Хөвсгөл аймгийн хоёр нутагт гарсан ойн түймрийг цурманд оруулаад, унтраахаар ажиллаж байна. Тодруулбал, “Хоёр-Эхт” гэдэг газар гарсан ойн түймрийн мэдээллийг энэ сарын 23-нд хүлээн авч тухайн өдрөө цурманд оруулсан байна. Энэ түймэрт 4 га газар өртсөн байна.
Мөн “Горхины-Эх, Ухантын даваа” гэдэг газар гарсан түймрийн тухай дуудлага энэ сарын 15-ны өдөр ирсэн бөгөөд 20-ны өдөр түймрийг цурманд оруулж, одоо бүрэн унтраахаар ажиллаж байгаа юм. Олон өдөр гарсан түймэрт 5800 га талбай өртжээ.
Ойн түймэрт Булган аймгийн Тэшиг сумаас 40 км-ын зайтай Далан багийн “Ногоон толгой” гэдэг газрын 7 га талбай шатсан байна. Түймрийн тухай дуудлагыг энэ сарын 22-ны өдөр хүлээн авч тус аймгийн Онцгой байдлын алба хаагчид, орон нутгийн иргэд, нийт 34 хүн, 3 техник хэрэгсэлтэйгээр ажиллаж, тухайн өдрийн 22:00 цагт цурманд оруулсан юм.
Түүнчлэн Хэнтий аймгийн Норовлин сумаас 40 км зайтай Онон багийн “Эмгэнтийн-Адаг” гэдэг газрын 900 орчим га талбай хээрийн түймэрт өртжээ. Хээрийн түймэр гарсан тухай мэдээллийг өчигдөр 15:56 цагт өгсөн байна. Дуудлагын дагуу Дорнод аймгийн Баян-Уул суман дахь Гал түймэр унтраах, аврах 53 дугаар ангийн алба хаагчид, орон нутгийн иргэд, нийт 45 хүн, 5 техник хэрэгсэлтэйгээр ажиллаж, 4 цаг орчим хугацаанд ажиллаж цурманд оруулаад байна.
Цурманд оруулах болон бүрэн унтраах үйл ажиллагаа нь:
Түймрийн цурвын захаар асч байгаа цог нурмыг цэвэрлэж, цурмын гүн тийш шүүрдэх, цурмын захад ойр уугиж байгаа хожуул, үндсийг ус, шороо хийж дахин гарахааргүй унтраана.
Түймрийн цурав доторх галыг унтраахдаа цурвын захад асаж байгаа мод, унанги мод зэргийг унтрааж, шаардлагатай бол хөрөөдөж шатаж байгаа хэсгийг цурвын гүнд оруулж аюулгүй болгох арга хэмжээ авна. Түймрийн цурвын захад уугиж байгаа хомоол, үндэс, бут салхинд асч түймэр дахин дэлгэрэх аюултай байдаг тул сайтар цэвэрлэж унтраана.
Түймрийн цурвыг манахдаа ойн түймрийн үед үндэс, хожуул хөрсөн доогуураа асч түймрийн цурвын гадна талд шинээр түймэр гаргах аюултай тул 3-10 хүртэл хоногоор манаа гаргана.
Ой, хээрийн түймрийн 90 гаруй хувь нь хүний салан задгай,санамсар болгоомжгүй, үйдлүүдээс болж гардаг байна. Үүнд:
- Ойд аялал зугаалгаар явахдаа ил задгай гал түлээд гүйцэд унтраалгүй орхих
- Татсан тамхи
- Тээврийн хэрэгслийн бүрэн бус байдал, оч баригчгүй тракторын яндангаас оч үсрэх
- Айл өрхийн ил задгай асгасан үнс нурамнаас болж /хавар, намрынсалхи шуургатай үед/
- Галт сумаар буудаж гал алдахзэрэг хүмүүсийн буруутай үйл ажиллагаанаас болж ой, хээрийн түймэр ихэвчлэн гардаг байна.
