Шадавлингийн зусланг мэдэхгүй хүн байхгүй. Энэ уужим дэлгэр ам нь битүү мод ургамлаар хучигдсан ёстой л диваажин гэмээр газар байсан гэдэг. Энэ ам дээшээ өгсөхөөр гурав салаалдаг. Гурван салаа амын уулзах бэлд хэсэг хусан төгөлтэй, хуснуудын дундаас Шадавлингийн рашаан ундардаг байв. Тэр рашаан булагийн зүүн талаар хошуурч тогтсон хадтай өндрийн энгэрт ганц өнчин сагалгар мод бий. Шадавлингийн хийдээс үлдсэн ганц шүтээн хэмээн хүмүүс хадаг яндар, судар ном зүүсээр одоо мөчир шилмүүс нь даахаа больсон байдаг. Энэ модны дэргэд хадтай толгойн энгэр дээр Шадав гэж гэлэн хүний байгуулсан цөөн хэдэн дуган сүмтэй бэсрэг хийд байсан юм гэнэ. Тэр гэлэнгийн нэрээр Шадав ламын хийд л гэдэг байсан юм гэдэг.
Эрхэм ламтан өндөр дээд зэрэг хэргэм авч Шадав гэлэн болсноос хойш Шадав гэлэнгийн хийд гэх болж. Тэр нь цагийн саалтад сунжирсаар Шадав лингийн хийд болж тухайн ам, уул ус, булаг шанд бүхлээрээ Шадавлин хэмээн нэрлэгдэх болсон юм гэдэг.
Ганц модны ойр орчимд дуган сүм байсны ул мөр бий. Газрын хөрсөн дээр эртний барилга байшингийн хүрэн улаавтар өнгөтэй шавар, туйпууны хэсэг, ваар савны хэлтэрхий цухуйж байдаг.
Ихэнх сүм хийдийг ажиглахад заавал нэг рашаан булаг, уулын гол горхийг түшиглэн байгуулагдсан байдаг. Гол нь тэдгээр рашаан булагууд хүний биед олон талын нөлөөтэй, төрөл бүрийн өвчнийг илааршуулдаг байсан нь гайхалтай.
