Тайваний цуглуулагч 800-аад жилийн өмнө бүтээгдсэн Чингис хааны хөрөг зургийг олон нийтэд танилцуулав

$\"\"$

Фузянь мужийн Сямэнь хотод зохиогдож буй арав дахь удаагийн Хятад-Тайваний соёлын үзэсгэлэнд, 800 жилийн түүхтэй Чингис хааны хоёр хөрөг зургийг танилцуулжээ. Чингис хааны энэ хоёр хөрөг нь эх газарт анх удаа олон нийтэд дэлгэгдэж буй учир мэдээллийн хэрэгслээр дамжуулагдмагц Хятад даяар өргөн олны анхаарлыг татаад байна.

Хэвлэлд мэдээлснээр, энэ удаа дэлгэгдэж буй эл хоёр хөргийг Тайваний алдарт цуглуулагч Сюй Бө-и авчирсан бөгөөд бодитоор харж зураад үхрийн ширэн дээр бүтээсэн хөрөг аж.

Нэг зураг нь, Их хааны малгай өмссөн, хас тамганы гэр зүүсэн, суугаа байдалтай цээж хөрөг. Үхрийн ширэн дээрх эл хөргийг саарал өнгөтэй, тансаг сайхан Перс хээ угалзаар чимэглэсэн, Перс хивсээр хүрээлсэн агаад 120×80 см-ын хэмжээтэй.

Нөгөө хөрөг нь мөн үхрийн ширэн дээр зурагдсан, энгийн малгай өмсч, нэг гараараа таяг тулан, нөгөө гартаа бурханы судар барьсан Чингис хаан судраа уншиж буйгаар дүрслэгдсэн байна.

Энэ хөргийг үзсэн Сямэнь хотын Монгол иргэн Чу-ли-чян Монгол заншлаар сөгдөн мөргөж, залбирсан ажээ. Тэрээр уг зургийн эзэн Сюй Бө-и-тэй уулзаж, өөрийн бодлоо ярихдаа, \”Дундад азиас авчирсан Перс хивс ашигласныг бодоход энэ хоёр зураг Чингис хааны их цэрэг анх удаа баруунд дайлсан 1218-1223 оны орчим бүтээгдсэн байх магадлалтай\” гэжээ. /Эх сурвалж: www.taihainet.com/

Харин Монгол хүний нүдээр харахад Чингис хаан мөн гэж итгэхэд бэрх л юм. 800-гаад жилийн өмнө зурагдсан хөрөг байхыг үгүйсгэхгүй. Гэхдээ хөрөгт дүрслэгдсэн хүн Чингис хаан мөн гэдгийг хэн батлах вэ. Ямартай ч нэгэн цуглуулагч өөрийн цуглуулгаа олон нийтэд танилцуулж, олон ч хүний анхаарлыг татаад авлаа. /Орчуулагчийн бодол/

$\"\"$