тухайн үед түүний энэ үгийг тоосон хүн байсангүй. Явах дургуй хүн уурандаа л хэлээ биз хэмээн бодсон байлаа. Энэ хүн хэлсэндээ хүрч Хүннүд очсоны дараа Шаньюд шадарлан итгэгдэж түүний зөвлөх сайд болов. Хан улсын тухай мэддэг бүхнээ шаньюд хэлж зөвлөн Хүннүд үнэнчээр зүтгэжээ.
Хятадууд бол энэ хүнийг түүхэн дэхь анхны урвагч гэж үздэг. Уг нь шударгаар дүгнэвэл энэ хүн нэгэнт өөрийх нь улс түүний эрдэм чадлыг үл тоох аваас өөр улсад очин эрдэм чадлаа үнэлүүлье л гэсэн хүн л дээ.
Тэрээр \”Хүннү бол Хан улсын нэг аймаг төдий хүнтэй атал Хан улсаас хүчирхэг байдгийн нууц гэвэл иддэг хүнс өмсдөг хувцас өөр байгаад оршино. Шанью та өөрийн уламжлал ахуйг умартан Хан улсын эд агуурст татагдваас Хан улс өөрийн эд агуурсны 10 хуваасны 2- ийг зарцуулахад Хүннү Хан улсад уусах аюултай гэж шаньюд сануулж байжээ.
Мөн тэрээр урд газрын торго гоёмсог боловч морь унах, өвстэй талаар явахад урагддаг чанар муутай тул өөрсдийн уламжлалт арьс нэхийгээ голчлохыг уриалдаг байж. Идээ ундаа мөн адил , Хан улсын идээ хүнс бол хүннү нарын цагаан идээг гүйцэхгүй. Хан улсын идээ ундааг шанью үл тоох ажгуу.
Тэрээр Хүннү нар дайтахдаа эрэмгий хүчтэй байдаг нь иддэг хоол хүнстэй нь нягт холбоотой гэж үзжээ.Энэ хүн үхэн үхтлээ Хүннүг хүчирхэг байлгахын төлөө бүхнээ зориулсан байна. Үхэхийн өмнө шаньюд бактрелогын дайн хүртэл санал болгож байж. Тахлаар үхсэн амьтны сэгийг дайсныхаа усны ундрага дээр тавих гэх мэт.
