Сангийн сайд Ч.Хүрэлбаатар Засгийн газрын өнөөдрийн хуралдаан дээр Тусгай сангуудад хийсэн шалгалтын хариу болон цаашид авах арга хэмжээний талаар танилцууллаа. Яамнаас явуулсан шалгалтанд 29 сан хамрагдсан бөгөөд үүнээс долоог нь татан буулгах шийдвэр гаргасан байна. Эдгээр татан буугдах санд Ирээдүйн тэтгэврийн нөөц сан, Эрсдэлийн сан, Засгийн газрын өрийн баталгааны сан, Үйлдвэрлэлийг хөгжүүлэх сан, Олон улсын хамтын ажиллагааны сан, Монгол судлалыг дэмжих сан, Агаарын бохирдлын эсрэг сангууд багтжээ.
Харин зээлтэй холбоотой үйл ажиллагаа эрхэлдэг Тариалан эрхлэлтийг дэмжих сан, Мал хамгаалах сан, Жижиг, дунд үйлдвэрийг хөгжүүлэх сангуудыг нэгтгэж, Улсын авто замын сан, Боловсролын зээлийн сан, Хөдөлмөр эрхлэлтийг дэмжих сангуудын үйл ажиллагааг сайжруулах ёстой гэж үзсэн байна.
Сангийн сайд Ч.Хүрэлбаатар “Боловсролын зээлийн санд маш их диплом барьцаа маягаар байж байдаг. Диплом нь өөрөө барьцаа хөрөнгийн шаардлагыг хангахгүй байгаа учраас уг асуудлыг шийдвэрлэхээр ажиллана. 1997 оноос хойш 1893 хүн Засгийн газрын тэтгэлгээр гадаадад сурч, 52.3 сая ам.доллар зарцуулагдсанаас 32.7 сая нь эргэн төлөгдсөн” гэлээ.
Харин Нийгмийн даатгалын сан, Нийгмийн халамжийн сан, Ирээдүйн өв сан, Төсвийн тогтворжуулалтын сан зэрэг 15 сангийн үйл ажиллагааг хэвээр үлдээхээр шийдвэрлэжээ.
Энэхүү шалгалтаар бүх сангуудад 14 чиглэлийн үүрэг, даалгавар өгсөн байна. Тодруулбал, ямар нэгэн шийдвэр гаргахдаа мэргэжлийн холбоодыг оролцуулах, үйл ажиллагааг ил тод болгох, холбогдох бүхий л мэдээллийг Шилэн дансны тухай хууль, Мэдээллийн ил тод байдлын тухай хуулийн дагуу олон нийтэд зэрэг үүргийг өгчээ.
Тариалан эрхлэлтийг дэмжих сангаас нийт 140 тэрбум төгрөгийн зөрчил илэрсэн байна. Үүний 47 тэрбумын зөрчил нь тендерийг зохион байгуулахтай холбоотойгоор гарчээ. 72 тэрбум төгрөгийн зээл хугацаа хэтрэлттэй байгаа аж. 2014-2015 онд тус бүр найман тэрбум төгрөг тавиад элеватор худалдан авах тендер зарлагдсан боловч 5.2 тэрбум төгрөгийн өртэй Дарханы гурил тэжээл компанийг шалгаруулсан. Гэвч тэр элеватор нь чанарын шаардлага хангахгүй учир өнөөдрийг хүртэл ашиглагдахгүй байдаг гэнэ.
Мөн Жижиг, дунд үйлдвэрлэлийг хөгжүүлэх санд 2008 оноос хойш төлөгдөөгүй 100 гаруй тэрбум төгрөг байгаа аж. Тиймээс уг сангаас зээл авсан хүмүүсийг зээлийг нь эргэн төлүүлэх юм байна. Нэг компани хэд, хэдэн сангаас зээл авсан зөрчил илэрсэн байна. Тиймээс зээлтэй компаниудын мэдээллийг Монгол банкны зээлийн мэдээллийн санд оруулахаар болжээ. Цаашид сангуудтай холбоотой үйл ажиллагааг цэгцэлж, чангатгах шаардлагатай арга хэмжээг авч ажиллана. Мөн сангийн хөрөнгийг зориулалтын бусаар зарцуулдгийг хориглох, төрийн албан тушаалтан зээл авдгийг болиулах зэрэг арга хэмжээг авахаар болжээ.
