Газар хөдлөлтийн аюулыг таниулах зарлан мэдээллийн дуут дохиог өнөөдөр 16:00 цагаас гурван удаа дамжуулна. Тодруулбал, Улаанбаатар хотын хэмжээнд нийт 60 цамхгаар зарлан мэдээлэл, дуут дохиог дамжуулна хэмээн ОБЕГ-аас мэдээллээ.
Гамшгийн дохиог нийслэлээс 240 километрийн зайд хүчтэй газар хөдлөлт болсон гэж тооцоолон нийслэл дэх дөрвөн станцад дуут дохио дуугарах тохиргоог хийх юм. Нэг удаагийн дамжуулалт хоёр минутын хугацаатай байх бөгөөд энэ удаагийн сургуулилалтаар газар хөдлөлтийн аюулгүйн дадлагыг хийхээр болжээ.
“Энэ жил бэлэн байдлын зэрэг буурч шар түвшинд шилжсэн учраас нэгдсэн арга хэмжээг явуулахаар шийдвэрлэсэн”
ОБЕГ-ын Гамшгийн шуурхай удирдлага, зарлан мэдээлэх төвийн дарга Б.Сүхбаатар “Засгийн газрын 2017 оны 67 дугаар тогтоолын хүрээнд гуравдугаар сарын 18-ны өдрөөс эхлэн энэ сарыг дуустал газар хөдлөлтийн аюулыг таниулах сурталчилгааг зохион байгуулна. Өнгөрсөн хугацаанд гамшгаас хамгаалах өндөржүүлсэн бэлэн байдлын зэрэгт байсан учраас энэхүү арга хэмжээ болоогүй. Харин энэ жил бэлэн байдлын зэрэг буурч шар түвшинд шилжсэн учраас нэгдсэн арга хэмжээг явуулахаар шийдвэрлэсэн” хэмээв.
Ташрамд дурдахад, Засгийн газрын 339 дүгээр тогтоол, 340 дүгээр тогтоолын хүрээнд жил бүрийн гуравдугаар сарын сүүлийн долоо хоногийн пүрэв гарагт газар хөдлөлтийн аюулыг дуут дохиогоор улсын хэмжээнд зарлан мэдээлдэг.
Газар хөдлөлтийн дуут дохио дуугарахад юу хийх ёстой вэ
Гамшгийн дуут дохио эхний удаа дуугарахад иргэд “Нуугд- Суу- Хүлээ” зарчмыг баримтлан өрөө тасалгаандаа аюул багатай байрлалд өөрийгөө хамгаалах арга хэмжээг авч, ширээн доогуур орох, даацын хана, булан тохойд зогсох юм байна.
Хоёр дахь дохио дуугарсны дараа барилга, обьектыг орхин гарахдаа гарын доорх зүйл ашиглан толгойгоо хамгаална. Ингэхдээ гүйхгүй, эргэж буцахгүй, хашгирахгүй, түлхэлцэхгүйгээр барилгын аврах гарцаар гарч, аюулгүй зай талбайд цугларах ёстой аж. Орон сууцны иргэд цахилгаан шатаар бууж огтхон ч болохгүй. Монголчууд аливаа гамшгийн үед зөөврийн компьютер, цахилгаан хэрэгсэл, хувцас хунар гээд эд хөрөнгөө хамгаалах гэж хамаг цаг хугацаагаа алдаж өөрийгөө эрсдэлд оруулдаг талаар албаныхан хэлсэн. Тэгвэл газар хөдөлсөн тохиолдолд та бичиг баримт, шүдэнз, бээлий зэрэг яаралтай үед хэрэглэх зүйлээ хийж бэлтгэсэн үүргэвчээ авч гарахад л хангалттай. Хамгийн чухал нь та өөрийнхөө амийг аврах шүү дээ.
Газар хөдлөлтийн үед яаралтай хийх 10 алхам
