Орон нутгийн замд гарч буй зам тээврийн осол, хэргээс урьдчилан сэргийлэх зорилгоор улсын хэмжээнд “Орон нутгийн зам-Хөдөлгөөний соёл 2018” аян зарлах болсон байна. Аяны талаар Замын цагдаагийн алба, Гэмтэл согог судлалын үндэсний төв, Авто тээврийн үндэсний төв, Цагдаагийн ерөнхий газрын алба хаагчид өнөөдөр мэдээлэл хийлээ.
ЦЕГ-ын Урьдчилан сэргийлэх хэлтсийн ахлах мэргэжилтэн хошууч О.Батжаргал “Сүүлийн гурван жилийн байдлаар зам тээврийн ослын 5300 гаруй хэрэг бүртгэгдсэн. Үүнээс нас барсан, гэмтсэн хүмүүсийн 70 гаруй хувь нь орон нутгийн замд осолджээ. Иймд “Орон нутгийн зам-Хөдөлгөөний соёл 2018” аяныг эхлүүлэх гэж байна. Уг арга хэмжээний хүрээнд орон нутагт гарч буй зам тээврийн осол, гэмтлийг бууруулах, замын хөдөлгөөнд оролцогчдын соёлыг дээшлүүлэх зорилгоор тус аяныг хэрэгжүүлж байна” гэв.
ГССҮТ-ийн нийгмийн эрүүл мэндийн албаны дарга Ш.Нансалмаа “Монгол Улсад нас баралтын тэргүүлэх шалтгааны гуравдугаарт осол гэмтэл ордог. Тэр дундаа зам тээврийн ослоос үүдэлтэй нас барж буй хүмүүсийн тоо ихсэх хандлагатай байна. Зам тээврийн ослын дийлэнх нь орон нутгийн замд үйлдэгддэг. Өнгөрсөн оны тоо баримтаас дурдахад, зам тээврийн ослоос 17600 хүн гэмтэж, 540 хүн нас барсан. Дийлэнх нь согтууруулах ундааны зүйл хэрэглэсэн үедээ тээврийн хэрэгсэл жолоодож осолд өртсөн байдаг. Жишээ дурдахад, 2017 онд 26 настай залуу согтуурсан үедээ эхнэрээ ардаа суулган мотоциклтой давхиж яваад, онхолдон нас барсан. Ард нь таван нялх хүүхэд өнчирсөн. Мөн 2018 оны тавдугаар сард согтууруулах ундаа хэрэглэсэн гурван хүн тээврийн хэрэгсэл жолоодсон бөгөөд дотор нь сууж явсан гурван хүүхэд осолд өртсөн харамсалтай хэрэг гарсан. Тэдний хоёр эмэгтэй нь газар дээрээ нас барж, хоёр хүүхэд нь сэхээн амьдруулах тасагт хэвтсэн байдаг” гэлээ.
НОБГ-ын Гамшгаас урьдчилан сэргийлэх хэлтсийн дарга Г.Нэргүй “НОБГ, НЦГ, ЗЦА-ны алба хаагчид бид бүхэн ард иргэдийнхээ аюулгүй тайван амьдралын төлөө хамтарч ажилладаг. НОБГ-ын бие бүрэлдэхүүн энэхүү аяныг дэмжиж ажиллана. Хотын соёлд замын хөдөлгөөний соёл байх ёстой. Замын хөдөлгөөнд соёлтой оролцсоноор иргэн хүний амь насыг хамгаалах, осол гэмтлийг бууруулах олон ач холбогдолтой” гэлээ.
ЗЦА-ны Урьдчилан сэргийлэх хэлтсийн мэргэжилтэн, цагдаагийн ахлах дэслэгч М.Мөнхгэрэл“Цагдаагийн байгууллагаас гаргасан статистик мэдээллээр зуны саруудад зам тээврийн осол нэмэгдэх хандлагатай байдаг. Иймд Замын цагдаагийн албанаас ослыг бууруулах зорилгоор хоёр дах жилдээ энэхүү аяныг зохион байгуулахаар болсон. 2018 он гарсаар улсын хэмжээнд 163 хүний амь нас хохирсон байна. Ослын 76 хувь нь орон нутгийн замд бүртгэгдсэн. Орон нутгийн замд гарч буй осол нь дийлэнхдээ жолооч аюулгүй байдлаа хангаагүйгээс үүдэлтэй гардаг. Иймээс Монгол Улсын гэмт хэргээс зохицуулах зөвлөл, Гэмтэл согог судлалын үндэсний төв, Авто тээврийн үндэсний төв, цагдаагийн байгууллага зэрэг мэргэжлийн байгууллагууд хамтарч энэхүү аяныг зохион байгуулж байна. Тус аян нь зургадугаар сарын 20-ноос эхэлж, ирэх аравдугаар сарын 1-н хүртэл үргэлжлэнэ” гэв.
Мөн энэхүү аянд Монголын мотоциклчдын зөвлөл, Монголын чопперчдийн холбоо нэгдэж буйгаа илэрхийлсэн юм.
