Г.Уянга: Ерөнхий сайдтай бас Ерөнхийлөгчтэй хариуцлага тооцъё

 

 

УИХ-ын чуулганы нэгдсэн хуралдаанаар \”Сонгогдсон болон томилогдсон төрийн өндөр албан тушаалтанд хариуцлага хүлээлгэх тухай” болон холбогдох бусад хуулийн төслүүдийг хэлэлцээд гишүүдийн 87.9 хувь нь Төрийн байгуулалтын Байнгын хорооны саналыг хүлээн авах боломжгүй хэмээн үзлээ. Ингэснээр Ерөнхийлөгчийн санаачилсан уг хуулийн төслүүдийг УИХ-аар хэлэлцэхээр болж анхны хэлэлцүүлгийг Төрийн байгуулалтын Байнгын хороогоор хийлгэхээр  болов.

Хууль санаачлагчийн хувьд Ерөнхийлөгч Ц.Элбэгдорж чуулганы хуралдаанд суусан бөгөөд гишүүд түүнээс асуулт асууж, хариулт аван, мөн санал хэлсэн юм. Тухайлбал УИХ-ын гишүүн Д.Ганбат \”Ардын нам, Ардчилсан нам хоёр бол гэрээр бол хоёр багана нь. Намтай хариуцлага тооцдог, попуудтай хариуцлага тооцож болдоггүй. Хэлж байгаа үг нь ард түмэнд хэрэгтэй юм шиг сонсогддог боловч, түүнээс нь үүдээд ард түмний амьдрал унасан байдаг. Монгол Улс одоо 70 сая долларын өрөнд унасан байна. Тухайн хариуцлага алдсан намаар нь төлүүлэх ёстой. Энэ заалтыг Хариуцлагын хуулиар оруулж ирэх ёстой. Нөгөө хүн нь явдаг, нам нь үлддэг. Нам дээр нь хариуцлага тооцож, ард түмэнд олон жил төлөвшсөн намууд ингэдэг юм байна гэдгийг харуулах ёстой. Энийг Ерөнхийлөгч орхигдуулсан байна” хэмээсэн бол сөрөг хүчний зүгээс Монголбанкны ерөнхийлөгчид хариуцлага тооцох асуудлыг нэг мөр болгож оруулж ирэх санал гаргасан юм.

Тэгвэл З.Баянсэлэнгэ гишүүн үг хэлэхдээ уг хуулийн төсөлд дутуу зүйл их байгааг онцлоод \”УИХ-ын гишүүнд л гэхэд хоёр жилийн хугацаатай хариуцлага тооцох юм байна. Гэтэл УИХ-ын гишүүн дөрвөн жилээр сонгогддог. Үлдсэн хоёр жилд нь хариуцлага алдсан гишүүнээ яах вэ” хэмээсэн.

Мөн УИХ-ын гишүүн Г.Уянгын хэлсэн үг зайлшгүй анхаарал татаж байсан юм. Тэрээр \”Эхлээд хууль санаачлах ёс суртахууны эрхтэй болоё. Тэхгүйгээр энэ бол хоосон хууль, энэ бол популист хууль. Хариуцлага тооцох систем одоо ч үйлчилсээр байгаа. Харин ч Ерөнхийлөгчийн санаачилсан энэ төслөөс харьцангуй гайгүй байгаа. Санаачилсан хуулийн 9.1.2-т байна, тангаргаасаа няцаж, Үндсэн хууль, бусад хууль, Ерөнхийлөгчийн бүрэн эрхийг зөрчсөн эсэх асуудлыг Ерөнхийлөгчийг огцруулахдаа Улсын Их Хурлын гишүүдийн гуравны нэгээс доошгүй нь албан ёсоор санал тавина гэж байна. Жишээлбэл өнөөдөр бол ганц гишүүн санал тавиад Байнгын хороогоор оруулаад хэлэлцүүлээд Үндсэн хуулийн Цэц рүү явуулах бололцоотой байгаа. Гэтэл энэ босго жишээ нь Ерөнхийлөгч дээр өндөрссөн байна. Засгийн газрын гишүүн дээр өндөрссөн байна. Гэх мэтээр асуудлууд байнаа. Одоогийн энэ системээ ашиглаж хариуцлага тооцож чаддаг гэдгээ харуулъя. Одоо болтол хууль зөрчөөд Эрүүл мэндийн сайдаа томилохгүй, зуу зуугаар нь нялхсыг үхүүлж байгаа Ерөнхий сайдтайгаа хариуцлага тооцъё. Хариуцлага тооцох бэлэн механизм байна шдээ.  Эндээсээ л эхлэе л дээ. Хуулиа зөрчөөд, Үндсэн хуулиа зөрчөөд Шүүхийн шийдвэр гараагүй байхад дундуур нь ороод уучлал үзүүлчихсэн Ерөнхийлөгчөөсөө хариуцлага тооцчихъё л доо. Одоо ганц гишүүн энийг тавих бололцоотой байгаа. Одоо байгаа механизмаа бид нар яагаад ашиглаж чадахгүй байгаа юм бэ. Одоо байгаа хуулиа хэрэгжүүлж улаан цайм хууль зөрчсөн хүмүүстэйгээ хариуцлага тооцчихъё” гэсэн юм.

 

Politik.mn