Бразилийн интерпренор/зохиогч дэлхийн өөрчлөгдөн хувьсаж байгаа нийгэм эдийн засгийн байдлыг өвөрмөцөөр харж дүгнэснийг толилуулья. Бид одоо ч гэсэн гайхамшигт зүйлс болоод байгааг анзаарахгүй байна. Хэдэн сарын өмнө би өөрийгөө нийгмээс тусгаарлаж, тэр цагаас хойш юмсыг өөрөөр харж эхэллээ. Энэ үзэл баримтлалыг дийлэнх хүмүүс анзаарахгүй байгаа. Дэлхий яагаад өөрчлөгдөж байгаа юм бол? Өөрийн бодсоноор хэдэн шалтгааныг энд би бичье.
1. АЖИЛ ЭРХЛЭЛТИЙН ХОЦРОГДСОН ЗАГВАР
Ажил эрхлэгчид өөрийн хязгаартаа тулжээ. Том корпорац/группүүд ажиллагсдынхаа ажлыг урагшлуулахад хүндрэлтэй болсон. Ажил эрхлэгчдэд хийж буй ажлынх нь жинхэнэ зорилго дутуу мэт санагдаж байна. Хүмүүс энэ циклээс гарахыг үнэхээр хүсч байна. Тэд залхаж, хямарч, хүчээ шавхаж дууссан.
2. БИЗНЕС ЭРХЛЭЛТИЙН ӨӨРЧЛӨЛТ/CHANGING in entrepreneurship/
Хэдхэн жилийн өмнө олон мянган бизнес эрхлэгчид тэрбум долларын ашиг авчрах гайхалтай санаагаа гараашдаа эхлүүлж байсан бөгөөд тэд хөрөнгө оруулагчдыг хайсаар санаагаа хэрэгжүүлж эхэлсэн. Дэлхийн Цомын эзэн болсон мэт байсан ч дараа нь юу болов?
Тэд эргээд л бусдын ажилтан болсон. Дахиад л зорилгын чинь санааг өчүүхэн ч ойлгохгүй, бүхнийг мөнгөөр хөрвүүлж ойлгодог хүмүүстэй хамтдаа нэг эгнээнд оржээ. Эргээд л мөнгө жинхэнэ жолоодогч болсон. Үүнээс болж олон хүн зовж шаналж байгаа бөгөөд анхны санааг гаргагчид эцэс төгсгөлгүй мөнгөний араас гүйсээр цөхөрсөн. Бидэнд дахиад шинэ бизнесийн гарааны загвар хэрэгтэй боллоо.
3. ХАМТЫН АЖИЛЛАГАА/НЭГДЭЛ
Ганцаараа яваад утгагүй гэдгийг олон хүн ухаарч байна. Хамтын ажиллагаа, бусаддаа өгч хуваалцаж, тусалж, гар гараа сунган нэгдэн нийлж байгаа нь олон хүний нулимсыг унагаж, урам зоригийг өгч байна. Энэ үнэхээр гайхамшигтай.
4. ИНТЕРНЭТИЙН ЖИНХЭНЭ ХҮЧ
Бид одоо л интернэт ямар үүрэгтэй байсныг ухаарч эхэллээ. Олон жилийн дараа л юу болохыг бид ойлголоо. Энэ бол эрх мэдэл юм. Интернэтийн тусламжтай дэлхий танд нээгдэж, бүхий л саад бартаа, хаалт хашилтууд үгүй болж байна. Хамтын ажиллагаа тус дэм үүгээр дамжин биеллээ олж байна.
Энэ ч шалтгаанаар Араб Спрингс, Хятад, Умард Солонгос зэрэг улсууд хүн ардаа хяналтаас гаргахгүйн тулд интернэт хэрэглээг хязгаарлан хорьж байгаа юм. Манай улсад харин үүнийг гайхамшигтай хэрэгсэл болгон ашиглаж байна. Одоо үед ТВ, сонин зэргийг хэрэглэх нь эрс буурсан бөгөөд чамд юу өгч байгааг бус чи өөрөө юу мэдэхийг хүсч байна түүнийгээ дуртай газраасаа, хүссэн цагтаа олж мэдэх боломжтой боллоо. Интернэтийн тусламжтай дорой нэгэн, цөөнх нэгэн дуу хоолой, санаа бодлоо илэрхийлж байна. Танигдаагүй нэгэн танигдаж, дэлхий нэгдэж байна.
5. ХЭТ ИХ ХЭРЭГЛЭЭНИЙ УНАЛТ
Бид олон жилийн турш галзуу их хэрэглээг шүтэж, ингэж явах ёстой мэтээр тархиа угаалгажээ. Хамгийн сүүлийн үеийн машин, гар утас, шинэ брэнд, загварын хувцас өмсөж, элээж ч барахгүй их гутал, эд зүйлстэй болж байлаа. Энэ замыг туулсан олон хүн энэ бүхэн ямар ч утга учир өгөхгүй байгааг ойлгож эхэлсэн.
