Ээж, аавуудын санаа их зовдог боловч үнэндээ бол хэвийн 7 шинж:
1. Конус хэлбэрийн толгой
Нярай хүүхдийн толгой эхийн төрөх замаар гарах явцад конус хэлбэрийн болох нь элбэг тохиолдоно. Ялангуяа эхний төрөлт, эх барихын хавчуур тавьж эсвэл вакуум соруулгаар төрсөн, төрөлт удааширсан бол хүүхдийн толгойн хэлбэр өөрчлөгддөг. 3 хүүхэд тутмын 1-д толгойн хэлбэр ургийн байрлал, төрөлт, удамшил, гадаад орчны нөлөө зэргээс өөрчлөгдсөн байдаг. Өөрөөр хэлбэл гавлын заадсууд зөрсөн байх нь хэвийн үзэгдэл юм. Гэхдээ хэдэн сарын дараа дийлэнх нь өндөг хэлбэртэй болдог.
2. Толгойгойгоо сэгсрэх, толгойгоороо юм мөргөх, шилээ шөргөөх
Зарим хүүхэд өөрийгөө тайвшруулах, унтуулах зорилгоор эдгээр хөдөлгөөнийг хийдэг. Харин зарим нь хуруугаа эсвэл соосго хөхөж тайвширдаг гэдгийг ээж аавууд сайн мэднэ. Зарим тохиолдолд хүүхэд уйдахаараа (хараа, сонсголыг өдөөх зүйл хомс, хүүхэдтэйгээ ярих тоглох цаг бага гаргадаг) ийм хөдөлгөөн хийдэг бөгөөд мөн ойр ойрхон эвшээдэг гэдгийг мэддэг байх хэрэгтэй.
3. Эхний 6 сар үс унах
Ургийн хөгжлийн 8 дахь долоо хоногоос үс ургаж эхлэх ба 6 сартай ураг үстэй байна. Төрсний дараах эхний 6 сар энэхүү сэвлэг унаж үсээр солигдоно. Харин арай том хүүхдэд үс ихээр унах нь дийлэнхидээ угаахдаа ширүүн хандах, шигүү шүдтэй самаар хүчтэй самнах, үсээ зулгаах, хуруундаа ороох зуршил, чанга боох/сүлжих, бариу обруч зүүх зэрэг гэмтэл байдгийг санах хэрэгтэй.
4. Сэрүүн байхдаа төдийгүй унтаж байхдаа ч цочих
Чанга дуу чимээ, огцом хөдөлгөөнд хүүхдэд цочих рефлекс автоматаар үүсдэг. Хүүхэд цочих үед яг л та бидэн шиг зүрхний цохилт, амьсгалын тоо нь олширч, артерийн даралт ихэсч байдаг. Цочих рефлексийн илрэл хүн бүрт, хүүхэд бүрт харилцан адилгүй байна. Нярай хүүхэд дуу чимээнд цочиж байвал түүний сонсгол сайн байгааг илтгэх үзүүлэлт гэж ойлгоорой. Хүүхэд эхээс мэндлэхдээ л энэхүү рефлестэй төрдөг. Цочих рефлекс илрэхгүй байх нь тархи эсвэл нугасны гэмтлийг илтгэнэ.
5. Нярай хүүхдийн арьс хөх эрээн/гантиг чулуу шиг байх
Нярай хүүхдийн арьсны өнгөц судсууд гүйцэт хөгжиж амжаагүй байдгаас уйлах, даарах үед зарим нь нарийсч арьсыг хөх болгож байхад зарим өргөсөж улаан болдгоос эрээнтэж харагддаг. Хүүхэд тайвширч, дулаацахад арьс эргээд хэвийн болдог. Энэ нь хүүхдийг сар сараар том болох тусам аяндаа зүгээр болно.
6. Зулай лугших
Зарим хүүхдийн зулай зүрхний цохилтоор лугших нь тэмтрэгдэж/харагддаг ба энэ нь хэвийн үзэгдэл юм. Өөрөөр хэлбэл хүүхдийн тархины судасны лугшилт тэмтрэгдэж/харагдаж байна гэсэн үг.
7. Гульгих
Улаан хоолой-ходоодны амсрын хунигч булчин гүйцэт хөгжөөгүйгээс эхний 3-6 сар гульгих нь нийт эрүүл хүүхдийн 50%-д тохиолдоно. Гульгидсанд нь цус байхгүй, жингээ сайн нэмж байвал хэвийн гэж үздэг. Эдгээр хэвийн 7 шинжийг тархины даралт, хүчилтөрөгчийн дутагдал гэж оношилох нь шинжлэх ухааны ямар ч үндэслэлгүй гэдгийг хариуцлагатайгаар хэлэхийг хүслээ.
