Туркийн анхны харааны бэрхшээлтэй марафоны тамирчин, уулчин Necdet Turhan нь “Таван тив: Таван Марафон, Таван Оргил” төслөө амжилттай дуусгасан байна. Анх 2002 онд Нью-Йорк хотоос эхэлсэн уг төсөл нь 2017 оны 2-р сард Австралийн Косцюшко ууланд амжилттай авирснаар амжилттай өндөрлөсөн билээ.
Тэрээр Туркийн Арарат уул, Танзани улсын Килиманжаро уул, Франц улсын Мон Блан уул, АНУ-н Колорадо мужийн Шердиан уул болон дээр дурдсан Австралийн Косцюшко ууланд амжилттай авирсан байна.
“Уулсын сайхныг авиран байж мэднэ” болон “Бэрхшээл бол шийдэгдээгүй асуудал юм” гэсэн уриатайгаар энэхүү аялалаа эхлүүлсэн бөгөөд аялалын зорилго нь Турк дахь харааны бэрхшээлтэй иргэдийн талаарх ойлголтыг эерэгээр нэмэгдүүлэхэд зорьсон байна. Necdet Turhan-ий гол зорилго нь бид бүгдэд ямар их боломж буйг харуулахыг зорьсон байна.
Тус аяллаас олсон орлогоо Туркийн харааны бэрхшээлтэй хүүхдүүдийн номын санд хандивлажээ. “Таван Тив” нэртэй энэхүү аяллын сүүлчийн аялал болох Австралийн Косцюшко ууланд авиралтыг Туркийн “Туркийн гүүр нийгэмлэг” ивээн тэтгэсэн ажээ.
Тус байгууллагыг 2003 онд АНУ-д амьдардаг Турк иргэд байгуулсан бөгөөд Necdet Turhan болон бусад харааны бэрхшээлтэй иргэдийн боловсролд хөрөнгө оруулалт хийдэг байна.
Necdet Turhan нь 1957 онд Туркийн Баликесир мужид төрийн албан хаагчийн бага хүү болон мэндэлжээ. Түүнийг дунд ангид байхад гэр бүл нь Бурса хот уруу нүүснээр гэр бүлээ тэжээхийн тулд өдөр нь ажил хийх болсон тул тэрээр оройгоор сурах болсон байна. Гэвч 23 настайдаа нүдний өвчний улмаас тэрээр хараагүй болжээ. Гэсэн хэдий ч сургуулиа орхиогүйгээр үл барам Анкарагийн Ойрх Дорнодын Их сургуульд Улс төр судлал, нийтийн удирдлага мэргэжлээр бакалаврын зэрэг хамгаалсан байна. Тус сургуульд сурч байх хугацаандаа сургуулийнхаа ууланд авиралтын багт элссэнээр түүний энэхүү спорттой холбогдох замнал эхэлжээ.
Сургуулиа төгссөний дараа тэрээр улсын үйлдвэрт утасны оператор хийж байсан ба тус ажил нь түүнд таалагдаагүй тул ажлаасаа гарчээ. Ажлаа орхисны дараа тэрээр ууланд авирч хэвлэл мэдээллийн анхаарлыг хөгжлийн бэрхшээлтэй иргэдийн асуудалд хандуулахаар шийдсэн байна.
Энэхүү он жилүүдэд түүний тэмцлийн уриа нь “Бэрхшээлтэй ч бүхнийг чадна”, “Амьдрал, Амжилт хоёрт хайртай бол чармай” зэргээр уриалж байжээ.
Дөрвөн жилийн турш тэрээр сэтгүүлчийн ажил хийхдээ олон сэдвийг хамарсан нийтлэл бичжээ. Аяллаас эргэн ирсний дараа Хөгжлийн Бэрхшээлтэй иргэдийн хөгжлийн төвд ажиллаж Хөгжлийн бэрхшээлтэй хүүхдүүдэд таяг болон компьютер хэрхэн ашиглахыг заах болсон байна.
2015 оноос албан ёсоор тэтгэвэрт гарсан бөгөөд сайн дурынханд туслах ажил хийж байна.
Б.Эрдэнэ
