Цагдаагийн ерөнхий газрын дэд дарга бөгөөд Нийслэлийн цагдаагийн газрын дарга, цагдаагийн хурандаа Д.Ядамдоржийн баталсан удирдамжийн дагуу халаасны хулгайн гэмт хэрэгтэй тэмцэх, урьдчилан сэргийлэх, бууруулах чиглэлийн “Халаас” арга хэмжээг НЦГ-ын Халаасны хулгайн гэмт хэрэгтэй тэмцэх хэлтэс, дүүргүүд дэх цагдаагийн хэлтсүүдэд зохион байгуулж байна.
Энэхүү аяны хүрээнд хулгайн гар утас хууль бусаар худалдан авч борлуулдаг ченж гэх этгээдүүд болон халаасны хулгай хийсэн этгээдүүдээс хурааж авсан 200 гаруй гар утасны эздийг олж тогтоох ажиллагаа явагдаж байгаа.
Эдгээр гар утсуудын гар үүсэл, хаанаас авсан нь тодорхойгүй. Тиймээс гар утсаа хулгайд алдсан иргэдийг ирж уулзан, өөрийн алдсан утасны МI кодоор тохируулж өөрийн утсаа олж авахыг цагдаагийн байгууллага мэдээллээ.
200-гаад утаснаас дөнгөж 20 орчмынх нь эзнийг олж тогтоон хүлээлгэж өгсөн
Эрүүгийн мөрдөгч, ахмад Н.Батцэнгэл “Өнөөдөр л гэхэд гар утсаа хулгайд алдсан, танайд хураагдсан утаснууд дунд байж магадгүй” гэсээр арваад хүн ирж уулзлаа. Үнэхээр алдсан утас нь байгаад, өөрийнх нь утас гэдгийг батлах нотлох баримтаа бариад ирвэл бид утсыг нь шууд хүлээлгэж өгч байна. Нотлох баримтгүй бол шууд гар утсыг өгч явуулах боломжгүй юм. Тиймээс иргэд маань гар утасныхаа MI кодыг тэмдэглэж авч байх зайлшгүй шаардлагатай.
Одоогоор дээрх 200-гаад утаснаас дөнгөж 20 орчмынх нь эзнийг олж тогтоон хүлээлгэж өгсөн байна. Харин үлдсэн утаснууд эзнээ хүлээгээд, Нийслэлийн цаглаагийн газрын Халаасны хулгайн гэмт хэрэгтэй тэмцэх газрын албан өрөөнд хадгалаастай байгаа юм.
Хулгайн гар утас худалдаж авдаг ченж гэх этгээдүүдэд Эрүүгийн хуулийн 18.6-д заасны дагуу “Мөнгө угаах” гэмт хэргээр хуулийн хариуцлага хүлээлгэнэ. Энэ хуулиар иргэн хүн гудамжинд явж байгаад хулгайн эд зүйл худалдаж авбал зургаан сараас нэг жил хүртэл хорих ялаар шийтгүүлнэ.
Байнга хулгайн зүйл худалдаж авдаг ченж мэтийн этгээдүүдэд таван жилийн хорих ял онооно. Бүр зохион байгуулалттай хулгай хийлгэж, худалдаж авдаг бол 5-12 жилийн ял өгнө гэж заасан. Тиймээс иргэд та бүхэнд гар утас, эд зүйлээ хулгайд алдсан бол аль болох шуурхай цагдаагийн байгууллагад хандаж байгаарай. Хурдан хандах тусмаа хулгайчийг олох магадлал өндөр байдаг юм байна” гэв.
Ченж нар угаасаа хулгайнх гэдгийг нь мэддэг. “Солгой гарынх уу” гэж асуугаад авдаг
Хулгайч хүүгийн хувьд согтуу байсан бөгөөд байнга архи уудаг, согтуудаа хулгай хийдэг хэмээн ярьж байлаа. Ингээд хүүгээс дараах асуултад хариулт авлаа
-Хаанаас юу хулгайлаад цагдаагийн газар ирээд байна вэ?
-Өнөөдөр Эх нялхсын эмнэлэгт сувилагчийн халааснаас утас хулгайлчихсан. “Жи7” гээд утсыг нь халааснаас нь авчихсан.
-Эх нялхаст байнга очиж хулгай хийдэг юм уу ?
-Үгүй. Анх удаа. Тэнд очиж хулгай хийж болох юм байна гэж толгойд орж ирээд.
-Чи хэдэн удаа хулгай хийсэн бэ?
-Мэдэхгүй. Зөндөө.
-Хулгай хийгээд баригддаггүй юм уу?
-Баригдаад шийтгүүлдэг ш дээ.
-Яагаад хүний юм хулгайлж болохгүй гэдгийг ойлгож ухамсарлахгүй байгаа юм бэ?
-Одоо засрах гээд үзээд л байна.Сургуульд явж байгаа. Кино үйлдвэрийн дээд сургуульд сурч байгаа. Одоо тэгээд та нар биччихнэ биз.
-Тэгээд хичээлээ хийхгүй яагаад хулгай хийгээд байгаа юм бэ?
-Амарч байгаа ш дээ.
-Амрахаараа хулгай хийдэг юм уу?
-Тийм.
– Хулгайлж авсан утаснуудаа хэнд зардаг юм бэ. Таньдаг ченжтэй юу?
-Таньдаг ченж байхгүй. “Монтел”, “Тэди” дээр зогсож байгаа таарсан ченжид л зарчихдаг.
– Үнэтэй утсыг хэдэн төгрөгөөр зардаг вэ?
-200 мянгын утсыг 100-д, үнэтэйг нь үнэтэй л өгнө. 1,5 саяын утсыг 500-д өгчихнө. Ченж нар угаасаа хулгайнх гэдгийг нь мэддэг. “Солгой гарынх уу” гэж асуугаад авдаг.
