Ханиад томууны дэгдэлтийн үед эцэг, эхчүүдийн өргөнөөр хэрэглэдэг “Виферон” лаа нь эмчилгээний үр дүнгүй бөгөөд дархлаа бууруулдаг болохыг тогтоожээ. Тус эмийг ДЭМБ-аас эмчилгээний үр дүн нь батлагдаагүй, олон улсад бүрэн судлагдаагүй гэж үзэн зөвшөөрдөггүй байна. Гэтэл Монгол Улсад 2010 оноос хойш Эрүүл мэндийн сайдын захирамжаар худалдааж байсан бөгөөд Эрүүл мэндийн даатгалын сангийн хөнгөлөлт хүртэл үзүүлдэг байжээ.
Тухайлбал, 2016 оны гуравдугаар сарын 25-нд “Виферон” лааг Эрүүл мэндийн даатгалын сангийн хөнгөлөлттэй олгох эмийн жагсаалтад багтааж, 80 хувийн хөнгөлөлт үзүүлж эхэлсэн байна. Ингэхдээ ЭМД сангаас 2016 онд 1.9 тэрбум төгрөг төсөвлөсөн байгаа юм. Мөн 2017 онд 2 тэрбум, 2018 онд 92 сая төгрөгийг тус бэлдмэлд зарцуулахаар төсөвлөсөн байна.
Одоогоор 91 мянга гаруй иргэн хөнгөлөлтөөр тус эмийг авч хэрэглэсэн бөгөөд тэдний 50-иас илүү хувь нь хүүхэд байсан гэдэг дүн мэдээг эх сурвалж өглөө.
Энэ мэдээлэл цацагдсны дараа ЭМЯ-ны мэргэжилтнүүд албан ёсны тайлбар өгч, тус эм бэлдмэлийг шалгах ажлын хэсэг гарсан тухай мэдээлэл хийв.
ЭМЯ-ны мэргэжилтэн “Томуу өвчний үед хэрэглэх зааваргүй эм. ЭМЯ-нд ирүүлсэн тайлангаас харахад үр дүнтэй гэсэн хангалттай нотолгоогүй гэж дурдсан. Улсын эмнэлэгт боломжийн үнэтэй эм нэвтрүүлэх хүрээнд хэрэгжсэн төслийн хүрээнд анх энэ эмийн чанар, аюулгүй байдлын асуудал хөндөгдөж эхэлсэн байдаг” хэмээн мэдээлэл хийсэн байна.
Монгол улсад бүртгэгдсэн нийт эмийн 67 хувь нь импортоор орж ирдэг. Эдгээр бүх эм чанарын шаардлага хангаж, эрүүл мэндэд сөргөөр нөлөөлөхгүй гэдэг баталгааг ЭМЯ гаргах учиртай. Гэвч хүүхдийн дархлааг сулруулдаг, ханиад томуунд ямарч нөлөөгүй эмийг сүүлийн хоёр жилийн хугацаанд хөнгөлттэй эмийн жагсаалтад оруулж, 4 тэрбум орчим төгрөгийн санхүүжилт хүртэл олгочихсон байгааг харахад ЭМЯ тун хариуцлагагүй ажиллажээ гэж үзэхээр байна.
Одоо манайд ДЭМБ хүлээн зөвшөөрдөггүй хэчнээн эм бэлдмэл худалдаалагдаж байгаа вэ. Энэ тоог ЭМЯ тун яаралтай гаргаж, биед сөрөг нөлөөтэй эм бэлдмэл зарсан, худалдан борлуулсан эмийн бүтээгдэхүүн худалдаалдаг байгууллагууд, тэдний нөлөөнд автаж буруу шийдвэр гаргасан албан тушаалтнуудад хариуцлага тооцох хэрэгтэй. Эм бол хүний эрүүл мэндтэй шууд холбогдох бүтээгдэхүүн. Ийм бүтээгдэхүүнд онцгой анхаарал хандуулах учиртай. Гэтэл сөрөг нөлөөтэй эмийг хориглохын оронд бодлогоор дэмжиж, хөнгөлөлттэй эмийн жагсаалтад оруулж, санхүүлжилт хүртэл олгосон ЭМЯ-ныханд урам хугарч байна.
