Манай сурвалжлах баг өнөөдрийн сурвалжлагаараа залуус чөлөөт цагаа хэрхэн өнгөрөөж байгааг сонирхохоор Үндэсний цэцэрлэгт хүрээлэнг зорилоо. Зуны аагим халуун өдрүүд эхэлж, өдөр нь хэт халж байгаа учраас хэн хүнгүй нар буухыг хүлээх болжээ.
Тус цэцэрлэгт хүрээлэнгийн машины зогсоол цагийн 1000 төгрөгийн төлбөртэй юм байна. Энд харин наадам болж буй мэт хөл хөдөлгөөн ихтэй байв. Дулаарснаас хойш Цэцэрлэгт хүрээлэнг зорих хүмүүсийн тоо ихэсчээ.
Цэцэрлэгт хүрээлэн 22 төрлийн 110 мянга гаруй мод буттай, зүлэг, цэцэг, унадаг дугуйн зам, 40 метрийн голчтой, 360 градус эргэн оргилдог усан оргилуур, 24 метр өргөн, 230 метр урт боржин чулуун талбай, 30 уран баримал, хүүхдийн болон спортын талбай, 2.5 км гүйлт, цанын зам болон 40×40 хэмжээтэй мөсөн гулгуурын задгай талбайтай гээд магтах зүйл ихтэй юм.
Хаа сайгүй хүүхэд цангинаж орилолдох дуу сонстож байв. Цэцэрлэгт хүрээлэнгийн төв хаалга руу ороход үүднээс нь эхлээд л худалдаа, наймаа эхэлжээ. Тэнд хөгшин залуу, хүүхэд гээд нийслэлийн бүх л хүн цугласан байна. Удирдлагатай машиныг хүүхдүүдэд таван минутыг нь хоёр мянган төгрөгөөр унуулж байна. Тэнд ирсэн хүүхэд болгон л сонирхон тоглож байгаа нь харагдав. Залуус хоорондоо бооцоотой дартс шидэн тоглох ажээ. Хажууханд нь хөөсөн чихэр, бембөлөг зарж байв.
Үндэсний цэцэрлэгт хүрээлэн дээр ирээд дугуйн прокат руу очлоо. Таван хүний том дугуй нэг тойроход 10 мянган төгрөг бол дөрвөн хүнийх нь долоон мянган төгрөг аж. Дугуйг олуулаа жийх боломжтой учраас хөл цуцах зовлонгүй байдаг гэнэ. Хоёр болоод гурван цуваа дугуй, эрэгтэй, эмэгтэй, хүүхдийн гээд олон сонголт байгаа аж.
Тэнд хүмүүс зогсоо зайгүй хүмүүс дугуй прокатлаж байгаа нь харагдав. Тэндхийн ажилчдаас хэр их хүн үйлчлүүлдэг талаар асуухад өдөр халуунд мэр сэр хүн байна. Гэхдээ л хүн ерөөсөө тасардаггүй юм. Орой 20.00 цагаас хойш үйлчлүүлэгч ихтэй болдог хэмээж байв.
Тус дугуйн зам дээр хүмүүс өөрсдийн дугуйгаа авчирч унадаг бөгөөд өөрийнхөө дугуйтайгаа ирсэн залуус ч бас харагдав. Энэ завсар мөн гүйлтийн замаар олон хүн гүйж байгаа харагдав. Гэхдээ голдуу ахмад хүмүүс ажээ. Тэд хөдөлгөөн хийхээр энд ирж гүйдэг юм байна.
Цэцэрлэгт хүрээлэнд хоол, зууш, хүүхдийн тоглоом, худалдаа, үйлчилгээ гарсан байв. Баянзүрх дүүргийн 10 хорооны иргэн Ж.Дондог “Хүүхдүүдтэйгээ салхилах гээд ирсэн юм. Одоо л агаар салхи нь таараад сайхан байна. Залуучууд болоод гэр бүлээрээ чөлөөт цагаа зөв боловсон өнгөрүүлдэг ганц газар нь энэ болж байх шиг. Үүнд сэтгэгдэл өндөр байгаа. Залуус, хүүхдүүд их ирдэг учир орчин нөхцөлийг нь сайжруулж, үйлчилгээний газрыг ганц нэгээр нэмэгдүүлбэл зүгээр юм шиг санагдаж байна. Агаар, мод бут, зүлэгний үнэр, төв талбайн хажуугаар суурилуулсан түшлэгтэй сандлууд, гэрэл, цэцэгс нь сайхан юм. Үзэх харах зүйл олонтой, зугаалах талбай нь ч том болохоор олон цагаар саатчихаад буцдаг юм” гэж ярив.
