Эрүүл мэндийн сайд Т.Мөнхсайханаас зарим асуултанд тайлбар авлаа.
-Хөл хорио тогтоосны гол зорилго юу вэ?
-Хөл хорио тогтоох нь халдварын тархалтыг багасгах арга хэмжээ юм. Халдвар авсан хүний тоог арав дахин бууруулж чадсан гэж бодож байна. Тандалт судалгааг эрчимтэй хийж чадвал эрүүл мэндийн байгууллагууд ачааллаа дийлэхгүй байдалд орохгүй. Энэ бол олон улсад авч байгаа чухал арга хэмжээний нэг юм.
Халдвартай нь тогтоогдсон хүмүүсийг гэрт нь эмчилбэл халдварыг гэр бүлийнхэнд нь тархаах магадлалтай. Олон улсад эмнэлэг нь хүчин чадалгүй болсон үед гэрт нь эмчилж байгаа.
Ковидын үед иргэдийг эмчлэх эмнэлгийн 30 хувь нь л дүүрээд байна. Иргэдийг гэрт нь эмчлэх хэмжээний байдал үүсээгүй байна.
–PCR шинжилгээний хариу худлаа гараад байна гэх эргэлзээ бий. Энэ талаар?
-Бидний шинжилгээ нэг журмаар ижил явагдаж байгаа. Шинжилгээг буруу гардаг гэж харлуулахыг хүссэн хүмүүс байх шиг байна.
-“Энхсаран” сувилалтай адил нөхцөл байдал “Амар” зочид буудалд үүсэв үү?
-“Амар” зочид буудалд байсан 7 хүнээс халдвар илэрсэн. Тэгээд иргэдийг өөр буудал руу шилжүүлсэн. Тусгаарлагдах явцад халдвар авсан байх магадлалтай гэж үзэж нүүлгэсэн. Камер шүүж, халдварын дэглэм алдагдсан эсэхийг тогтооно. Үүнд эцсийн дүгнэлтийг хийх боломжгүй байна.
-Эрүүл мэндийн яаманд халаа сэлгээ хийж, өөрийн хүмүүсийг тавиад байна гэх яриа гараад буй?
-ЭМЯ-нд эмэнд хяналт тавьдаг бүтэц бий болж байна. Үүнтэй холбоотойгоор бүтцийн өөрчлөлт гарсан. Би хүмүүсийг халж, хамаатнуудаа оруулсан зүйл байхгүй. Үүнд итгэлтэй байж болно.
Улаанбаатар хотод тархсан халдварыг хумих арга хэмжээ үр дүнгээ өгсөн. Цаашдаа Улаанбаатарт тэг зогсолт хийхээр хүнд нөхцөлд ороогүй байна. Иргэн бүр маш хариуцлагатай байж хүн хоорондын зай барьж, амны хаалтаа зүүхийг хүсэж байна.
