Монголд эмчлүүлэх боломжгүй өвчнөөр гадаадад эмчлүүлсэн хүүхдийн эмчилгээний зардлын 50 хувийг төр хариуцахыг УИХ дэмжлээ

УИХ-ын чуулганы ээлжит хуралдаан эхэллээ. Чуулганаар Засгийн газрын тусгай сангийн тухай хуульд өөрчлөлт оруулах тухай хуулийн төслийг хэлэлцэж байна.

Уг хуулийн төсөлд Монголд эмчлүүлэх боломжгүй өвчний жагсаалтад орсон эмгэгээр гадаадад эмчлүүлэх хүүхдийн эмчилгээний төлбөрийн 50 хувийг, насанд хүрэгчдийн эмчилгээний төлбөрийн 20 хувийг төр хариуцахаар тусгажээ. Одоогоор гадаадад эмчлүүлээд ирсэн иргэний бичиг баримтад үндэслэн эмчилгээний төлбөрийн 5 хувийг төр хариуцаж буй юм.

Эрүүл мэндийн сайд С.Чинзориг, Монголд эмчлэх боломжгүй 26 өвчний жагсаалт бий. Монголд шинэ технологи нэвтрүүлэх, нутагтшуулах зардлыг тухайн эмнэлэг өөрөө хариуцна гэсэн зохицуулалттай. Манай нөхцөлд эмнэлэг бие даан шинэ технологи нэвтрүүлэх боломжгүй. Тиймээс Эрүүл мэндийг дэмжих сангаас санхүүжилт хийж, эрүүл мэндийн дэвшилтэт технологийг нэвтрүүлэх боломжтой гэж үзэж байна. Тус сангаас шинээр нэвтрүүлэх эмчилгээний зардлыг хариуцаж, 50 хүртэлх тооны давтамжтай хийсний дараа Эрүүл мэндийн даатгалд оруулах нь зүйтэй юм.

Монголд зүрх, судасны өвчнөөс шалтгаантай нас баралт тэргүүлж, хорт хавдар хоёрдугаарт орж байна.

УИХ-ын гишүүн Б.Баттөмөр, Монголд хорт хавдрын өвчлөл хамгийн өндөртэй аймаг нь Дорнод. Хамгийн бага өвчлөлтэй нь Баян-Өлгий аймаг. Энд ямар учир шалтгаан байна. Газар нутгийн байрлал нөлөөлж байгаа талаар хийсэн судалгаа байна уу гэсэн асуултад хариулт өгсөнгүй.

УИХ-ын гишүүн Ц.Даваасүрэн, Монголд эмчлэх боломжгүй өндөр өртөгтэй эмчилгээ хийлгэх шаардлагатай өвчтөнүүдэд энэ шийдвэр маш чухал байгаа юм. Орлого багатай иргэдэд илүү их дэмжлэг болно. Хоёрдугаарт, донорын асуудал маш эмзэг сэдэв. Зарим тохиолдолд мөнгөний шаардлагаар байж болохгүй шийдвэр гаргасан байдаг юм билээ.
Зарим тохиолдолд нэгэнт эмчилгээгүй болсон хүнд эмчилгээ хийдэггүй. Манай улсын хувьд эмчлэгч эмчийг хянах тогтолцоо байдаггүй. Нэг өвчтөнийг нэг л эмч хариуцаж эмчилдэг учир тэр эмч тухайн хүний хувь заяаг шийддэг. Гадны орнуудад эмчлэгч эмч, хянагч эмч гэж байдаг. Үүнийг бас эргэн харах цаг болсон.

С.Чингзориг, 2016 оны Эрүүл мэндийн сайдын тушаалаар Монголд эмчлэх боломжгүй 26 өвчний жагсаалт гарсан. Энэ жагсаалтад орсон өвчний улмаас гадаадад эмчлүүлсэн иргэдэд эмчлүүлээд ирэхэд нь эмчилгээний зардлын 5-хан хувийг төрөөс олгож байгаа нь дэндүү хангалтгүй.
Тиймээс энэ хуулийн өөрчлөлтөөр гадаадад эмчлүүлсэн хүүхдэд бол эмчилгээний зардлын 50 хувь, насанд хүрэгчдэд 20 хувийг олгохоор тусгасан.

Өмнө нь гадаадад өндөр өртөгтэй эмчилгээ хийлгэсэн иргэдэд дэмжлэг үзүүлэх зорилгоор 500 сая төгрөг л УИХ баталдаг. Харин ирэх 2024 онд 1 тэрбум төгрөг тусгасан. Эрүүл мэндийг дэмжих санд 2 тэрбум төгрөн төсөвлөж байсныг 10 тэрбум болгон нэмэгдүүлсэн. Хууль дагаж мөрдөх журмыг Засгийн газар батална. Журамдаа төсөв мөнгөний хүрэлцээнээс шалтгаалан эмчилгээний зардлын хэдэн хувийг төр хариуцахыг тусгах юм.

