Замын-Үүдийн гаалийн газрын даргыг түр орлон гүйцэтгэгч Б.Отгонсүх өнөөдрийн Засгийн газрын хуралдаанд Замын-Үүдийн нөхцөл байдлын талаар танилцуулга хийжээ. Замын-Үүдийн боомтын зөвлөл ачаа тээврийн аж ахуйн нэгжүүдтэй хариуцлагын гэрээ хийж, нэг машин ачааг 10 сая төгрөгөөс дээш ачихгүй байхаар тохирсон байна. Гэтэл тээврийн компаниуд гэрээгээ зөрчиж байгаа учраас тусгай зөвшөөрлийг нь цуцлах арга хэмжээ авахаар болжээ. Ингээд Замын-Үүдийн нөхцөл байдлын талаар түүнээс тодрууллаа.
-Замын-Үүдийн ачаа тээврийн нөхцөл байдалд өөрчлөлт гарч байгаа юу. Өнөөдрийн нөхцөл байдал яг ямар байна вэ?
-Замын-Үүдийн боомтын зөвлөлөөс томоохон гурван арга хэмжээ зохион байгуулсан. Нэгд, Замын-Үүд боомт ногоон бүс болгох ёстой гэж үзэж нэг өрх нэг шинжилгээг хийж байна. Хоёрт, ариутгалын хаалгануудыг бүгдийг шинэчилж, сайжруулсан. Гуравт, төр хувийн хэвшил хамтран ажиллаж байна. Зургадугаар сарын үед гөдөрт 90 машин гарч байсан бол 145 болж өссөн. Мөн импортод галт тэрэг явуулж байна. Энийг үед 150 машин орж ирдэг байсан хэмжээндээ очсон.
-Хүлээгдэж байгаа машин байна уу. Нэг машин хэд хоног хүлээж хил нэвтэрч байгаа вэ?
-Өнөөдөр машин гарлаа гэхэд 2-3 хоногийн дараа буцаж орж ирж байна. Замын-Үүдийн гааль дээр 2000 орчим машин оочерлож байсан бол бүгдийг нь татаад оруулсан. Бөөгнөрсөн ачаа байхгүй. 500-600 машины ачаа байнга л эргэлдэж байдаг. Тэр хэмжээндээ очсон. Хоёр ачаа тээврийн үнийн асуудал бий. Замын-Үүдийн боомтын зөвлөл 5000 орчим ачааны машины жолоочтой хариуцлагын гэрээ байгуулсан. Нэг машин тээврийг 10 саяас дээш гаргахгүй байхаар гэрээнд тусгасан. Гэхдээ энэ яг амьдрал дээр хэрэгжихгүй байна. Тээвэрт явж байгаа машинуудын 70 хувь нь 10 саяас дээш, 30 хувь нь 10 сая дотроо ачиж байна гэдэг мэдээллийг тагнуул, цагдаагийн байгууллагаас өгч байгаа. Хариуцлагын гэрээ зөрчиж 10 саяас дээш төгрөгөөр ачсан жолооч, аж ахуйн нэгжийн зөвшөөрлийг цуцлаад явна.
-Хариуцлагын гэрээг зөрчиж 10 саяас дээш ачаа тээвэрлэсэн гэж байна. Хэдэн аж ахуйн нэгжийн зөвшөөрлийг цуцлах вэ?
-Эхний мэдээллээр 10 гаруй аж ахуйн нэгжийн тусгай зөвшөөрлийг цуцлахаар бүх баримт нь бүрдсэн гэж хууль хүчний байгууллагаас надад мэдээлсэн. Хэрвээ 10 сая дотор ачвал бид дэмжиж ажиллана. Ковидгүй үед 7-8 саяар ачаад болоод байдаг байсан учраас шатахууны үнэ нэмэгдсэн учраас 10 саяар тогтоосон. Гэтэл тээвэр эрхлэгч компаниуд 10 саяар дээш ачвал шаардлагатай арга хэмжээнүүдийг үе шаттай аваад явна.
-10 гаруй аж ахуйн нэгжийн тусгай зөвшөөрлийг цуцлачихаар оронд нь тээвэр хийх компаниуд бэлэн байх уу. Дахиад ачаалал үүсэх юм биш биз дээ?
-Бид маш олон хувилбарыг судалж байгаа. Үнийн асуудлаас гадна одоо өвөл болж байна. Өвөл болохоор ачаа тээврийг ямар зохион байгуулалтад оруулах уу гэдгийг Засгийн газар болон Замын-Үүд боомтын зөвлөл ярилцаад явж байгаа.
