Сүүлийн жилүүдэд “Хүүхэд алга боллоо” гэх зарлал цахим сүлжээнд ихээр явах боллоо. Холбогдох албаныхнаас энэ талаар тоо баримтыг нягтлахад сүүлийн хоёр сарын байдлаар нийт 55 хүүхэд оршин суугаа хаягнаасаа сураггүй алга болсныг олж тогтоосон байна. Азаар эдгээр хүүхдийг бүгдийг нь олж, асран хамгаалагчдад хүлээлгэн өгснийг цагдаагийн байгууллагаас мэдээлэв.
Цөөн хүн амтай манай улсад жилдээ 1000 гаруй хүүхэд алга боллоо гэх дуудлага ирдэг байна. Тэдгээр хүүхдүүдийн хувьд эцэг эхийн хараа хяналт муугаас ихэвчлэн төөрсөн байдаг. Тухайлбал, “ойрхон худаг, дэлгүүр ороод ирэх юм чинь гайгүй биз” гэж орхиж гарах үед хүүхэд эцэг эхээ хайж араас нь гарч төөрөх, олон нийтийн газар хөтлөхгүй, анхаарахгүй явах зэргээс хөл хөдөлгөөн ихтэй үйлчилгээний газар, автобусны буудал зэрэг газруудад төөрөх тохиолдол их байдаг аж. Мөн өсвөр насны буюу дунд, ахлах ангийн сурагчид нь эцэг эх, асран хамгаалагчдадаа хэлэлгүй анги, хамт олон, найз нөхдийн гэр, бусад газарт очиж хонох, найз нөхдийн ятгалга, буруу үлгэр дуурайлалд автан гэрээсээ дайжих зэргээс болон эрэн сурвалжлагдсан байдаг. Дээрх хүчин зүйлсээс гадна осол аваар, гэмт хэргийн зөрчилд өртөж хохирсон байх тохиолдлууд ч байхыг үгүйсгэхгүй гэдгийг Цагдаагийн байгууллагаас тайлбарлав.
Эрэн сурвалжлагдаж байгаа хүүхдүүд нь нийтэд зарлагдсан цагаас 1-4 цагийн дотор, зарим тохиолдолд 24-72 цагт олддог. Хэрэв олдохгүй бол сураггүй алга болсон гэх тодотголтой үлдэх аж. Одоогийн байдлаар Монгол Улсад нийт 29 хүүхэд ор сураггүй алга болж, огт олдоогүй байна. Эдгээрийн дунд 2017 оны арваннэгдүгээр сарын 2-нд сургуульдаа явахаар гэрээсээ гараад ор сураггүй алга болсон Д.Сэржмядаг охин багтаж буй юм.
