Буддын шашин нь Халимагийн ард түмний хувьд томоохон байр суурь эзэлдэг амьдралын салшгүй нэг хэсэг юм.
1992 оноос эхлэн Халимагийн нутаг дэвсгэрт буддын сүм, хийд барьж эхэлсэн бөгөөд одоогийн байдлаар эдгээрийн тоо 30 хүрээд байна. Халимаг төдийгүй, Орос болон Европтоо хамгийн томд тооцогддог буддын шашины хийд “Бурхан багшийн алтан сүм” Халимагийн нийслэл Элиста хотод байрладаг.
Дээрхийн гэгээн 14-р Далай лам Халимаг улсад 1991, 1992, 2004 онуудад ирж байсан бөгөөд сүүлийн удаа айлчилахдаа уг хийдийн байрлалыг тогтоожээ. Уг үйл явдлын дараагаар удалгүй хийдийн барилгын ажил эхэлсэн бөгөөд жил хүрэхгүй хугацаанд Дээрхийн гэгээн 14-р Далай ламын Орос, Монгол, СНГ орнууд дахь биет төлөөлөгч Тэло Тулку Ринпочегийн удирдлага дор халимагийн ард түмний дэмжилэгтэйгээр баригдаж 2005 оны арванхоёрдугаар сард ашиглалтанд оржээ.
Тэр цагаас хойш тус хийд нь Элиста хот төдийгүй Халимаг улсын томоохон соёлын өвийн нэгээр тооцогдох болсон юм. Тэло Тулку Ринпочегийн үзэж байгаагаар тус хийд болон түүний хамгийн гол үүрэг бол буддын шашиныг Халимаг улсад дахин дэлгэрүүлэн, хөгжүүлэхэд зорих явдал юм.
Үүний тулд лекц, фото зургийн үзэсгэлэн гэх мэт олон төрлийн хөтөлбөрийг тогтмол хэрэгжүүлдэг бөгөөд гол хийдийн загварыг анх гаргахдаа эдгээр үйл ажиллагаануудыг зохион байгуулах бүрэн боломжтойгоор бүтээжээ. Бидний ирээдүй залуу үеийнхний гарт байгаа учираас тэдний үйл ажиллагаа мөн залуучууд руу ихээхэн чиглэсэн байдаг юм байна. Түүний хэлсэнчилэн буддын шашиныг сурталчилахаас илүү буддын шашин гэж юу болох, буддист хүн байх нь ямар учиртай юм, уг шашиныг амьдралдаа хэрхэн ашиглаж болох юм бэ, соёл уламжлал талаасаа хэр чухал үүрэтэй юм бэ гэх мэт зүйлсийг тайлбарлаж ойлгуулах нь илүү чухал гэдгийг онцолсон юм.
Халимагууд бол 400 гаруй жил Оросын газар нутаг дээр амьдарч буй Ойрад гаралтай Монгол хүмүүс юм. Тиймээс тэдний хувьд Монгол эх орон чухал байр суурийг эзэлдэг бөгөөд цаашид Монгол Халимагийн хооронд соёл, боловсрол, түүх, шинжлэх ухаан гэх мэт салбаруудад солилцооны хөтөлбөрүүдийг хэрэгжүүлэхийг эрмэлзэж байгаа юм.
Тэдний үзэж байгаагаар одоогийн нийгэмд Монгол Халимагийн хооронд харилцаа холбоог сайжруулахад эдгээр арга хэмжээнүүд дутагдаж байгаа бөгөөд Халимаг улс нь Монгол улсаас хол зайд оршидог учираас монголчууд халимагийн тал дээр мэдээлэл дутмаг байдагтай холбоотой. Халимагууд хэрхэн аж төрж, Монгол хэл, ёс заншил зэргийг хэрхэн хадгалж үлдсэн талаар сайн мэддэггүй.
Тиймээс солилцооны хөтөлбөрүүд нь халимагийн ард түмэнд Монгол Улстай цаашдаа хэрхэн бат бэх харилцаа холбоотой байх арга замыг нээхэд томоохон ач холбогдол үзүүлэх юм.
