УИХ-ын Эдийн засгийн байнгын хороо өчигдөр хуралдлаа.
Эдийн засгийн болзошгүй эрсдэлээс урьдчилан сэргийлэх, гол нэр төрлийн барааны үнийн өсөлтийг шийдэх асуудлаар санал, дүгнэлт танилцуулах Ажлын хэсгийн мэдээллийг сонслоо.
Улсын Их Хурлын дарга Г.Занданшатарын энэ оны зургаадугаар сарын 30-ны өдрийн 106 тоот захирамжаар байгуулагдсан Эдийн засгийн болзошгүй эрсдэлээс урьдчилан сэргийлэх, гол нэр төрлийн бараа бүтээгдэхүүний үнийн өсөлтийг шийдвэрлэх асуудлаар санал, дүгнэлт гаргаж, Улсын Их Хуралд танилцуулах үүрэг бүхий Ажлын хэсгийн мэдээллийг сонслоо.
Манай эдийн засаг үндсэндээ худалдааны эдийн засаг.
Байнгын хорооны хуралдаанд Улсын Их Хурлын дарга Г.Занданшатар оролцож, үг хэлэв. Тэрээр “Хойд хил олон улсын нөхцөл байдлаас шалтгаалаад хязгаарлалттайн улмаас бүтээгдэхүүний нийлүүлэлт доголдож, тасалдахын зэрэгцээ Европын чиглэлийн тээвэрлэлт саатсан. Энэ нь үнийн өсөлтөд нөлөөлж байна. Өнгөрсөн долдугаар сарын байдлаар инфляц 15.7 хувь болсон.
Ажлын хэсэг Улсын Их Хурлаас өгсөн үүрэг, чиглэлийн дагуу зуны хугацаанд завсарлагагүй ажиллаж, гадаад, дотоод нөхцөл байдлыг судалж, үнийн өсөлтийг бууруулах, холбогдох арга хэмжээ авах талаар хүчин чармайлт гаргасан.
Зарим нааштай үзүүлэлт гарсан. Экспорт өнгөрсөн оны мөн үетэй харьцуулахад 37 хувиар нэмэгдлээ. Гэвч цагийн байдал тогтворгүй байна. Инфляц удаан үргэлжилнэ. Геополитикийн нөхцөл байдал тийм амар сайжрахгүй.
Иймээс Ажлын хэсэг илүү эрчимтэй ажиллах хэрэгтэй. Экспорт 1.8 тэрбум ам.доллараар өссөн ч цаашид экспортоо төрөлжүүлэх, өргөжүүлэх, хилийн боомтын сэргэлт, гадаад худалдааны бодлогыг цэгцлэх шаардлагатай. Дэлхийн худалдааны эрхзүй мянга гаруй жилийн түүхтэй. Худалдаа нэгдсэн бодлого, зохицуулалтаар явагддаг. Манай гадаад худалдаа боомтын бодлогоос авахуулаад импорт, экспортын бодлого урсгалаараа явж байна. Цаашдаа Худалдааны тухай хуулийг боловсруулж, батлах, худалдааны чиглэлийн бүтэц, институц бий болгохыг олон улсын нөхцөл байдал шаардаж байна. Манай эдийн засаг үндсэндээ худалдааны эдийн засаг. Үүний илрэл нь инфляцын бараг талаас илүү хувь нь импортоос үүдэлтэй инфляц байна. Иймд даацтай бодлого хэрэгтэй.
Тодорхойгүй байдал үүсгэж болохгүй. Тодорхой бус байдал хямралын шалтгаан болно. Яам тамгын газрууд сахилга, хариуцлага алдаж болохгүй. Үндсэн хуулийн цэцийн шийдвэрээс болоод сандал ширээний асуудал яриад, тодорхойгүй байдал үүсэж, ажил цалгардах бий гэдэг болгоомжлол, эмзэглэл нийгэмд байна. Иргэдээс санал, шүүмжлэл ирж байна.
Үүнийг төрийн бүх албан хаагчдад хатуу анхааруулах хэрэгтэй. Төрийн ажил ном журмаар явах ёстой. Ажлын хэсэг завсар хийдлийг ашиглаж, ажил цалгардуулах, тендер төсөв мөнгөний холбоотой хууль бус асуудал үүсгэх вий гэдэгт бүх яам, хяналтын байгууллагуудтай хамтарч нарийн нягт анхаарал тавьж ажиллаарай” хэмээн чиглэл өглөө.
