Дорнод аймгийн Хэрлэн сумын Засаг даргын захирамжууд “элэг авах нь”

 

Манай
дарга удирдлагууд сонин жигтэй, инээдтэй ч гэмээр захирамжууд гаргах нь бий.
Гэхдээ л Дорнод аймгийн Хэрлэн сумын /Чойбалсан хот/ Засаг дарга П.Мөнхтөрийн захирамж
шиг \”хөгжилтэй”-г хэзээ ч харж байсангүй.

 

Түүний 2015 оны
наймдугаар сарын 25-ны өдөр гаргасан А/261 дугаарт захирамжаар Хэрлэн сумын
хүүхдүүдийг гараа угаах, шүдээ угаах, дулаан хувцаслах, үнэнч шударга байлгах
тухай зааж өгчээ. Түүнээс гадна хүүхдийн кальц, уургийг дутагдлаас урьдчилан
сэргийлэх зорилгоор өглөө бүр \”Бөднө” шувууны өндөг хоёр ширхэгийг идүүлж хэвшүүлэх
тухай заасан байна.

 

 

 

 

Мөн захирамжийн
хэрэгжилтэд хяналт тавьж, хэрэгжүүлэх ажлыг тус сумын ЗДТГ-ын дэргэдэх
Боловсрол, соёлын асуудал хариуцсан мэргэжилтэнд даалгасан байна. Тэгэхээр
Засаг даргаас даалгавар авсан мэргэжилтэн хүүхэд бүрийг гараа угааж байгааг мөн
өдөрт гурван удаа шүдээ угааж байгааг хянах юм байна. Үүнээс гадна өглөө бүр
хоёр шиг өндөг, тэр тусмаа \”Бөднө” шувууны өндөг идэж байгаа эсэхд нь хяналт
тавих нь байна шүү дээ. Эндээс Засаг
дарга өөрөө \”Бөднө” шувууны өндөгний бизнес эрхэлдэг ч байж болох юм гэсэн
дүгнэлт хийж болж байна. Ер нь мундаг захирамж байгаа биз. Эсвэл \”хөгжилтэй”
гэсэн тодорхойлолт тохирох юм уу.

Ингээд Чойбалсан
хотын хүүхдүүд Засаг даргынхаа захирамжийн ачаар шүд цооролгүй, гар цэвэр,
кальц дутагдалгүй болох нь дээ. Харин сумын ЗДТГ-ын дэргэдэх Боловсрол, соёлын
асуудал хариуцсан мэргэжилтэн л хяналт тавьж, хэрэгжүүлэх гэж гүйгээд туйлдаж
гүйцэх болов уу.

Чойбалсан хот 43000
гаруй хүн ам, 9000 гаруй айл өрхтэй. Харин нэг мэргэжилтэн маань өглөө бүр 9000
айлын хаалга тогшиж, айлын хөргөгч бүрийг шалгаж, Бөднө шувууны өндөг байгаа
эсэх, өөр өндөгөөр оруулж болзошгүй этгээдийг тогтоох, үүнээс гадна хүүхдүүд
шүдээ, гараа угааж байгаа эсэхийг шалгах нь байна. Маш хэцүү үүрэг даалгавар
ноогджээ гэж ойлгогдож байна. Ер нь даргын захирамжийн биелэлт тун хангалтгүй
байх болов уу гэж харагдаж байгаа юм. Эсвэл даргын захирамжийг хэрэгжүүлэх
албан тушаалд орон тоо нэмэх шаардлага гарч ирж байна.

Тэгвэл П.Мөнхтөр
даргын дараагийн захирамж бүр ч хөгжилтэй. Тус суманд шинээр гэр бүл болж буй
хосууд бүгд \”Хамтын хариуцлагын гэрээ” гэгч зүйлийг байгуулж, түүнийгээ
нотариатаар батлуулсан байх ёстой гэж заажээ.\” Хэрвээ бид салвал автомашин
минийх … индүү чинийх… танайхаас ирсэн шар скаб чинийх … манайхаас ирсэн
модон сандал минийх …” гэх мэтчилэнгээр гэрээ байгуулж улмаар нотариатаар
дээрх эд хөрөнгөө баталгаажуулаад тамга даруулсны дараа хуримаа хийх ёстой болж
байна л даа.

 

 

Үүнийг хөгжилтэй гэхээс өөр юу гэмээр ч юм бэ дээ. Ер нь ийм
захирамж гаргаж байгаа хүнийг хийх юм аа олж яджээ гэж хэлэхээс гадна эрүүл
эсэхийг нь шалгуулсан ч болохгүй гэх зүйлгүй гэх сэтгэгдэлийг төрүүлж байна.

                                         Манай дарга нар
гаргаж буй шийдвэр, захирамжаа эргүүлж хардаг л байгаа даа. Эсвэл төрийн ажил
хийсэн нэртэй оромдоглоод суудаг юм биш биз.

Амар