Үндэсний цэцэрлэгт хүрээлэн нь 1,280 га газар нутагтай, амралтын өдрүүд болон баяр ёслолын үеэр 10 мянга орчим хүн үйлчлүүлдэг бөгөөд Баянзүрх дүүргийн 26 дугаар хорооны нутаг дэвсгэрт үйл ажиллагаа явуулдаг юм байна. Бид тус цэцэрлэгт хүрээлэнд ТҮЦ ажиллуулан амьжиргаагаа залгуулдаг н.Энхбаяртай хүрээлэнгийн үйлчилгээний талаар цөөн хором ярилцав.
Үндэсний цэцэрлэгт хүрээлэнгийн үйлчилгээний талаар та санал бодлоо хуваалцана уу?
Ер нь Үндэсний цэцэрлэгт хүрээлэнгийн үйлчилгээ зүгээр. Тийм ч муу биш.
Хүмүүс энд хэр их ирдэг вэ?
Хүмүүс наадмаас хойш бол багасчихдаг юм. Хавартаа бол өвөлжингөө гэртээ суусан хүмүүс салхилах гээд маш их ирдэг. Өвөл энд ямар ч үйл ажиллагаа явагддаггүй. Ерөнхийдөө хүүхдийн зуны амралт эхлэхээр 6 сард хөл хөдөлгөөн ихтэй байдаг. 7-р сард тийм ч их хүнтэй байдаггүй. Хагас бүтэн сайнд хүмүүс мэдээж амарч салхилах гээд ирэлгүй яахав. Үнэнийг хэлэхэд өнөөдөр Улаанбаатар хотод ийм амралт зугаалгийн цэцэрлэгт хүрээлэн хуруу дарам цөөн байна. Харин хүмүүсийн сэтгэл ханамжийн хувьд бол монголчууд салхинд гарах газар багатай болохоор их цангамал байдаг юм болов уу гэж боддог. Тийм болохоор иймэрхүү цэцэрлэгт хүрээлэнгүүдийг нэмж байгуулвал уул нь зүгээр болов уу.
Та бүхэн Үндэсний цэцэрлэгт хүрээлэнгийн захиргаатайгаа хэр хамтарч ажилладаг вэ?
Мэдээж энд үйл ажиллагаа явуулж буй аж ахуйн нэгжүүд тус байгууллагатай хамтарч ажиллахаас өөр аргагүй. Захирал нь өөрөө залуу хүн болохоор залуучуудыгаа их сонсож дэмждэг гэж хэлж болно.
Өмнө нь тус цэцэрлэгт хүрээлэнд гар дээрээс худалдаа наймаа хийдэг хүмүүс их болсон, зарим нь бүр бараан захтай адилхан болсон гэсэн яриа гарсан байсан. Энэ хэр үнэний ортой вэ?
Ер нь бол мэр сэр байгаа. Гэхдээ С.Эрдэнэтуул даргыг энд томилогдож ирснээс хойш тийм асуудал багассан гэж үзэж байна. Хүрээлэнгийн захиргаанаас ч энэ тал дээр нэлээдгүй сайн анхаарч ажиллаж байгаа.
Тэгвэл согтуу хөлчүү хүмүүс энүүгээр хэр их байдаг вэ?
Угаасаа Үндэсний цэцэрлэгт хүрээлэнд үйл ажиллагаа явуулж буй аль ч ТҮЦ, хуушуурын цэг архи тамхи зардаггүй, зарах хориотой байдаг. Тийм болохоор энд архи уух гэж зорьж ирдэг хүмүүс байхгүй.
Танайх хэр ашигтай ажилладаг вэ?
Мэдээж манайх улстай гэрээ байгуулаад зөвшөөрлийг нь аваад үйл ажиллагаа явуулж байгаа болохоор тодорхой хэмжээний ашигтай ажилладаг. Ер нь л бол боломжийн гэж хэлж болно.
Цаашдаа Үндэсний цэцэрлэгт хүрээлэнг хэр тохижуулаасай гэж та боддог вэ?
Ерь нь Үндэсний цэцэрлэгт хүрээлэнгийн тохижолт үйлчилгээ өдрөөс өдөрт нэмэгдэж аятайхан болж байгаа. Маш олон бүтээн байгуулалт хийгдэж байна. Цаашид ч хийгдэх байх гэж найдаж байна.
