Монгол Улсын Ерөнхийлөгчийн 2021 оны ээлжит сонгуульд “Зөв ХҮН электорат” эвслээс нэр дэвшигч Д.Энхбат “Иргэдээ дээдэлж, эвийг сахиулан дэлхийн Монголыг бүтээх үйлсэд манлайлна” уриатай мөрийн хөтөлбөрөөр өрсөлдөж байна. Д.Энхбатын сонгуулийн мөрийн хөтөлбөрөөс анхаарал татсан онцлох 10 заалтыг түүвэрлэн танилцуулж байна.
1.Ёс зүйн хариуцлагын тогтолцоог төрийн албаны бүх шатанд бүрдүүлэх, төрийн үйлчилгээг ил тод, цахим хэлбэрт оруулах, улс төрийн томилгоог халж өндөр боловсролтой, мэргэшсэн төрийн албан хаагчийг чадамжид суурилсан тогтолцоогоор дэвшүүлдэг болгохын төлөө улс төрийн намуудтай хамтран ажиллана.
2.Төрт ёс, түүх соёлынхоо уламжлалыг судлан хөгжүүлэх, нандигнан өвлүүлэх, дэлхий нийтэд түгээн дэлгэрүүлэх үйлсэд онцгой анхаарч, дэлхийн монгол судлалыг хөгжүүлэх бодлогыг дэмжиж ажиллана.
3.Бага насны хүүхэд бүр цэцэрлэг, сургуульд хамрагдах, төлөвшин боловсрох тэгш боломжоор хангагдах болон сургууль цэцэрлэг, багш сурган хүмүүжүүлэгчийн хүртээмжийг нэмэгдүүлэхэд чиглэсэн бодлогыг дэмжиж ажиллана.
4.Парламентын ардчилал бол Монгол Улсын тусгаар тогтнол, хөгжил цэцэглэлтийн баталгаа хэмээн үзэж, Үндсэн хуулиар тогтоосон төрийн эрх мэдлийн хуваарилалтыг төгөлдөржүүлэх, Ерөнхийлөгчийн бүрэн эрхээс шаардлагагүй бүрэн эрхүүдийг төрийн зохих байгууллагуудад шилжүүлэх шинэтгэлийг санаачлан ажиллана.
5.Ерөнхийлөгчийн бүрэн эрхийг хэрэгжүүлэхдээ хууль тогтоох, гүйцэтгэх засаглалын эрх үүрэг, эрхлэх асуудалд хутгалдан оролцдог буруу жишгээс зайлсхийж, Ерөнхийлөгчийн Үндсэн хуульд заагдсан бүрэн эрхэд хамааралгүй чиг үүргүүдийг ердийн хуулиар олгосныг өөрчлөх чиглэлээр хууль тогтоох үйл ажиллагааг дэмжин ажиллана.
6.Сонгуулийн хууль тогтоомжийг өөрчлөн шинэчилж, хувь тэнцүүлсэн сонгуулийн тогтолцоог хуульчлах замаар улс төрийн намуудын төлөвшлийг түргэсгэх, гарааны ижил төвшинд, шударгаар, бодлогоор, өрсөлдөх эрх зүйн орчинг бүрдүүлэхийг дэмжинэ.
7.Гадаадын өрийн асуудлыг богино болон дунд хугацаанд шийдэх талаар гадаад улсууд, олон улсын эдийн засгийн байгууллагуудтай хамтран ажиллаж, уул уурхайн салбарын бодлогыг эдийн засгийн аюулгүй байдлын асуудлыг шийдэх гол салбарын бодлогын төвшинд авч үзэж, олон жил дамжсан улс төрийн популизм, авлигыг бууруулах бодлогыг дэмжиж ажиллана.
8.Монгол Улсын Үндэсний аюулгүй байдлын үзэл баримтлал, Гадаад бодлогын үзэл баримтлалд заасан тулгуур бодлогууд болон “Гуравдагч хөрш”-ийн бодлогын хүрээнд томоохон төслүүдийг хамтран хэрэгжүүлэхэд чиглэсэн гадаад харилцааг хөгжүүлэх бодлогыг дэмжинэ.
9.Эрүүл мэндийн салбарын санхүүжилтийн бүтцийг оновчтой болгох замаар, эрүүл мэндийн даатгалын бие даасан байдлыг бэхжүүлэн, иргэд эрүүл мэндийн үйлчилгээг оршин суугаа газрын харьяалал, өмчийн хэлбэр үл харгалзан эрүүл мэндийн даатгалаараа бүх шатлалын үйлчилгээг авах боломжийг бүрдүүлэхийг дэмжинэ.
10.Төр, хэвийн хэвшил, олон нийт, иргэний нийгмийн байгууллагуудын оролцоог тэгш хангах, харилцан ойлголцох, нийтлэг эрх ашиг, үнэт зүйл, үндэсний хөгжлийн зорилгын төлөө хамтран ажиллах орчинг бүрдүүлэх зорилгоор орон тооны бус бодлогын зөвлөлүүдийг байгуулан ажиллана. Дараах зөвлөлүүдийг эн тэргүүнд санаачлан байгуулна. Үүнд:
-Үндэсний эв нэгдлийн бодлогын зөвлөл.
-Гадаадад суугаа монголчуудаа дэмжих бодлогын зөвлөл
-Цахим хөгжил, технологийн бодлогын зөвлөл
-Монголын брэндийг дэлхийд гаргах бодлогын зөвлөл
-Үндэсний баялгийн шударга хуваарилалтын бодлогын зөвлөл
