\”Зөрчлийн 100 оноо\”-г улс төрчдөд ч өгье

 

Замын
хөдөлгөөний аюулгүй байдлын тухай хууль хэрэгжээд эхэллээ. Хууль хэрэгжиж
эхэлснээр замын хөдөлгөөнд оролцож буй жолооч бүр \”Зөрчлийн 100 оноо”-той
болсон юм. Улмаар зөрчил гаргах бүртээ энэ 100 онооноосоо хасуулж, оноо дууссан
тохиолдолд жолоо барих эрхээ хасуулах, дахин жолооны шалгалт өгч эрхээ сэргээх
гэх зэргээр зохицуулалт хийгдэх юм байна.

Иргэд
энэхүү зохицуулалтыг сайн, муу хоёр талаас нь хүлээн авч байна. Ер нь зөрчил
гаргахгүй бол 100 онооноос хасагдахгүй. Харин зөрчил гаргадаг бүдүүлэг соёлгүй
жолооч оноогоо хасуулсаар байх юм. Энэ өнцөгөөс нь харвал зөрчлийн 100 оноо
зохицуулалтыг өөр бусад салбаруудад ч ашиглаж болохоор санагдаад байгаа юм.

Эрүүл
мэндийн салбарын эмч, албан хаагчдад зөрчлийн 100 оноо өгч, өвтөнтэй зүй
зохисгүй харьцсан, хүнд суртал гаргасан, танил талдаа үйлчилсэн бол оноог хасч
болж байна. Улмаар оноо нь дууссан тохиолдолд мэргэжлийн эрхийг нь хасч дахин
шалгалт авч болно. Цагдаа, шүүх, төрийн гэх бүхий л байгууллагуудад энэ
зохицуулалтыг дээрхийн адилаар явуулж болно.Оноо нь дууссан төрийн албан хаагч ажлаасаа
чөлөөлөгдөж, тус албан тушаалд өрсөлдөж буй бусад хүмүүстэй дахин сонгон
шалгаруулалтад орох зохицуулалт хийгдэж болохоор харагдаад байгаа юм.

Мөн
76 гишүүнд ч зөрчлийн 100 оноо өгч болно.
Улмаар чуулгандаа суухгүй бол хасах 10 оноо, тойрогтоо ажиллахгүй бол хасах 10
оноо, мөрийн хөтөлбөрөө биелүүлээгүй бол хасах 50 оноо, зодоон хийсэн бол хасах
30 оноо, авлига авсан бол хасах 100 оноо, тендер завшсан бол хасах 100 оноо гэх
мэтээр зохицуулж, оноо нь дуусвал УИХ-ын гишүүнээс нь эргүүлэн татаж, тухайн
тойрогт дахин санал хураалт явуулж болохоор байна.

Яагаад
иргэд, жолооч нарт зөрчлийн оноо гэж өгсөн шигээ шийдвэр гаргах түвшнийхөнд ч
ийм оноо өгч болохгүй гэж. Ажлаа хийж чадахгүй, алдаа гаргасан, албан тушаалаа
урвуулан ашигласан бол хасах оноо өгөөд л эргүүлэн татаж болно. Заавал ёс зүйн
хороо, сүр бадруулсан хурал, чуулганаар хэлэлцээд байх шаардлагагүй болж байна
шүү дээ.

Үүний
дараа сонгон шалгаруулалт зарлахад хөрөнгө шаардлагатай болно. Энэ хөрөнгийг
хэрхэн зохицуулах вэ гэсэн асуудал гарч ирэх нь ойлгомжтой. Тэгвэл зөрчлийн
оноо дууссан төрийн албан хаагч, УИХ-ын гишүүнд тодорхой зааг ялгаатайгаар
мөнгөн торгууль ноогдуулж болж байна. Энэ нь дахин сонгон шалгаруулалт явуулах
зардал гээд л тусгаад өгчих хэрэгтэй. Та муу ажиллаж, албан үүргээ гүйцэтгэж
чадаагүй учраас таны албан тушаал дээр сонгон шалгаруулалт явуулахаар боллоо.
Тиймээс энэ хариуцлагаа ухамсарлаж дахин сонгон шалгаруулалтын зардлыг төлнө үү
гээд тогтоолд тусгаад өгчихөд болж байна шүү дээ. Эсвэл ажил гүйцэтгэх эрхээ
хасуулсан этгээд дахин сонгон шалгаруулалтад орохын тулд төлбөр төлдөг байж
болно. Ер нь төрийн албаны шалгалт өгөхөд тодорхой хэмжээний зардал гардаг.
Харин дахин шалгалт өгч байгаа этгээдийн шалгалтын зардлыг арай өндрөөр тогтоож
болмоор. Ингээд л хөрөнгийн асуудлыг шийдвэрлэчихлээ.

Одоо
зөрчлийн 100 оноог дан ганц жолооч нарт бус шийдвэр гаргагчид, УИХ-ын гишүүд,
төрийн албан хаагчдад өгч, зохицуулалт хийе.

Ами