УИХ-ын гишүүн Л.Болд Оюутолгойн гэрээний асуудлаар хорих 461-р ангид хоригдож, шалгагдаж байгаа хүмүүстэй Хүний эрхийн дэд хорооны хүрээнд очиж уулзжээ.
Гэхдээ эмнэлэгт хэвтэж байгаа Ерөнхий сайд асан С.Баяртай уулзах зөвшөөрлийг түүнд өгөөгүй байна. Харин бусад дөрвөн хүнтэй уулзжээ. Ингэхдээ тэрээр хорих нөхцөл байдал, хүний эрхийн нөхцөл байдал, хэргийн шалгалт, хуулийн хүрээнд хийгдэж байгаа асуудлууд, эрүүл мэндийн байдал гээд хүний эрхийн талаасаа танилцах бүх асуудлуудтай нь танилцсан бөгөөд баривчилгааны хүрээнд гадаад дотоод нөхцөл байдлуудад болон эрүүл мэндийн асуудалд их санаа зовниж байгаагаа хэллээ.
Тэрээр энэ тухай “Улс төр хийхгээгүй л бол эдгээр хүмүүсийг барьж, хорьж шалгах шаардлага байна уу. Тухайлбал, Б.Бямбасайхан 24 хоног хоригдож, шалгагдаж байгаа боловч нэг ч удаа байцаалт аваагүй байна. Энэ бол нэг ёсны залхаан цээрлүүлэлт. Тэгэхээр бидэнд хүний эрх талаасаа маш их эргэлзээ үүсч байна л даа. Энэ бүх асуудлаар УИХ-ын хүний эрхийн дэд хороог удирдлагатай болгож, ойрын үед хуралдуулах ёстой. Мэдээж хэрэг хуулийн хүрээнд Монгол Улсын иргэн аливаа хүн хэн ч гэсэн шалгагдах нь нээлттэй. Гэхдээ цаанаа хүний эрх талаасаа ямар нэгэн асуудлууд үүсгэхгүй байх үр дагавараа бид олон талаас нь тооцох шаардлагатай гэж бодож байна.” гэлээ.
Б.Бямбасайханы хувьд нэг ч удаа тайлбар аваагүй байгаа бол хоёр нь нэг удаа, нэг нь гурван удаа байцаалт өгчээ.
Тэд долоо хоногт нэг удаа ар гэрийнхэнтэйгээ уулзах боломжтой байдаг байна. Өмнө нь ХЭҮК-ын дарга Ж.Бямбадорж очиж нөхцөл байдалтай танилцаад, хорих 461-р ангид байгаа бүх хүн ижил нөхцөлд байгаа гэж тайлбарласан байдаг. Энэ удаад ч УИХ-ын гишүүн Л.Болд мөн Оюутолгойн асуудлаар саатуулагдсан хүмүүс тэнд байгаа 800 гаруй хүмүүстэй бүгдтэй нь л ижилхэн нөхцөлд байна гэдгийг хэлж байлаа. Гэхдээ тэрээр “Бидэнд муу туршлага бий шүү, шалгагдаж байгаад эрүүл мэндийн талаар анхаарах ёстой байсаар атал арга хэмжээ авахгүй буруу хандсанаас хүний амь эрсдэж байсан ч тохиодол бий. Цаашдаа асуудал гаргаад зугтаагаад, мөрдөн байцаалтад саад болоод байхгүй тул бүрэн үнэн мөнийг нь тогтоогоод явчих боломж байгаа гэдгийг л хуулийн байгууллагууд анхааралдаа аваасай гэж хүсч байна.” гэсэн юм.
