Эрүүл мэндийн ажилчид энэ сарын 21-ны Хөдөлмөр, нийгмийн хамгааллын яамны гадна талбайд жагсаал хийж Ерөнхий сайд У.Хүрэлсүхэд хоёр заалт бүхий шаардлага хүргүүлсэн.Энэхүү шаардлагыг хүлээж авахгүй бол эмч, эмнэлгийн ажилтнууд улс орон даяар ажил хаялт зарлахаа мэдэгдсэн билээ. Ингээд ажил хаялтын талаар Монголын эрүүл мэндийн ажилтны үйлдвэрчний эвлэлийн холбооны дарга Б.Мягмартай ярилцлаа.
-Эмч эмнэлгийн ажилчид цалин хөлс нэмэгдүүлэхээр удаа дараа шаардлага тавьж, жагсаал, суулт хийж тэмцлээ илэрхийлсэн. Гэвч энэ тэмцэл нь үр дүн хүрэхгүй байгаа. Өнгөрсөн долоон хоногт Хөдөлмөр, нийгмийн хамгааллын яамны гадна суулт хийсэн. Энэхүү суултаар асуудлаа шийдэж чадаагүй юм уу?
-Эрүүл мэндийн салбарт ажиллаж байгаа ажилтнуудын цалин хөлсийг нэмэгдүүлэх талаар тэмцэл хийж байгаа боловч бодит үр дүн гараагүй байна. Салбарын ажилчдын нийгмийн асуудалд анхаарах, салбарын яамнаас явуулж байгаа бодлогын ажил болон ажилчдын асуудал гэрээ хэлэлцээрийн зарчмаар хэрэгждэг. Бид олон сар тэмцэл хийж Эрүүл яамтай манай эрүүл мэндийн ажилтны үйлдвэрчний эвлэлийн холбоо нэмэлт хэлэлцээр байгуулсан. Энэхүү нэмэлт хэлэлцээрт цалин хөлс нэмэгдүүлэх, нийгмийн хамгаалал хөдөлмөрийн аюулгүй байдал гэх мэт олон асуудлыг тусгасан. Мөн сувилагчийн хүрэлцээ хангамж, нэмэгдүүлэх чиглэлээр маш үр дүнтэй хэлэлцээр байгуулсан.
Цалин нэмэх асуудал дээр үйлдвэрчний эвлэл, Эрүүл яам харилцан буулт хийж, бидний хүссэн хэмжээнд биш гэсэн ч тодорхой хэмжээнд тооцоог үндэслэж байж хэлэлцээр байгуулсан байгаа. Энэхүү хэлэлцээрийг Хөдөлмөр нийгмийн хамгааллын яам бүртгэхээс татгалзсан. Үүнийг манай салбарын маш их эсэргүүцэж байгаа.
-Хөдөлмөр, нийгмийн хамгааллын яам яагаад бүртгэхээс татгалзсан вэ?
-Хөдөлмөр нийгмийн хамгааллын яам Хөдөлмөрийн хуулиа зөрчиж, хуулийн хүрээнд байгуулагдсан хэлэлцээрийг бүртгэхээс татгалзсан. Хөдөлмөрийн яам төсөвт тусгагдаагүй гэж байгаа. Бид маш олон талаас тооцоо судалгаа хийж байж энэ хэлэлцээрийг байгуулсан. Иймээс энэ хэлэлцээрийг хэрэгжүүлэх бололцоотой үзэж байгаа. Иймээс манай салбарынхан өчигдрөөс эхлээд улс орон даяар ажил хаялт зохион байгуулахаар болсон. Одоогийн байдлаар нийтдээ Улаанбаатар хотын 68, орон нутгийн 17 аймаг ажил хаялтад нэгдэх бүх шийдвэрээ гаргасан байна.
Ажил хаялтаас болж ямар нэгэн асуудал гаргахын бол Монгол Улсын Засгийн газар хариуцах ёстой
-Эмч эмнэлгийн ажилчид ажил хаялт зарлахаар болсон. Энэ нь хууль хувьд хэр боломжтой зүйл вэ?
– Хөдөлмөр, нийгмийн улсын гурван талт хэлэлцээр нэмэлт хэлэлцээрийн 9 дүгээр заалтаар хамтын маргаан үүсгэж, ажил хаялт зарлах эрх нь нээгдэж байгаа. Учир нь Хөдөлмөр яам буюу Засгийн газрыг төлөөлж байгаа нэг тал маань зуучлагчаас татгалзсан. Иймээс арбитрын талыг алгаслаад ажил хаях эрх нь үүсч байгаа. Манай салбарынхан есдүгээр сарыг хүлээхгүйгээр тэмцлээ хийхээр болсон. Монгол Улсын Засгийн газарт итгэл тээж олон хоног тэвчээртэй хүлээсэн. Гэвч бидний үл тоож байгаа учраас улс орон даяар нэгэн зэрэг ажил хаялт зохион байгуулахаар болсон. Өнөөдрийн байдлаар аймаг, сум өрхийн эмнэлгүүд ажил хаялтад оролцохоор мэдээ тайлангаа ирүүлж байгаа.
-Ажил хаялтыг яг хэднээс хийх вэ. Хугацааны хувьд ямар байх вэ. Эмч нар ажил хаяснаас болж ямар нэгэн асуудал гаргавал хэн хариуцлага хүлээлэх вэ?
-Ажил хаялт ирэх долоон хоногоос улс орон даяар нэгэн зэрэг эхэлнэ. Ажил хаялтаас болж ямар нэгэн асуудал гаргахын бол Монгол Улсын Засгийн газар хариуцах ёстой. Бид нийгмийн түншлэлийн зарчмыг баримталж хэлэлцээрийн зарчмаар асуудалд хандсан. Мөн ажил хаялт хийхгүйгээр суултыг зохион байгуулж, төр засагт үгээ хүрэх гэж оролдсон. Иймээс Монгол Улсын Засгийн газар хариуцлагатай хандах ёстой.
-Тэгэхээр ажил хаялтыг ирэх долоон хоногоос нэг дэх өдрөөс эхлэх юм уу?
-Хуулийн хугацаа бол хурал хийсэн өдрөөс хойш таваас доошгүй хугацаанд байгууллагын захиргаа болон тухайн дүүргийн Засаг даргадаа мэдэгдлээ хүргүүлдэг. Мэдэгдэл өгснөөс хойш тав хоног байх ёстой. Ирэх долоон хоногийн лхагва гариг буюу долдугаар сарын 4-нээс эхэлж хугацаагүй ажил хаяна.
-Эмнэлгийн ажилчид ажил хаялт зарлахаар эмнэлэгт хэвтэн эмчлүүлж байгаа өвчтөнүүдийн асуудлаа яаж шийдвэрлэх вэ. Одоо баяр наадам болох гэж байна. Хордлого наршилт зэрэг асуудлууд нэмэгдэнэ шүү дээ?
-Бид энэ асуудлыг олон талаас нь ярилцсан. Тэмцэл хийж байгаа эмч аливаа нэгэн хүний амь нас эрүүл мэндээр нь хохироохгүй байх талаас нь яаралтай тусламж, яаралтай мэс засал, төрөх, гэмтэл, хүүхдийн яаралтай түргэн тусламж гэх зэрэг амь тэмцсэн үйлчилгээг хэвийн явуулна. Хэвийн явуулахдаа энгэртээ ажил хаялтад оролцож байна гэсэн тэмдэг зүүж, ёс зүйгээ эрхэмлэж тусламжаа үзүүлнэ. Харин бусад амбулаторийн болон бусад өдөр тутмын үйлчилгээ бүрэн зогсно.
