Өнгөрсөн долоо хоногт цахим орчинд \”Заантай будаа хуурамч байна, гэр бүлээрээ хордлоо” гэх мэдээлэл тарсан. Ер нь цагаан будаа хуурамч байна, дотроос нь өт гарж ирлээ гэх мэдээллүүд сүүлийн үед мэр сэр гарах болсон. Энэ талаар мэдээллийг анх тараасан фэйсбүүк хэрэглэгчээс тодруулах гэсэн боловч хаягаа устгасан байсан тул Нийслэлийн мэргэжлийн хяналтын газраас лавлалаа.
НМХГ-ын Хүнс, хөдөө аж ахуй, үйлдвэр үйлчилгээний хяналтын хэлтсийн дарга Д.Энхбат \”Цахим орчинд гарч буй мэдээллийн араас манай гадаад харилцаа, олон нийттэй харилцах хэлтсийнхан шалгаж үзсэн. Мэдээллийг тавьсан эзэн, эх үссвэр нь олдоогүй. Эсвэл тийм мэдээлэл тавиагүй гэх зэрэг хариулт өгдөг. Хуурамч будаа бол лабораторын шинжилгээгээр гараагүй. Харин чанар хугацаа, хадгалалтын горим алдсан цөөн тохиолдол бий” гэсэн юм.
Чанар хугацаа, хадгалалтын горим алдагдсан хүнсний бүтээгдэхүүнийг Хүнсний аюулгүй байдлын тухай хуулийн 8-р зүйлд заасны дагуу буцаан татаж, мал амьтны тэжээл, ургамлын бордооны зориулалтаар дахин боловсруулдаг. Шаардлагатай бол устгалд оруулдаг гэнэ.
Үе үе яригддаг цагаан будаа хуурамч байна гэсэн мэдээллийг ийнхүү НМХГ үгүйсгэж байгаа бөгөөд будааны бизнес эрхлэгчид нэгнийгээ өрсөлдөөнөөс шахан гаргах шударга бус өрсөлдөөний хэлбэр гэж үзэж байна. Мөн борлуулалт сайтай будааны уутанд чанар муутай будаагаа савладаг байж магадгүй гэсэн хардлага байдаг. Үүний мөрөөр Баянзүрх захыг зорилоо.
13-р хорооллынхон ихэвчлэн үйлчлүүлдэг тус захын доод давхарт будаа гурилын тасаг бий. Зөвхөн будаа гурил, элсэн чихэр гэх мэт бүтээгдэхүүн худалдаалдаг 4-5 лангуу байх бөгөөд 25 кг-ийн гурил, будаа өрөөстэй байна. Ханан дээр нь 100-гийн тор өлгөөтэй. Хажуугаар бидний хэлж заншсан заантай будааны шинэхэн уутнууд өлгөөтэй байх юм. Худалдагчаас уутыг хаанаас авдаг, будаагаа өөрсдөө савладаг юм уу гэж асуухад \”Өө энэ уутыг зарахгүй ээ. Хүн авчирч өгдөг юм, нэгийг нь 100 төгрөгөөр авдаг. Сүмтэй будаанаас өөрөө савлаж зардаг” гэсэн юм. Тэд 5 кг-аар савласан \”заантай” гэх ч үнэндээ \”сүмтэй” будаагаа 11 мянган төгрөгөөр зардаг юм байна.
Ингэж иргэдийг төөрөгдүүлэн худалдаачид өөрсдөө будаа савлан зарж байгаад НМХГ-аас ямар хяналт тавьдаг талаар тодруулахад \”Бид будааны чанарын аюулгүй байдалд л хяналт тавьдаг. Хуурамч будаа илэрлээ гэвэл будаанаас дээж авч лабораторид шинжилгээнд өгдөг. Савлаж уутлаад өөрсдөө зарж байгаа асуудлыг цагдаагийн байгууллага хариуцах ёстой” гэсэн юм.
Хуурамч будаа хилээр орж ирж байгааг НМХГ үгүйсгэж байна. Харин борлуулалт, савлагаа эрүүл аюулгүй байдал хангалттай бус байгааг Баянзүрх захын жишээнээс харж болно. Цагаан будаа гэдэг бол ургамал учир хугацаа хэтэрвэл муудна, худалдан авахдаа сайтар шалгаж үзэхийг иргэддээ анхааруулж байна.
эх сурвалж: newscom.mn
