116-р сургуулийн захирлын үүрэг гүйцэтгэгч Э.Энхзулын хэрэг Нийслэлийн прокурорт шилжлээ

 

 

Албан тушаалаа урвуулан ашиглаж их
хэмжээний мөнгө хувьдаа завшсан хэргээр АТГ шалгагдаж байсан 116-р сургуулийн
захирлын үүрэг гүйцэтгэгч  Э.Энхзулын
хэрэг Нийслэлийн прокурорын газарт шилжээд байна.   

116 нь  харааны бэрхшээлтэй хүүхдэд ерөнхий боловсрол олгодог улсын
хэмжээний ганц сургууль тул хөдөө орон нутаг
болон нийслэлийн 9 дүүргийн хүүхдүүд суралцаж байна.

Э.Энхзулд  хавтаст хэрэг үүсгэх болсон шалтгаан нь,
сургуулийн биеийн тамирын гаднах талбайд нэг бүрийг нь сарын 600 орчим мянган
төгрөгөөр 20-40 тоннын найман  чингэлэгийг
түрээсээр  байршуулан төлбөрийг хувьдаа  завшсан. Мөн сургуулийн биеийн тамирын заалыг бизнесийн байгууллагуудад урт
хугацаагаар  түрээслүүлэх замаар олсон
орлого болон төсвөөс олгосон санхүүжилтийг   хууль бусаар зарцуулсан зэрэг асуудлаар хэрэг
үүсгэн шалгажээ.

Гэхдээ энэ асуудал дан ганц Э.Энхзулынх биш. Тус
сургуулийн нягтлан бодогч н. Оюунгэрэлтэй хамтарсан байх магадлалтай гэнэ.

Э.Энхзул нь албан тушаалаа урвуулан ашиглаж их хэмжээний
орлого хууль бусаар олсоноос гадна  багш,
ажилчидтай зүй бусаар харьцдаг, хэл амаар доромжилдог, ажил дээрээ архидан
согтуурдаг гээд байгууллага удирдах нь битгий хэл сурган хүмүүжүүлэх ажилд
тэнцэхээргүй хүн болохыг баримт нотолгоотойгоор илчилж БСШУЯ-ны ёс зүйн хороонд
хандсан багш нарыг удаа дараа дарамтлан зүй бусаар харьцжээ.  

 Харааны
бэрхшээлтэй хүүхдүүд суралцдаг улсын ганц энэ сургуулийн захирлаар өөриймсөг
сэтгэлтэй, үнэнч шударга,  мэргэжлийн
чадварлаг  хүн томилохгүй бол ардын
хүүхдийг сургаж хүмүүжүүлэхээсээ өмнө сургуулийн байр талбайг  мөнгө болгож хардаг. Ашиг орлого олох
сонирхолтой захирал нэртэй  хувалзнууд
шил шилээ даран томилогдож байна. Эцэст нь харааны бэрхшээлтэй хүүхдүүд сурч
боловсрох эрхээ эдлэж чадахгүй  байна.

Тус сургуулийн өмнөх удирдлагууд бүгд л ашиг сонирхлын
зөрчилтэй, хууль бус мөнгөний асуудалд холбогдож байжээ.

Тухайлбал, 2014 онд захирлаар
ажиллаж байсан С.Энхтуяа нь харааны бэрхшээлтэй хүүхдүүдэд төрийн болон төрийн
бус байгууллага олон улсын хүмүүнлэгийн байгууллагаас ирүүлсэн тусламжийг
хувьдаа ашигладаг, төсөвлөсөн мөнгийг зориулалтын нь дагуу ашигладаггүй зэрэг
хууль   зөрчсөн  үйлдэл  цөөнгүй гаргасан нь 
тогтоогдсон байдаг.  Мөн тус
сургуулийн багш Б.Батболд нь дуу  хөгжмийн багш боловч 
Англи хэл, Мэдээлэл зүйн хичээлийг зааж  илүү
цагийн мөнгө авдаг байснаас гадна  \”Ижий
 дэлхийн үрс” тоглолтыг олон удаа зохион байгуулж орлогыг  нь С.Энхтуяа захирал авчээ. 
Тухайлбал тус тоглолтыг Улаанбаатар дээд
сургуульд хоёр удаа,  АШУИС-1 удаа,  МУИС-1 удаа, Хөвсгөл аймагт
 6-7 удаа тоглож   17 сая төгрөг олсон талаар хэвлэл, мэдээллээр
олонтаа мэдээлсэн байдаг. Хэдийгээр энэ нь өнгөрсөн хэрэг мэт харагдавч
иймэрхүү хууль бус үйлдлүүд энэ сургуульд тасрахгүй үргэлжилж байгаа нь юутай
холбоотой юм бол?

116-р сургуулийн захирлын үүрэг гүйцэтгэгч Э.Энхзулыг сурган
хүмүүжүүлэх байгууллагаас их хэмжээний орлого мөнгө олсон нь тогтоогдож, багш
ажилчид нь зан харилцаа, ёс зүй, сахилга батын хувьд доголдолтой гэдгийг нь
илчлээд байхад ямар ч хариуцлага тооцохгүй юм бол дээд удирдлага гэх Боловсролын
яам байгаад яах билээ.   Энэ сарын 5-ны өдөр уг нь БСШУЯ-наас ажил
хүлээлцэхээр 116-р сургууль дээр албаны хүн очсон боловч захирлын үүрэг
гүйцэтгэгч Э. Энхзул өрөөгөө цоожлон бултжээ.  Багш нараа цуглуулаад ажлын байран дээрээ байж
байхыг албан ёсоор сануулсан боловч уг захирал эмэгтэй тоосонгүй. Түүнд албан тушаалаа
авч үлдэхээр ярилцаж тохиролцсон, хамгаалж авч үлдэх хүн байгаа болоод төрийн
сургуулийг хувийн компани шиг аашилж аяглаж байгаа нь энэ үү. 116-р сургуулийн
бодит байдлыг бид эргэн сурвалжлан хүргэх болно.  

С.Ойдов