Д.Батсүх: Даншиг наадам үзэхээр ирэх жуулчдын тоо өссөөр байгаа

Монголын бурхан шашны төв Гандантэгчэнлин хийдийн хурлын танхимд өнөөдөр “Даншиг наадам-Хүрээ цам 2018” үйл ажиллагаа зохион байгуулах талаар мэдээлэл хийлээ. Тодруулбал, Эв нэгдлийн бэлгэдэл, үндэсний уламжлалт шашин соёлын зан заншлыг хадгалсан “Даншиг наадам-Хүрээ цам 2018” ирэх сарын 4, 5-ны өдрүүдэд Хүй долоон худагт болно.
Гандантэгчэнлин хийдийн цамын менежер С.Ишцог “Их хүрээ цам нь хутагт, хувилгаад, лам хувраг, ноёд түшмэд, сүсэгтэн олны хамгийн ихээр зорьж залбирах шашин номын хамгийн чухал зан үйлийн нэг болж хөгжсөн юм. Хүрээ цамд Монгол түмнийг даан болгоогч хүч чадлын эзэн Очирваань бурхны дүр, цуран хошин, инээдэмт арш Цагаан өвгөний дүрээс гадна дөрвөн дагшин уулын уулын эзэд болох хангарьд, гахай, нохой, хөх өвгөн нарын дүрүүд гардгаараа их онцлогтой.
Цам нь бурхан шашны бага таван ухааны нэг бүжиглэлийн ухаанд багтана. Мөн нууц тарнийн ёс буюу Очирт хөлгөний ёсны анхааран авлагын амирлангуй, дэлгэрэнгүй, эрхэндээ хургаагч, хатуу үйл хэмээх дөрвөн үйлээс хатуу үйлд багтдаг. Тиймээс цам нь буяныг эрхэмлэгчийн сүсгийг арвитгаж, нүгэлт нугуудын зүрхийг шимшрүүлдэг үйл юм.
Монголын бурхан шашны төв Гандантэгчэнлин хийдээс Их хүрээ цамыг 1999 онд Д.Данзан, С.Сэрээтэр нарын эрдэмт хуврагуудын удирдлагаар эртний уламжлал ёсны дагуу бүрэн сэргээн гаргаж байсан. Үүнээс хойш олон жил завсардсаны дараа Их хүрээ цамыг “Даншиг наадам-Хүрээ цам”-ын үеэр дахин сэргээж гаргах болсон юм. Энэ жил дөрөв дэх удаагаа наймдугаар сарын 4, 5-ны өдрүүдэд Хүй долоон худагт зохион байгуулагдана. Мөн Гандантэгчэнлин хийдэд Жахар цамын хурал 2-ноос 6-ны өдрүүдэд хурна” гэв.
Нийслэлийн аялал жуулчлалын газрын дарга Д.Батсүх “Наадмыг үзэхээр ирэх жуулчдын тоо өссөөр байгаа. Өнгөрсөн жил гэхэд зохион байгуулалтын зардал 200 гаруй сая төгрөг зарцуулсан бөгөөд Даншиг наадмыг жуулчид ихээр үзэж сонирхдог учраас гаргасан зардлаа нөхдөг. Аялал жуулчлалаар зардлаа нөхөж чаддаг гэж ойлгож болно.
Наадмын гол хэсэг болох Хүрээ цам нь дэлхий нийтэд ховордоод байгаа зан үйл. Монголын ард түмний үндэсний урлаг соёлын томоохон хэсэг болж хэдэн зуун жилийн турш хөгжсөөр өнөөг хүртэл уламжлагдан ирсэн гайхамшигт өв” хэмээн тодотголоо.