Мөн эмчилгээ хийлгээд ирсний дараа дэмжлэг өгдөг нь бас буруу. Энэ талаар эмч нартай ярихад гадаадад очсоны дараа өвчний онош, эмчилгээ өөрчлөгдөх тохиолдол байдаг учир эмчлүүлээд ирсний дараа өгөх нь зөв гэж хэлдэг.

Ц.Даваасүрэн, Эмчилгээнд явахын өмнө дэмжлэгийг өгсөн дээр гэж бодож байна. Эхний ээлжинд тухайн өвчтэй хүний гэр бүлийн орлоготой холбон журмаар зохицуулах нь зүйтэй шүү. Харж байхад боломжийн орлоготой хүмүүс мөнгө хүссэн тохиолдол байдаг. Энэ нь яваандаа ЖДҮ шиг болох вий гэсэн болгоомжлол бий.

Гишүүд асуулт асууж, үг хэлсний дараа Засгийн газрын тусгай сангийн тухай хуульд өөрчлөлт оруулах тухай хуулийн төслийг эцсийн хэлэлцүүлэгт бэлтгүүлэхээр төсвийн байнгын хороонд шилжүүллээ.

УИХ-ын чуулганы энэ долоо хоногийн нэгдсэн хуралдаанаар хэлэлцэх асуудлын жагсаалт:

1.Засгийн газрын тусгай сангийн тухай хуульд өөрчлөлт оруулах тухай хуулийн төсөл /Засгийн газар 2023.10.24-ний өдөр өргөн мэдүүлсэн, анхны хэлэлцүүлэг/ – Зарчмын зөрүүтэй 1 саналтай
2.Монгол Улсын Хүний Эрхийн Үндэсний Комиссын даргыг чөлөөлөх тухай асуудал
3.Улсын Их Хурлын Ерөнхий нарийн бичгийн даргыг томилох, чөлөөлөх тухай асуудал
4.Шүүх байгуулах тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Засгийн газар 2023.11.23-ны өдөр өргөн мэдүүлсэн, хэлэлцэх эсэх/
5.Цаг үеийн шинжтэй асуудлаар мэдээлэл сонсоно /Өвөлжилтийн бэлтгэл ажлын талаар/
6.Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төсөл болон хамт өргөн мэдүүлсэн хуулийн төслүүд /анхны хэлэлцүүлэг/ – Зарчмын зөрүүтэй 72 саналтай
7.Мал, амьтны эрүүл мэндийн тухай хуульд нэмэлт, өөрчлөлт оруулах тухай, Амьтан, ургамал, тэдгээрийн гаралтай түүхий эд, бүтээгдэхүүнийг улсын хилээр нэвтрүүлэх үеийн хорио цээрийн хяналт, шалгалтын тухай хуульд нэмэлт, өөрчлөлт оруулах тухай хуулийн төслүүд болон хамт өргөн мэдүүлсэн хуулийн төслүүд /Засгийн газар 2023.06.19-ний өдөр өргөн мэдүүлсэн, эцсийн хэлэлцүүлэг/
8.Амьтан, ургамал, тэдгээрийн гаралтай түүхий эд, бүтээгдэхүүнийг улсын хилээр нэвтрүүлэх үеийн хорио цээрийн хяналт, шалгалтын тухай хуульд нэмэлт, өөрчлөлт оруулах тухай хуулийг дагаж мөрдөх журмын тухай хуулийн төсөл /Мал, амьтны эрүүл мэндийн тухай хуульд нэмэлт, өөрчлөлт оруулах тухай, Амьтан, ургамал, тэдгээрийн гаралтай түүхий эд, бүтээгдэхүүнийг улсын хилээр нэвтрүүлэх үеийн хорио цээрийн хяналт, шалгалтын тухай хуульд нэмэлт, өөрчлөлт оруулах тухай хуулийн төслүүдтэй холбогдуулан боловсруулсан, анхны хэлэлцүүлэг/
9.Гэрийн тэжээвэр амьтны тухай хуулийн төсөл болон хамт өргөн мэдүүлсэн хуулийн хуулийн төслүүд /Улсын Их Хурлын гишүүн Б.Энхбаяр нарын 3 гишүүн 2022.09.26-ны өдөр өргөн мэдүүлсэн, эцсийн хэлэлцүүлэг/
10.Зөвшөөрлийн тухай хуульд нэмэлт оруулах тухай хуулийн төсөл /Гэрийн тэжээвэр амьтны тухай хуулийн төсөлтэй холбогдуулан боловсруулсан, анхны хэлэлцүүлэг/
11.“Хүүхдийн эрхийг хамгаалах, хангахтай холбоотой асуудлаарх Ерөнхий хяналтын сонсголын тайлантай холбогдуулан авах арга хэмжээний тухай” Улсын Их Хурлын тогтоолын төсөл
12.Зарим Байнгын хорооны дарга нарыг сонгох, чөлөөлөх тухай асуудал