Монголбанкнаас иргэдийн өр, орлогын харьцааг шинэчиллээ

Өнөөдөр Монгол банкны мөнгөний бодлогын хороо хуралдаж гаргасан шийдвэрийг танилцуулах хэвлэлийн хурал Монголбанкинд боллоо.
Хурлын эхэнд Монгол банкнаас бодлогын хүүг 11 хувьд хэвээр хадгалахаар болсныг танилцуулав. Мөн иргэдийн өр орлогын харьцааг 70/30 байсныг 60/40 болгон өөрчилсөн байна. Энэ нь иргэд нийт орлогынхоо 30 хувийг гар дээрээ авч, 70 хувьд нь ногдох дүнтэй тэнцэх зээл авдаг байсныг болиулж 60 хувийн зээл авдаг болгож байгаа юм. Ингэснээр иргэдийн гар дээр ирэх орлого нэмэгдэж, банкны хүүнээс ирэх дарамт буурах боломжтой юм. Энэ журмыг дөрөвдүгээр сарын 1-нээс эхлэн мөрдөж эхэлнэ.
Жилийн инфляци 2019 оны 2 дугаар сард улсын хэмжээнд 6.9 хувь, Улаанбаатар хотын хэмжээнд 7.9 хувьтай гарчээ. Инфляцийн хэлбэлзэлд шатахуун, мах болон хатуу түлшний үнийн өөрчлөлт голлон нөлөөлжээ.
Монголбанкны Мөнгөний бодлогын газрын захирал Б.Баярдаваа: Монгол улсын эдийн засаг бүрэн сэргэсэн гэж дүгнэж болохоор байна. 2016 оны гурав, дөрөвдүгээр улиралд дефляц үүсэн, эдийн засаг агшсан. Харин одоо 7-8 хувь болж өслөө. Ажилгүйдэл 2016 оны нэгдүгээр улиралд 11% байсан бол өнгөрсөн оны сүүлээр 6% болж буурлаа. Өрхийн бодит орлого 2014-2016 онуудад дараалан агшсан. 2017 оны нэгдүгээр улирлаас сэргэж, 2018 оны эцсээр 7.4 хувийн бодит өсөлттэй байна. Хөрөнгө оруулалт 2013-2015 оны хооронд ихээхэн буурсан. Өнгөрсөн онд 27 хувиар өссөн.
Төлбөрийн тэнцлийн төлөв: 2013-2016 онд нийт 2.6 тэрбум ам.долларын алдагдал хүлээсэн. 2017-2018 онд 1.3 тэрбум ам.долларын ашигтай байна. Үр дүнд нь гадаад валютын нийт нөөц өнгөрсөн сарын байдлаар 3.6 тэрбум ам.доллар болж өссөн. 2014-2016 оны хооронд манай улсын зээлжих зэрэглэл 2-3 удаа буурсан. Зэрэглэл тогтоогч гурван байгууллага манай үнэлгээг сайжрууллаа.
Төсвийн тэнцэл: 2011-2017 онд дунджаар 1.4 тэрбум төгрөгийн алдагдалтай байсан бол өнгөрсөн онд 12 тэрбум төгрөгийн ашигтай гарсан.
Зээлийн жигнэсэн дундаж хүү: 20%-иас өнгөрсөн оны эцэст 16.9 хувь болж буурсан нь хөрөнгө оруулалтын таатай орчин бүрдэхэд нөлөөллөө.
Зээлийн өсөлт: Санхүүгийн зуучлалын хэвийн байдал алдагдан, 2015-2016 онд зээл олголт дунджаар 5 хувиар агшсан ч 2018 онд 24 хувийн өсөлттэй гарсан.
Энэ онд эдийн засаг 6.9 хувиар өснө гэж таамаглаж байна. Үүнд нөлөөлөх хүчин зүйлүүд нь өрхийн хэрэглээний болон хөрөнгө оруулалтын, нүүрсний экспортын өсөлт болон уул уурхайн бус салбарын өсөлт юм. Гадаадын шууд хөрөнгө оруулалт хэвийн түвшинд үргэлжилнэ гэж мэдэгдлээ.