АНУ-ын Өвчний хяналт, урьдчилан сэргийлэх холбооны төв коронавирусийн халдвартай хүмүүстэй хавьтал болсон хүмүүсийг тусгаарлахтай холбоотой шинэ зөвлөмж гаргажээ.
Энэ зөвлөмжийн дагуу коронавирусийн халдвартай хүмүүс шинж тэмдэггүй өвдөж байвал 10 хоног тусгаарлаж байсныг таван хоног болгон бууруулж, дараагийн таван өдөр ийм хүмүүсийг амны хаалт зүүх ёстой юм байна. Ихэнх тохиолдолд коронавирус нь өвчний эрт үед, шинж тэмдэг илрэхээс өмнө болон илэрснээс хойш хоёроос гурван хоногт халдварладаг нь тогтоогдсон тул хүмүүсийг тусгаарлах хоногоо багасгасан хэмээн шинжээчид тайлбарласан байна.
Харин өвчтөнтэй хавьтал болсон хүмүүст зориулсоан зөвлөмжөө чангатгасан байна. Өмнө нь хоёр тун вакцин тариулсан хүн тусгаарлагддаггүй байсан бол зөвлөмж шинэчлэгдсэнээр гагцхүү гурван тун вакцин тариулсан хүмүүс л ойрын хавьтал болвол тусгаарлагдахгүй аж.
Улс орнуудын тусгаарлалтын хугацаа
Анх коронавирусийн халдвар тархаж эхэлснээс хойш л халдвартай болон хавьтал болсон хүмүүсийг тусгаарлах нь хамгийн үр дүнтэй аргуудын нэг байсан. Энэ аргыг улс орнууд ашиглахдаа харилцан адилгүй хугацаа тогтоож байгаа юм. Омикрон штам дэлхий даяар дэгдсэнээс хойш дэлхийн орнууд гадаадаас, тэр дундаа Африкийн орнуудаас жуулчин хүлээж авахгүй байхын дээр зарим нь Африкийн оронд зорчсон хүмүүсийг удаан хугацаагаар тусгаарлаж байна.
Тухайлбал Аргентинд ирэхээсээ өмнө сүүлийн 14 хоногийн дотор Африкийн аль нэг оронд зорчсон бол 14 хоногийн тусгаарлалтад орох журам үйлчилж байгаа аж. Энэ нь хүн бүрт, тэр дундаа бүрэн вакцин хийлгэсэн жуулчдад ч хамаатай гэнэ.
Австрали ч мөн ийм хязгаарлалт авч хэрэгжүүлж байна. Энэ улс Африкийн орнууд руу хийх нислэгээ зогсоосны дээр эдгээр оронд зорчсон гадаадын иргэдийг нэвтрүүлэхийг хориглосон юм. Тус улсад нэвтрэхийг зөвшөөрсөн цөөн тооны хүмүүст зориулсан хорио цээрийн дэглэм хэвээр байна. Урт хугацааны визтэй, бүрэн вакцин хийлгэсэн гадаадын иргэд орж болох ч гадаадын иргэд 14 хүртэлх хоногийн хугацаанд зочид буудалд тусгаарлагдах юм.
Их Британийн тусгаарлалтын хугацаа арай бага. Энэ улсад 11 сарын 26-ны өдрөөс эхлэн улаан жагсаалтад Өмнөд Африк, Ботсвана, Лесото, Эсватини, Зимбабве, Намиби гэсэн зургаан улсыг багтаасан. “Улаан жагсаалт”-ын орнуудаас буцаж ирсэн Британийн иргэд эсвэл оршин суугчид дархлаажуулалтад хамрагдсан эсэхээс үл хамааран зочид буудалд 10 хоногийн турш төлбөртэй тусгаарлагдана.
Харин Хонконг илүү урт хугацаагаар тусгаарлагдах журам нэвтрүүлсэн бөгөөд Өмнөд Африкаас ирсэн Хонконгийн бүх оршин суугчид засгийн газрын хорио цээрийн дэглэмийн газарт долоо хоног байх ёстой. Энэ хугацаанд өдөр бүр вирусийн шинжилгээ авч, эмнэлгийн мэргэжилтнүүдийн хяналтад байх аж. Ингээд долоо хоногийн дараа тэд зориулалтын зочид буудалд 14 хоног үргэлжлүүлэн тусгаарлагдах аж.
Грек, Дани гэсэн орнууд Африкаас ирсэн зорчигчдыг зочид буудлуудад 10 хоногийн турш тусгаарлаж, дараа нь дахин ПГУ-ын шинжилгээ хүлээж байна.
