УИХ-ын гишүүн С.Эрдэнэ өнөөдөр Мөнгө хүүлэлтэй тэмцэх болон Зээлийн хүүгийн хувийн дээд хэмжээг тогтоох тухай хуулийн төслийг УИХ-д өргөн мэдүүллээ. Уг хуулийн төсөл нь зээлийн хүүгийн дээд хязгаарыг хуульчлах, мөнгө хүүлэхтэй тэмцэх зорилготой аж.
Үүний дараа тэрээр уг хуулийн төсөл болон бусад асуудлаар мэдээлэл хийв. Тэрээр “Монгол Улсад банк санхүүгийн байгууллага, баялаг бүтээж буй бизнес эрхлэгч аж ахуй нэгж, иргэдийн зээлийн дарамтаас гарах бодит үндэслэл болно. Зээлийн хүүгийн дээд хязгаарыг тогтоож, түүнээс дээгүүр зээлийн хүү тогтоосон тохиолдолд хууль зөрчсөн гэж үзэж, мөнгө хүүлсэнд тооцох, хариуцлага хүлээлгэх боломжтой. Мөнгө хүүлэлтийн талаар өмнө нь тодорхой хууль эрх зүйн ойлголт байхгүй байсан. Энэ хууль хэрэгжсэнээр Монголд бизнес эрхлэхэд таатай орчин бүрдэх, зээлийн хүүгийн дарамтаас ангижрах гол эрх зүйн зохицуулалт хийж байгаа. Өнөөдөр арилжааны банкны дундаж хүү 20-30 хувь байдаг. Банк болон банк бус санхүүгийн байгууллага 40-60 хувьтай байдаг. Ийм өндөр хүүтэй зээлийн орчинд амжилттай бизнес эрхлэх, үйл ажиллагаа явуулахад хэцүү. Тиймээс хуулийн төслийг санаачилж байна” гэлээ. Үүний дараа тэрээр сэтгүүлчдийн асуултад хариулт өгөв.
Зээлийн хүүгийн дээд хязгаарыг хэд байхаар хуульд тусгасан юм бол?
Арилжааны банкуудын зээлийн хүүгийн дээд хязгаарыг 18 хувь байхаар хуульчилсан. Түүний дотор цалин болон тэтгэврийн зээлийн хүүг 12 хувь байхаар хуульд тусгасан. Сарын 1-1,5 хувь байна гэсэн үг.
Хууль банк бус санхүүгийн байгууллага, ломбард, арилжааны банкууд бүгдэд хамаарна гэсэн үг үү?
Ер нь бол хадгаламж зээлийн хоршоо, иргэд хоорондын өдрийн зээлийн зохицуулалтыг хуульд оруулаагүй. Банк, банк бус санхүүгийн байгууллагад хамаарна.
Ардчилсан намын гишүүн, Ерөнхий сайд асан Ч.Сайханбилэгийг цагдан хориод байгаа. Танай намын зүгээс очиж эргэж очино, уулзана гэж байсан. Энэ асуудал юу болсон бэ?
Бид одоогоор АТГ болон холбогдох газруудад Ч.Сайханбилэгтэй уулзах хүсэлтээ албан ёсоор тавьсан байгаа. Өнөөдрөөс хариу өгөх болов уу гэлээ.
