Монголын хаана ч цахилгааны монтаж утас ил задгай байж л байдаг. Манайхны ердөө 10-аад хувь нь л далд монтажийг сонгодог. Хэн дуртай нь ойролцоох шонгоосоо дураараа тогны утас татах асуудал хэвийн үзэгдэл шахуу болчихсон. Тэр хэрээр энд тэндгүй дэл сул унжих цахилгааны утаснууд нийгэмд аюул учруулсаар байна. Үүний нэг жишээ хэдхэн хоногийн өмнө Сүхбаатар дүүргийн 7 дугаар хорооны нутаг дэвсгэрт эмийн сангийн төмөр хаалган дээр тогтоосон цахилгааны утсанд 10 настай хүүхэд тогонд цохиулж амиа алдсан эмгэнэлт үйл явдал болсон. Энэ асуудал гарсны дараа холбогдох байгууллагууд нь бүгд өөрсдийн байр суурийг илэрхийлсэн. Тухайлбал, Нийслэлийн мэргэжлийн хяналтын газар “Мэргэжлийн хяналтын газраас албан байгууллагуудад хяналт, шалгалт байнга хийдэг ” гэсэн. Харин УБЦТС ТӨХК “Цахилгаанаар хангаж байгаа байгууллага биш, харин хэрэглэгчид өөрсдөө аюулгүй байдлаа хангах ёстой байдаг” гэдэг тайлбарыг өгч байлаа.
Эрдэнэт хүний, тэр дундаа ирээдүй болсон хүүхдийн амь эрсдээд байхад асуудлыг өөрсдөөсөө зайлуулах холбогдох байгууллагууд нь ийм тайлбараар бултаж, бурууг бусдад түлхэж байгаа нь ч эмгэнэл. Тэгвэл хяналт шалгалт хийгдсэн ч аюул нүүрлээд байгаа нь хэний буруу вэ? Хувь хүмүүс, аж ахуйн нэгжүүд ч энэ асуудлаас бултах учиргүй.
10 настай хүүхдийн амь эрсэдсэн асуудал ид өрнөж байтал өнгөрсөн амралтын өдөр буюу зургадугаар сарын 30-ны өдөр Баянзүрх дүүргийн 26-р хорооны нутаг дэвсгэрт орших Үндэсний цэцэрлэгт хүрээлэнд 9 настай “Т” гэх охин бас тогтой утсанд хүрч биед нь гэмтэл учирчээ. Одоогоор Гэмтэл Согог Судлалын Үндэсний Төвд хэвтэн эмчлүүлж байгаа. Мэргэжлийн байгууллага шалгалтыг байнга хийгээд байхад гарч байгаа зөрчил яагаад арилгахгүй байна вэ? Зөрчлийг хэзээ бүрэн арилгадаг болох вэ?
Энэхүү цахилгааны ил монтажийн утсаас болж ахиад хэн нэгэн санаандгүй хүрэхийг бид таашгүй. Иймээс энэ бүхнийг цэгцлэх цаг нь болжээ. Нийслэлийн хаана ч явсан унжсан цахилгааны утсууд нүднээ ил салбайна. Энэ бол аюул. Манайхан аливаа осол гэмтэл гаргахаас өмнө урьдчилан сэргийлэхгүйгээр аливаа эрсдэл гарсны дараа л гэнэт ухаан орж, арга хэмжээ авахаар шуурч эхэлдэг. Гэхдээ энэ шуурга нь ч түр зуурынх. Одоо энэ байдлаас салж, аливаа осол гэмтэл гарсны дараа биш гаргахаас урьдчилан сэргийлдэг болох хэрэгтэй байна.
Нийслэлийн Сүхбаатар дүүргийн 11 дүгээр хорооны нутаг дэсгэрийн хэсэгхэн орчим ил задгай цахилгаан утас цөөнгүй харагдаж байна. Үүнийг хэн хэзээ цэгцлэх вэ? Цэгцлэх хүртэл хэчнээн амь хэрэгтэй вэ?
Дашчойлин хийдийн урд талын байр
Дашчойлин хийдийн зүүн хойд талын явган хүний зам