Эд юмсыг бага багаар хэрэглэ, багаар хоолло гэх зэрэг тодотголтой элдэв уриа , хөдөлгөөнүүд биднийг галзуурсан хэрэглээтэй амьдарч ирснийг ухааруулж байна.
Үүний эсрэг хүмүүс улам л бага зүйл худалдан авч, бага хэрэглэн, хувцсаа солилцон, хандив тусламж өгч, хуучин эд зүйлс худалдан авч, өөрт байгаагаа хуваалцаж эхэлж байна. Бидэнд зайлшгүй хэрэгтэй гээд байсан зүйлс нь тийм ч их хэрэгтэй эд биш байж. Хэт их хэрэглээг сурталчилсан корпорациудад энэ бүхэн аюулын дохио болоод байна.
6. ЭРҮҮЛ, ОРГАНИК ХООЛЛОЛТ
Бид ямар ч эрүүл бус хүнс байсан хэрэглэж байсан үе бий. Аманд чинь л сайхан амттай бол бусад нь хамаа алга гэдэг байлаа. Бидний хоол хүнсэнд нөхдүүд элдэв бодис хийсээр байхад бид үл тоосон хэвээр байлаа. Зарим нь сэрж, эрүүл, органик хэрэглээ маш чухал болохыг ойлгож эхэллээ. Одоо энэ хандлага маш их хүчээ авсан байгаа. Энэ бүхэн тэгээд эдийн засаг, ажил эрхлэлттэй ямар хамаатай гэж? ХАМГИЙН ИХ ХАМААТАЙ!!!
Хүнсний үйлдвэрлэл бол нийгмийн үндэс суурь. Хүнсний салбар бол дэлхий дээрх хамгийн чухал салбар мөн. Ухамсар өөрчлөгдөж, хүмүүсийн сонголт өөрчлөгдвөл хэрэгцээ өөрчлөгдөн томоохон корпорациуд үүнийг дагахаас өөр аргагүй. Жижиг аж ахуйч нар дахиад хүчээ авах боломжтой. Хүмүүс өөрсдийн хүнсээ тариалж эхэлж байгаа нь эдийн засаг тэр чигтээ өөрчлөгдөх дохио мөн.
7. УХАМСРЫН СЭРЭЛТ. /The spiritual awakening/
Таны найз нөхдийн хэд нь иог хийж байна? Харин бясалгалын хувьд?
Үүнийг арван жилийн өмнө хэдэн хүн хийж байв?
Олон жилийн турш зөвхөн шүтлэгтэй, далд хүчинд итгэдэг хүмүүст ухамсрын/сүнсний хөгжил гэдэг ойлголтыг хамааруулдаг байсан азаар энэ бүхэн бас өөрчлөгдөж байгаа юм. Бид рациональ сэтгэлгээний хязгаарыг мэдрээд байна. Рациональ бодлоор тайлж чадахааргүй олон зүйл тохиолдож өрнөөд байгааг харж мэдрээд байна. Ямар нэг зүйл үнэхээр болоод байгаа бөгөөд үүний учрыг та ч гэсэн мэдэхийг хүсч байгааг би ойлгож байна. Амьдрал яаж ажиллаж, үхлийн дараа үнэхээр юу болдог талаар, хүмүүсийн яриад байдаг энерги гээд байдаг зүйл юу вэ гэдгийг мэдэхийг үнэхээр хүсч байна. Цаашлаад квантын физик гэж юу болох тухай, бодол хэрхэн бодит зүйлсийг бий болгодгийг, тохиолдол давхцал гэж юу вэ, яагаад бясалгал болон гарын энергиэр хүн эдгээж үр дүнтэй болоод байгаа зэрэг нь батлахын аргагүй байтал биелээд байгааг мэдэхийг хүсч байна. Компаниуд ажилтнууддаа бясалгал хийхийг дэмжиж урамшуулж, сургуулиудад ч мөн сурагчдад зааж байна.
8. СУРГАЛТЫН ЗАГВАРЫН УНАЛТ буюу уламжлалт бусаар сурах шинэ хандлага
Энэ сургалтын загварыг хэн зохиосон бэ? Түүхий ангиудад хэн эдгээр хичээлүүдийг заахыг сонгосон юм бол? Бидэнд яагаад эртний соёл иргэншлүүдийн талаар зааж сургахгүй байгаа юм бол? Яагаад биднийг нэгэн загварын хувцас өмсгөн, дуугүй сонсохыг зааж байгаа вэ? Олон хүн энэ системийг өөрчлөхөөр ажиллаж байна. Магадгүй миний энд жагсаасан зүйлсийг та анх удаа уншаад үнэхээр мэл гайхаж байгаа байж магад. Гэвч эдгээр зүйлс үнэхээр тохиож байгаа бөгөөд хүмүүс энэ нийгэм үнэхээр галзуурсан байгааг дуугүйхэн мэдэрч, анзаарсаар байна. Үнэхээр гайхамшгууд тохиосоор байна.
Нийтлэгч : Густаво Танака /Бразилийн Интерпренор, зохиогч бөгөөд
шинэ эдийн засгийн талаарх санааг хуваалцагч/
Эх сурвалж: gustavotanaka.com.br
