Монгол Эрүүл мэндийн ажилтны үйлдвэрчний эвлэлийн холбооны дэд дарга Ч.Нарантуяа:
Эрүүл мэндийн салбарын эмнэлгийн эмч, мэргэжилтнүүд жил гаруйн хугацаанд цар тахалтай өдөр шөнөгүй нүүр тулан ажиллаж байгаа. Гэхдээ өнөөдрийг хүртэл бид гомдож, гонгинож асуудал үүсгэлгүй өмнөх ажлаа нэр төртэй хийж ирсэн. Эмнэлгийн ажилтнуудын ажлын ачаалал ихсэж, ялангуяа сүүлийн хоногуудад халдвар авсан өвчтөний тоо маш ихээр нэмэгдэн, тэнд ажиллаж байгаа эмч ажилтнууд ядарч туйлдан цөхөрч байна. Энэ хүмүүсийн цалин хөлсийг нэмэх, илүү цагийг бодитоор тооцон, цалин хөлсийг олгох ийм арга хэмжээг яаралтай авах хэрэгтэй. Дэлхийн олон орон ковидтой тэмцэн ажиллаж байгаа эмч ажилтнуудынхаа цалин урамшууллыг нэмэгдүүлснээр тухайн хүмүүсийн сэтгэл ханамж өндөр байгааг бид хэвлэл мэдээллээс мэдэж авч байна. Жишээлбэл ОХУ-д эрүүл мэндийн салбарын эмч ажилтнуудынхаа цалингийн хоёр дахин нэмэгдүүлж олгосноос гадна, жил бүр 60-80 мянган рублийн урамшууллын цалинг олгож байна. Түүнчлэн Тайвань улс гэхэд эмч нартаа 10000 юанийн урамшуулал олгож байх жишээтэй.
Монголын Эрүүл мэндийн ажилтны үйлдвэрчний эвлэлийн холбооны дарга Х.Ариунаа:
Манай салбарын их эмчийн дундаж цалин 750-850 мянга, сувилагч 670-720 мянга, үйлчилгээний ажилчид 460-550 мянган төгрөгийн цалинтай цар тахалтай тэмцэн ажиллаж байна. Үүнээс нийгмийн даатгалын шимтгэл хэмээн 26 хувийг авна. Энэ салбарт ажиллаж байгаа хүмүүсийн 90 хувь нь цалингийн зээлтэй, цалингийн зээлийн хүү нь 18-21,6 хувь байна. Урьдчилгаа цалин гэж 220-280 мянган төгрөг цалин авч банкны зээлд өгснөөр 20-30 мянган төгрөгтэй л үлдэж байна. Эдгээр ажилчид 24 цаг ялангуяа ХӨСҮТ-ийн ажилчид ямар их ачаалалтай ажиллаж байгаа билээ. Ажилчид маань ядарч туйлдан цөхөрч маш олноор өвдөж эхэлж байна.
Халдварт өвчин судлалын үндэсний төвийн ҮЭ-ийн холбооны дарга О.Баатарчулуун:
ХӨСҮТ-ийн эмч эмнэлгийн ажилчид цар тахлын дэлгэлтийн жил гурван сар буюу 450 гаруй хоногийн хугацаанд гол ачааллыг үүрч ажиллаж ирлээ. Энэ хугацаанд ажиллахдаа бид бүхэн цалин хөлс урамшууллаа номер нэгд тавьсангүй. Ард иргэдийн эрүүл мэндийн төлөө эхлээд бүгдээрээ ажиллая. Цар тахлыг дарахын тулд хамтдаа ажиллая хэмээн ажиллалаа. Эрүүл мэндийн тухай хууль 2011 онд шинэчлэгдсэн. Энэхүү хуулийн 30.1-д олон улсын хөл хорио цар тахал дэгдсэн үед эрүүл мэндийн салбарын эмч ажилчдын хөлсийг гурав дахин нэмж олгоно гэсэн заалт байдаг. Гэвч энэхүү заалт өнөөдөр Монгол Улсад хэрэгжихгүй байна.
Ингээд Монголын эрүүл мэндийн ажилтны үйлдвэрчний эвлэлийн холбооноос дараах гурван шаардлагыг Эрүү мэндийн сайд болон Засгийн газарт тавилаа.
1. Эрүүл мэндийн тухай хуулийн 30.1 заалтийн дагуу ХӨСҮТ болон бусад эмнэлгүүдэд цар тахалтай тэмцэн ажиллаж байгаа эмч ажилчдын цалинг гурав дахин нэмж олгох,
2. Эрүүл мэндийн тухай хуулийн 30.2-т “Хэрвээ халдварт өвчний үед ажиллаж байгаад өвдөх бусад эрсдэл гарах юм бол нөхөн олговор, буцалтгүй тусламж олгоно” гэсэн байдаг. ХӨСҮТ дээр 50 гаруй ажилчид цар тахлын голомтод ажиллаж байгаад халдвар авсан байна. Засгийн газраас эхний ээлжийн ажилчдад таван сая төгрөгийн буцалтгүй тусламж олгосон. Гэвч хоёрдугаар сарын 7-оос хойшхи халдвар авсан бүх ажилчдад энэхүү буцалтгүй тусламжийг олгоогүй байна. Тиймээс ажил үүргээ гүйцэтгэж байгаад халдвар авч, эрүүл мэнд, сэтгэл санаагаараа хохирсон эмч, эмнэлгийн ажилчдад урам өгч энэхүү буцалтгүй тусламжийг олгох
3. Голомтод 24 цагаар нэг сарын хугацаатай ажиллаж буй эмч эмнэлгийн ажилчдыг голомтоос гарахад нь илүү цагийн урамшууллыг цаг тухайд олгохыг хүслээ.
