ОУВС-гийн “Өргөтгөсөн санхүүжилтийн хөтөлбөр”-ийн дөрөв дэх шатны үнэлгээг хийх ажлын хэсэг энэ сарын 2-14-ний өдрүүдэд Монгол Улсад ажилласан юм. Энэ үеэр УИХ-ын гишүүн, АН-ын дарга С.Эрдэнэ тус ажлын хэсгийн ахлагч Жеофф Готтлиеб, сангийн Монгол дахь суурин төлөөлөгч Нэйл Сакер нартай уулзжээ.
ОУВС-гийн ажлын хэсгээс өгсөн мэдээллээр Монголын түүхий эд, бараануудын дэлхийн зах зээл дээрх үнэ сайжирч, Монгол Улсад орж ирэх гадаад валютын урсгал нэмэгдсэн байна. Гэхдээ нөхцөл байдал бүрэн тогтворжоогүй, эмзэг асуудлууд байгаа учраас тайвшрах цаг болоогүй гэдгийг дурдлаа. Иймээс дахин хоёр жилийн хугацаанд шийдвэртэй арга хэмжээ хэрэгжүүлсэн хэвээр байх шаардлагатай гэсэн мэдээллийг өгсөн юм.
Харин АН-ын дарга С.Эрдэнийн хувьд ОУВС-гийн хөтөлбөрийг ил тод болгож, өнөөгийн эрх баригчидтай хамтран хэрэгжүүлж буй үйл ажиллагаагаа монголчуудад нээлттэй мэдээлэх цаг болсон гэдгийг хэлж байлаа. Тэрээр мөн эдийн засгийн өнөөгийн бодит байдлыг онцолж, үүнийг эрх баригчидтай холбон тайлбарлаж, үүнд шүүмжлэлтай хандаж буйгаа хэлсэн юм. Түүнчлэн эрх баригчид хүүхдийн мөнгө, цалин тэтгэврийн нэмэгдэл зэрэгт байнга ОУВС зөвшөөрөхгүй гэсэн байдлаар тайлбар өгдөг гэдгийг тодотгож байв.
Тухайлбал, “Шулуухан хэлэхэд эрх баригчид тооцоо, судалгаагүй, тухайн үед улс төрийн хожоо харсан хий хоосон амлалтуудаа биелүүлж чадахгүй байх нөхцлөө ОУВС-гийн нэрээр халхавчилж, буруугаа зөвтгөх хэрэгсэл болгон ашиглаж, хэт улс төржүүлж байгааг зориуд хэлмээр байна.” гэсэн шүүмжлэлд ОУВС-гийн ажлын хэсэг “Валютын сангийн үйл ажиллагаатай холбоотой сөрөг дүгнэлтүүд, үйл ажиллагааны ил тод байдлын тухайд манай үйл ажиллагааны төрлөөс хамаараад валютын сан руу хандсан сөрөг мэдэгдлүүд зайлшгүй гардаг. Тэгэхээр түүнийг хүлээж авах бэлтгэлтэй байх ёстой гэж бодож байгаа. Эцсийн дүндээ Монгол Улсын Засгийн газар, эрх баригчид бүх шийдвэрээ гаргах бүрэн эрхтэй байгаа. Манай байгууллага болон бусад хандивлагчдын хувьд туслалцаа, дэмжлэгээ үзүүлэхдээ бидний туслалцаа, дэмжлэг Монгол Улсад тогтвортой байдал бий болгохын төлөө зорилго агуулдаг.” хэмээн хариулав.
Тэгэхээр манай Засгийн газарт тодорхой хувь хэмжээ тулгасан асуудал яриагүй аж. Тэдний зүгээс зөвлөмж өгч, харин тэр хүрээнд ямар шийдвэр гаргаж ажиллах нь Засгийн газрын өөрийн бүрэн эрхийн асуудал юм байна. Байнгын хорооны хуралдаанд УИХ-ын гишүүн, АН-ын дарга С.Эрдэнэ энэ тухай дурдаж, цалин тэтгэврийг нэмэгдүүлэх, хүүхдийн мөнгийг хэдэн хувьд нь олгох тухай асуудлыг хэрхэн шийдэх нь манай Засгийн газрын бүрэн эрхийн асуудал гэдгийг цохон тэмдэглэж байлаа.
